ەلىمىزدە كەلەر جىلى قاي سالادا جۇرگەن ازاماتتاردىڭ تابىسى ارتۋى مۇمكىن ەكەنىن ەڭبەك جانە حالىقتى الەۋمەتتىك قورعاۋ مينيسترلىگى مالىمدەدى, دەپ جازادى Egemen.kz.
كەيىنگى جىلدارى ەڭبەك نارىعى تۇبەگەيلى وزگەرىپ كەلەدى. تەحنولوگيا دامىدى, جۇمىس ىستەۋ ءتاسىلى دە باسقا ارناعا بۇرىلدى. وسىنى ەسكەرگەن مەملەكەت 2025 جىلى كاسىبي ستاندارتتاردى قايتا قاراپ, جاڭارتتى. ناتيجەسىندە 132 كاسىبي ستاندارت ازىرلەنىپ, ولار 1,1 مىڭنان استام ماماندىقتى قامتىدى. سونىڭ شامامەن 600-ءى – جۇمىسشى كاسىپتەر. ال كاسىبي ستاندارتتار تىزىلىمىندە قازىر 864 قۇجات بار, ولار 4,5 مىڭنان اسا ماماندىققا قولدانىلادى.
جاڭارتۋ كەزىندە باستى نازار ناقتى ەڭبەككە قاجەت كاسىپتەرگە اۋدارىلدى. اسىرەسە جۇمىسشى ماماندىقتارعا جانە تەحنولوگيا اسەرىنەن وزگەرگەن ەڭبەك مازمۇنىنا باسىمدىق بەرىلدى. گەنەراتيۆتى جاساندى ينتەللەكت پەن جاڭا تسيفرلىق شەشىمدەر كوپتەگەن سالانىڭ ىشكى قۇرىلىمىن وزگەرتتى. سول سەبەپتى بۇرىنعى تالاپتار قايتا قارالىپ, قازىرگى نارىققا بەيىمدەلدى.
سۇرانىسقا يە جاڭا ماماندىقتاردىڭ قاتارىندا ۆيرتۋالدى جانە تسيفرلىق جوبالاۋمەن اينالىساتىن BIM-ماماندار, ۇشقىشسىز ۇشۋ اپپاراتتارىنىڭ وپەراتورلارى, سونداي-اق كيبەرقاۋىپسىزدىك ينسپەكتورلارى بار. بۇل باعىتتاردىڭ بارلىعى تسيفرلاندىرۋ مەن وندىرىستەگى اۆتوماتتاندىرۋعا تىكەلەي بايلانىستى.
مينيسترلىكتىڭ مالىمەتىنشە, تەحنولوگيا ءوندىرىستى وتە جىلدام وزگەرتۋدە, ال كادر دايارلاۋ جۇيەسى سوعان ىلەسۋ ءۇشىن جاڭاشا باعداردى قاجەت ەتەدى. وسى تۇرعىدان كاسىبي ستاندارتتار ەڭبەك نارىعى مەن ءبىلىم بەرۋ جۇيەسى ءۇشىن ناقتى باعىت كورسەتەتىن قۇرالعا اينالىپ وتىر. ولار مامان بىلىكتىلىگىنە دەگەن سەنىمدى ارتتىرىپ, تۇراقتى ەكونوميكالىق وسىمگە نەگىز بولادى.
كاسىبي ستاندارتتاردى ازىرلەۋ جانە قايتا قاراۋ جۇمىسىنا 50-دەن استام سالالىق كەڭەس قاتىسىپ وتىر. بۇل كەڭەستەردىڭ قۇرامىندا 900-دەن اسا ساراپشى بار. ولاردىڭ ىشىندە مەملەكەتتىك ورگانداردىڭ وكىلدەرى, بيزنەس, سالالىق بىرلەستىكتەر مەن ءبىلىم بەرۋ ۇيىمدارىنىڭ ماماندارى بار.
الداعى جىلدارى مەملەكەت سۇرانىسقا يە ماماندىقتاردى كاسىبي ستاندارتتارمەن 100 پايىز قامتۋدى جوسپارلاپ وتىر. ەڭ جوعارى كادر قاجەتتىلىگى ونەركاسىپتە, قۇرىلىستا, اۋىل شارۋاشىلىعىندا جانە كولىك سالاسىندا كۇتىلەدى. ءدال وسى سالالاردا جۇمىس ىستەيتىندەر ءۇشىن 2026 جىل تابىس تۇرعىسىنان مۇمكىندىككە تولى بولماق.
2030 جىلدان باستاپ كاسىبي ستاندارتتاردى ەڭبەك قاتىناستارىندا قولدانۋ مىندەتتى بولادى. وسىعان بايلانىستى ەسكى بىلىكتىلىك انىقتامالىقتارىنان جاڭا جۇيەگە بىرتىندەپ كوشۋ كوزدەلىپ وتىر. نەگىزگى ماقسات – جۇمىس بەرۋشى مەن قىزمەتكەرگە ارتىق قيىندىق تۋدىرماي, تالاپتاردى كەزەڭ-كەزەڭىمەن ەنگىزۋ.