ەلىمىزدە جەكە قۇجاتتاردى الۋ مەن اۋىستىرۋ ۇدەرىسىن تولىق تسيفرلاندىرۋ جۇمىس تارتىبىنە تولىق كىردى. ۇكىمەتتەگى بريفينگتە تسيفرلىق دامۋ سالاسىنا جاۋاپتى ۆيتسە-مينيستر روستيسلاۆ كونياشكين تولقۇجاتتاردى ونلاين فورماتتا بەرۋ مۇمكىندىگى پىسىقتالىپ جاتقانىن مالىمدەدى, دەپ جازادى Egemen.kz.
مينيسترلىك وكىلىنىڭ ايتۋىنشا, 2025 جىلدان باستاپ قازاقستان ازاماتتارى جەكە كۋالىكتىڭ مەرزىمى اياقتالعان جاعدايدا ونى eGov.kz پورتالى ارقىلى ونلاين اۋىستىرا الادى. قازىر بۇل قىزمەت تەك ءبىر باعىتتا ىسكە قوسىلعان.
«الداعى ۋاقىتتا ونلاين قىزمەت تۇرلەرىن كەڭەيتۋدى جوسپارلاپ وتىرمىز. ياعني جەكە كۋالىكتى جوعالتۋ, جاڭادان راسىمدەۋ سەكىلدى وزگە دە جاعدايلار قامتىلادى. سونىمەن قاتار, ىشكى ىستەر مينيسترلىگىمەن بىرلەسىپ, تولقۇجاتتاردى دا ونلاين فورماتتا بەرۋ مۇمكىندىگىن قاراستىرىپ جاتىرمىز», دەدى ۆيتسە-مينيستر.
ونىڭ سوزىنشە, بۇل باعىتتاعى جۇمىستار 2026 جىلدىڭ سوڭىنا دەيىن اياقتالۋى ءتيىس. بۇدان بولەك, جۇرگىزۋشى كۋالىگىن الۋ قىزمەتىن دە تولىقتاي ونلاين فورماتقا كوشىرۋ جوسپارلانىپ وتىر.
مينيسترلىك جاڭا سەرۆيستەردى كەزەڭ-كەزەڭىمەن ەنگىزۋدى كوزدەيدى. ماقسات – قىزمەتتەردىڭ حالىققا قانشالىقتى قولايلى ەكەنىن سارالاپ, تسيفرلىق شەشىمدەردىڭ تيىمدىلىگىن ارتتىرۋ.