جىل باسىنداعى ءداستۇرلى سۇحباتىندا مەملەكەت باسشىسى قاسىم-جومارت توقاەۆ وتكەندى قورىتىندىلاپ, بولاشاق باسىمدىقتاردى بەلگىلەيدى. بۇل مەملەكەتىمىزدە جاڭا ساياسي تاجىريبەنى قالىپتاستىرىپ كەلەدى. 2026 جىل دا وسى داستۇرمەن باستالدى. 5 قاڭتاردا «Turkistan» گازەتىندەگى اۋقىمدى سۇحباتىندا پرەزيدەنت ىشكى جانە سىرتقى ساياسات, ەلدىڭ الەۋمەتتىك-ەكونوميكالىق دامۋى, ونىڭ ىشىندە ينفلياتسيا, سالىق رەفورماسى, وليگوپوليالارمەن كۇرەس, پارلامەنتتىك رەفورما سياقتى وزەكتى تاقىرىپتارعا قاتىستى سۇراقتارعا جاۋاپ بەردى.
پرەزيدەنت ەلىمىزدىڭ رەفورمالاردى جۇزەگە اسىرۋعا ءبىرجولا بەت بۇرعانىن, جاڭعىرۋ جولىندا قارىشتى قادام باسىپ, بارىنشا وركەنيەتتى ەل بولا باستاعانىن, قوعامدا وسكەلەڭ ۇرپاقتىڭ جارقىن بولاشاعى ءۇشىن تۇبەگەيلى وزگەرىس جاساۋدىڭ ماڭىزى تۋرالى ناقتى تۇسىنىك قالىپتاسقانىن, سونىمەن قاتار بولاشاق ءۇشىن تىنىمسىز ەڭبەكتەنىپ, تەك العا ۇمتىلۋ كەرەگىن اتاپ ءوتتى.
ادىلدىك, زاڭ مەن ءتارتىپ, ەڭبەكقورلىق سياقتى مەملەكەتىمىزدىڭ بولاشاعى ءۇشىن ايرىقشا ماڭىزدى قاعيداتتارعا نەگىزدەلگەن قوعام قۇرىپ جاتىرمىز. ق.توقاەۆ ۇزاق مەرزىمگە ارنالعان ناتيجەگە جەتۋ ءۇشىن بۇل جۇمىس جاڭا جىلدا ەكى ەسە تىڭ قارقىنمەن جالعاسىن تاباتىنىنا سەنىم ءبىلدىردى.
پرەزيدەنت جۇرت نازارىندا جۇرگەن سالىق رەفورماسىنا دا توقتالدى. ءوز جاۋابىندا «بۇل رەفورما قاتارداعى «فيسكالدىق ناۋقان» ەمەس, سالىق جۇيەسىن قايتا جۇكتەۋ ەكەنىن, سالىق رەفورماسىنىڭ باستى مىندەتى تۇراقتى ەكونوميكالىق ءوسۋدى قامتاماسىز ەتۋ جانە ونىڭ ناتيجەسىن بيىل كورەمىز», دەپ جاۋاپ بەردى.
سۇحباتتا تامىرى تەرەڭگە كەتكەن ەكونوميكالىق ماسەلەلەرگە ونداعان جىلدار بويى نازار اۋدارىلماعانى, قالالار مەن اۋىلدارداعى ينفراقۇرىلىمنىڭ توزعانى, ەنەرگەتيكا نىساندارى مەن كوممۋنالدىق جەلىلەردىڭ ەسكىرگەنى كوتەرىلدى. توزىعى جەتىپ, اۋپىرىممەن ارەڭ تۇرعان ينفراقۇرىلىمدى قالپىنا كەلتىرۋ جەتكىلىكسىزدىگى, جۇمىس ءتاسىلىن وزگەرتۋ, ول ءۇشىن سالاعا ينۆەستيتسيا تارتۋ ءۇشىن قولايلى جاعداي جاساپ, ناعىز نارىقتىق تەتىكتەر قالىپتاستىرۋ جۇمىستارى جۇرگىزىلىپ جاتقانى اتالدى.
مەملەكەتىمىزدىڭ دامۋى ءۇشىن كولىك جانە لوگيستيكا سالاسىنىڭ جاعدايىنا دا نازار اۋدارىلدى. قازاقستاننىڭ تەڭىزگە تىكەلەي شىعاتىن جولى بولماسا دا, ەۋرازيانىڭ نەگىزگى ترانزيتتىك كۇرە جولدار توعىسقان جەرىندە ورنالاسقانىن دۇرىس پايدالانۋ قولعا الىنباق. سوندىقتان ەلىمىزدى ەۋرازيانىڭ كولىك ايلاعى رەتىندە قالىپتاستىرۋدى جوسپارلاپ, ول ءۇشىن كولىك جانە لوگيستيكا ماسەلەسى گەوساياساتتىڭ اجىراماس بولىگىنە اينالاتىنى ايتىلدى.
اۋىل شارۋاشىلىعى سالاسىنىڭ الەۋەتىن دۇرىس پايدالانۋ ماسەلەسى دە ايتىلدى. پرەزيدەنتتىڭ ايتۋىنشا, ساپالىق تۇرعىدان دامىتۋ ءۇشىن جاسالىپ جاتقان جۇمىستارعا, سونىڭ ارقاسىندا قول جەتكىزگەن جەتىستىكتەرگە قاراماستان بۇل سالادا قازىرگى تاڭدا كووپەراتيۆتەرگە, ياعني شارۋالار بىرلەستىگىن قۇرۋعا قايتا ورالۋ ماسەلەسى قاراستىرىلىپ جاتىر. كووپەراتيۆتەر ەڭبەك ونىمدىلىگى مەن اۋىل شارۋاشىلىعى ءوندىرىسىنىڭ تيىمدىلىگىن ارتتىرا الادى. سونداي-اق دايىن ءونىمدى ساتاتىن نارىقتارعا جاقىن بولۋعا, تۇتىنۋشىلارمەن ۇزاق مەرزىمگە ارنالعان قارىم-قاتىناس ورناتۋعا جول اشادى.
سۇحباتتا پرەزيدەنت ەل جاستارىنا ۇندەۋ جولداپ, دارىندى, ءبىلىمدى, ىنتالى جاستارعا دەگەن سەنىمىن ءبىلدىرىپ, ولاردى جاسامپازدىققا, سىندارلى ويلاۋعا, ەڭبەكقورلىققا, ىزدەنىمپازدىق پەن تارتىپكە شاقىرىپ, نەمقۇرايدىلىق پەن نيگيليزمنەن, سونداي-اق بوتەن يدەيالاردان ساق بولۋعا شاقىردى.
بۇل مەملەكەت باسشىسى ق.توقاەۆتىڭ حالىقشىل بەينەسىن كورسەتەتىن اشىق ءارى تەرەڭ مازمۇندى, ەلىمىزدىڭ بولاشاق ستراتەگيالىق دامۋىنىڭ باسىم باعىتتارىن ايقىنداعان سۇحبات بولدى دەپ ەسەپتەيمىن.
ءالي بەكتاەۆ,
سەنات دەپۋتاتى