تۇپ-تۋرا 91 جىل بۇرىن ورالدىڭ جىمپيتى اۋىلىندا قازاق پوەزياسىنىڭ ينتەللەكتۋال اقىنى, قازاقستاننىڭ حالىق جازۋشىسى قادىر مىرزا ءالى دۇنيەگە كەلدى, دەپ جازادى Egemen.kz.
شىعارماشىلىق جولىن بالالار پوەزياسىنان باستاعان اقىن بارا-بارا فيلوسوفيالىق تاقىرىپتارعا قالام تەربەپ, ادام جانىنىڭ تەرەڭ قاتپارلارىنا ۇڭىلگەن ىرگەلى ەڭبەكتەرىمەن ەرەكشەلەنەدى. ونىڭ «وي ورمانى», «دالا ديدارى» سىندى كىتاپتارى قازاق وقىرمانىنا ۇلكەن جاڭالىق بولىپ كەلدى.
قادىر مىرزا ءالى ونەردىڭ وزگە دە جانرلارىن دا جاتىرقاماي جاقسى جازدى. ايتالىق انگە ارناپ جازىلعان ولەڭدەرىنىڭ سانى ەكى جۇزدەن استى. ولاردىڭ كوبى حالىققا كەڭ تارادى, «كۇندەر-اي» اتتى جەكە كىتاپ بولىپ باسىلىپ شىقتى.
اقىن قالامىنان حالىق فولكلورىنىڭ اتاقتى كۇلدىرگى كەيىپكەرى الدار كوسە جايلى «ساقال ساۋداسى», «قاسقىر قاقپان» اتتى وتكىر ساتيرالى كومەديا مەن ماحامبەتتىڭ ەڭ سوڭعى ازاپتى كۇندەرىنە ارنالعان «جارالى جولبارىس» اتتى جانە ء«امىر تەمىر» كەسەك درامالىق شىعارمالارى دا جارىق كوردى.
اۋدارما باعىتىندا دا وراسان زور ەڭبەك ەتتى. قادىر الەم ادەبيەتىنىڭ كلاسسيكتەرىن وندىرتە اۋداردى.
ءومىرىنىڭ سوڭعى بەل-بەلەسىندە قالامگەرلەردىڭ شىعارماشىلىقتان تىس ءومىرىن دەرەكتەگەن «جازمىش» پەن «يىرىم» كىتاپتارى جارىق كوردى.
جاقىندا جازۋشىلار وداعىنىڭ ىجداعاتىمەن اقىننىڭ اتالعان كىتاپتارى قايتا باسىلىپ شىقتى.
21 قاراشا كۇنى اقىننىڭ شىعارماشىلىق زەرتحاناسىن زەردەلەگەن «قادىر اقىننىڭ قارىنداشى» اتتى تانىمدىق ماقالا جاريالاعان بولاتىنبىز.