سولتۇستىك قازاقستان وبلىسىنداعى تايىنشا كوپسالالى اۋدانارالىق اۋرۋحاناسىن جاڭعىرتۋعا 1,3 ملرد تەڭگە باعىتتالدى. قارجى مەملەكەتكە زاڭسىز شىعارىلعان اكتيۆتەردى قايتارۋ ەسەبىنەن قالىپتاسقان ارنايى قوردان بولىنگەن, دەپ جازادى Egemen.kz.
ۇكىمەتتىڭ مالىمەتىنشە, مەديتسينالىق مەكەمەدە اۋقىمدى جاڭارتۋ جۇمىستارى باستالعان. قازىرگى تاڭدا اۋرۋحانانىڭ ماتەريالدىق-تەحنيكالىق بازاسى مەن ينجەنەرلىك ينفراقۇرىلىمى قايتا جاڭارتىلىپ جاتىر. جوبا اياسىندا ماگنيتتىك-رەزونانستىق توموگرافياعا ارنالعان جەكە بولمەلەر مەن زاماناۋي زەرتحانا اشىلادى. بۇل تۇرعىندارعا كۇردەلى تەكسەرۋلەردى اۋداننان شىقپاي وتۋگە مۇمكىندىك بەرەدى.
سونىمەن بىرگە قابىلداۋ ءبولىمى حالىقارالىق تالاپتارعا ساي قايتا جابدىقتالادى. رەانيماتسيالىق توسەكتەرمەن قامتاماسىز ەتىلگەن جاڭا جۇيە دارىگەرلەرگە شۇعىل جاعدايداعى پاتسيەنتتەرگە جەدەل ءارى ءتيىمدى كومەك كورسەتۋگە جول اشادى. جوندەۋ تولىق اياقتالعان سوڭ اۋرۋحانا جوسپارلى جانە جەدەل مەديتسينالىق قىزمەت كورسەتۋدىڭ قازىرگى ستاندارتتارىنا سايكەس جۇمىس ىستەمەك.
ۆەدومستۆو وكىلدەرىنىڭ ايتۋىنشا, اتالعان جاڭعىرتۋ مەديتسينالىق كومەكتىڭ قولجەتىمدىلىگى مەن ساپاسىن ارتتىرۋعا ىقپال ەتەدى.
قارجى مينيسترلىگىنىڭ دەرەگىنە سايكەس, ارنايى قور ارقىلى الەۋمەتتىك جانە كوممۋنالدىق نىسانداردى دامىتۋعا جالپى كولەمى 482 ملرد تەڭگە بولىنگەن. ونىڭ ىشىندە «اۋىلدىق دەنساۋلىق ساقتاۋدى جاڭعىرتۋ» باعدارلاماسى اياسىندا ەل اۋماعىندا 183 مەديتسينالىق مەكەمەنى جاڭارتۋ كوزدەلگەن.