پرەزيدەنتتىڭ وڭدەۋ ونەركاسىبىن دامىتۋ جانە ينۆەستيتسيالار تارتۋ جونىندەگى تاپسىرمالارىن جۇزەگە اسىرۋ شەڭبەرىندە ۇكىمەت اقتوبە وبلىسىندا «قازاقستاندا الكوگولسىز سۋسىندار شىعاراتىن زاۋىت سالۋ» تۋرالى كەلىسىمنىڭ جوباسىن ماقۇلدادى. ءتيىستى قاۋلىعا پرەمەر-مينيستر ولجاس بەكتەنوۆ قول قويدى, دەپ جازادى Egemen.kz.
زاۋىتتىڭ قۇرىلىسى 2026 جىلى باستالادى. ءوندىرىس ورنى ىسكە قوسىلعاندا 120-دان استام جاڭا جۇمىس ورنى اشىلادى.
ال جوباعا «كوكا-كولا الماتى بوتتلەرس» بك جشس ينۆەستور بولادى. جاڭا وندىرىستىك كەشەنگە سالىنعان ينۆەستيتسيالاردىڭ جالپى كولەمى 41,9 ملرد تەڭگەنى, جوبالىق قۋاتتىلىعى جىلىنا 280 ملن ليتر ءونىمدى قۇرايدى.
«كاسىپورىن حالىقارالىق ستاندارتتارعا سايكەس كەلەتىن قالدىقتاردى باسقارۋدىڭ ەكولوگيالىق تازا جۇيەلەرى بار وزىق تەحنولوگيالارمەن جابدىقتالادى. بۇل زاۋىتتىڭ ەلىمىزدىڭ تۇراقتى ونەركاسىپتىك ەكوجۇيەسىنە ينتەگراتسيالانۋىن قامتاماسىز ەتەدى», دەلىنگەن ۇكىمەتتىڭ ءباسپاسوز قىزمەتى تاراتقان حابارلامادا.
بۇعان دەيىن ۇكىمەت شاعىن بيزنەستى قولداۋدىڭ بىرىڭعاي باعدارلاماسىن ۇسىنعان. سونداي-اق كەلەر جىلعى ەكونوميكالىق ءوسىمدى قولداۋ تەتىكتەرى دە قارالدى.