ءال-فارابي اتىنداعى قازاق ۇلتتىق ۋنيۆەرسيتەتى قالاشىعىندا ستۋدەنتتەرگە ارنالعان 5000 ورىندىق جاڭا جاتاقحانالار قۇرىلىسىنىڭ كاپسۋلاسىن سالۋ ءراسىمى ءوتتى, دەپ جازادى Egemen.kz.
توعىز قاباتتى بەس جاڭا جاتاقحانا قازۇۋ قالاشىعى قۇرىلىسىنىڭ II دامۋ جوسپارى اياسىندا بوي كوتەرەدى.
ستۋدەنتتىك جاتاقحانالاردىڭ قۇرىلىسىن ىسكە اسىرۋدا قىتايدىڭ «چجۋنتايحۋا» باوتسزي قۇرىلىس ەڭبەك قىزمەتتەرى كومپانياسى» ينۆەستور رەتىندە تارتىلدى.
ايتۋلى شاراعا ۋنيۆەرسيتەت باسشىلىعى, قۇرىلىس كومپانياسى وكىلدەرى, وقۋ ورداسىنىڭ تانىمال تۇلەكتەرى, وقىتۋشى-پروفەسسورلار قۇرامى مەن ستۋدەنت جاستار قاتىستى.
سالتاناتتى راسىمدە ءال-فارابي اتىنداعى قازۇۋ-دىڭ باسقارما توراعاسى – رەكتورجانسەيىت تۇيمەباەۆ ءسوز سويلەپ, بۇل باستامانىڭ ۋنيۆەرسيتەت تاريحىنداعى ستراتەگيالىق ماڭىزىنا توقتالدى.
«2022 جىلى قازاقستان پرەزيدەنتى قاسىم-جومارت كەمەل ۇلى توقاەۆتىڭ قولداۋىمەن قازۇۋ قالاشىعى قۇرىلىسىنىڭ ەكىنشى كەزەڭى باستالعان بولاتىن. جاڭا جاتاقحانالار جاستاردىڭ ءبىلىم الۋىنا, عىلىمي-زەرتتەۋ جۇمىستارىنا جانە الەۋمەتتىك بەيىمدەلۋىنە وڭ اسەرىن تيگىزەدى», دەپ اتاپ ءوتتى رەكتور.
سونىمەن قاتار جيىندا باوتسزي قالاسىنىڭ قۇرىلىس جانە ەڭبەك قىزمەتتەرى جونىندەگى «چجۋنتايحۋا» كومپانياسىنىڭ ديرەكتورى چجان حۋنتسيان قۇتتىقتاۋ ءسوز سويلەپ, جوبانىڭ حالىقارالىق ارىپتەستىك اياسىندا جۇزەگە اساتىنىن جانە قۇرىلىس ساپاسىنا ەرەكشە ءمان بەرىلەتىنىن جەتكىزدى.
شارا بارىسىندا بولاشاق ۇرپاققا ارنالعان جولداۋ حاتقا قول قويىلىپ, سالتاناتتى تۇردە كاپسۋلا جەرگە قويىلدى.
ء«بىز قازۇۋ-دى دامىتۋ مەن جاڭعىرتۋدىڭ جاڭا ءداۋىرىنىڭ تابالدىرىعىندا تۇرمىز. بۇل – ساپالى ءبىلىم الۋعا, عىلىمي قىزمەتتى دامىتۋعا جانە ستۋدەنتتىك ءومىردى جاڭا دەڭگەيگە كوتەرۋگە تىڭ مۇمكىندىكتەر اشاتىن تاريحي ءسات. ستۋدەنتتىك جاتاقحانالار قۇرىلىسى اياسىندا اتقارىلىپ جاتقان بارلىق جۇمىستار ءبىلىم الۋشى جاستار مەن ۋنيۆەرسيتەتتىڭ پروفەسسور-وقىتۋشىلار قۇرامى ءۇشىن لايىقتى, زاماناۋي جانە جايلى جاعدايلار جاساۋعا باعىتتالعان. وسى جاتاقحانالاردا تۇرىپ, ۋنيۆەرسيتەت قابىرعاسىندا ءبىلىم العان ستۋدەنتتەر ەلىمىزدىڭ دامۋى مەن وركەندەۋىنە ەلەۋلى ۇلەس قوساتىنىنا نىق سەنەمىز», دەلىنگەن حاتتا.
جوبا ءبىلىم الۋشىلار ءۇشىن قولايلى ءارى قاۋىپسىز ورتا قالىپتاستىرۋعا باعىتتالعان. جالپى اۋماعى 66 مىڭ شارشى مەتردى قۇرايتىن كەشەن 5000-نان استام ورىنعا ەسەپتەلگەن. ينۆەستيتسيا كولەمى شامامەن 33,8 ميلليارد تەڭگەنى قۇرايدى.
قۇرىلىس جۇمىستارى 2026 جىلدىڭ قاڭتار ايىندا باستالىپ, ءبىر جارىم جىل ىشىندە اياقتالادى دەپ جوسپارلانعان. جاتاقحانالار حالىقارالىق ستاندارتتارعا ساي جابدىقتالىپ, قاۋىپسىزدىك جۇيەلەرى مەن تۇرمىستىق ينفراقۇرىلىم تولىق قامتىلادى.
اتالعان جوبا ستۋدەنتتەردىڭ تۇرعىن ۇيگە قولجەتىمدىلىگىن ارتتىرىپ, اسىرەسە وزگە وڭىرلەردەن جانە شەتەلدەن كەلگەن ءبىلىم الۋشىلار ءۇشىن ۇلكەن مۇمكىندىك بولماق.
الماتى