جاڭا جىل مەرەكەسى قارساڭىندا ۇلتتىق ۇلاننىڭ ەلوردالىق 5573 اسكەري ءبولىمىنىڭ اۋماعى جارقىراعان, ەرتەگىدەي ءارى ەرەكشە جىلى اتموسفەراعا تولى ناعىز مۇز قالاشىققا اينالدى, دەپ جازادى Egemen.kz.
ەرەكشە جوبانىڭ باستاماشىلارى مەرزىمدى اسكەري قىزمەتىن وتەپ جۇرگەن ساربازداردىڭ وزدەرى. اسكەري قىزمەتشىلەر ءبولىم قولباسشىلىعىنا جەكە قۇرامعا مەرەكەلىك كوڭىل كۇي سىيلايتىن جاڭا جىلدىق قالاشىقتى ءوز كۇشتەرىمەن جاساۋ جونىندە ۇسىنىس بىلدىرگەن. يگى باستاما قولداۋ تاۋىپ, ءارى قاراي جۇمىس ساربازداردىڭ ىنتاسى, ەڭبەگى مەن بىرلىگىنىڭ ارقاسىندا العا باستى.
ۇلاندىقتاردىڭ مۇز بەن قاردان جاسالعان مۇسىندەرى ءار جىلداردىڭ بەلگىسىن بەينەلەيدى. كومپوزيتسيادا جىلان مەن جىلقى بەينەلەرى – وتكەن جىل مەن كەلەر جىلدىڭ سيمۆولدارى رەتىندە ەرەكشە كوزگە تۇسەدى. ءاربىر ءمۇسىن ۇقىپتىلىقپەن, ءار بولىگىنە ءمان بەرە وتىرىپ جاسالىپ, اۆتورلاردىڭ شىعارماشىلىق كوزقاراسىن ايقىن كورسەتتى.
سونداي-اق ساربازدار مەرەكەنىڭ باستى بەلگىسى – جاڭا جىلدىق شىرشانى دا ءوز قولدارىمەن بەزەندىردى. جارىق شامدارى, گيرلياندالار مەن ءتۇرلى جارقىراعان ەلەمەنتتەر قالاشىققا جىلىلىق پەن سيقىرلى اسەر بەرىپ, ءبولىم اۋماعىن مەرەكەنى كۇتۋ اتموسفەراسىنا بولەدى.
جاڭا جىل مەرەكەسى قارساڭىندا استانا مەن الماتىدا قانداي ءىس-شارالار وتەدى؟
ايتا كەتكەن ءجون, بۇل مۇز قالاشىق اسەمدىك ءۇشىن عانا جاسالماعان. ول باستاما مەن كومانديرلەردىڭ قولداۋى, اسكەري ۇجىمنىڭ اۋىزبىرشىلىگى بولسا, قىستىڭ ءار كۇندەرى دە مەرەكەگە اينالاتىنىن كورسەتتى. قاتاڭ اسكەري ءتارتىپ اياسىندا دا شىعارماشىلىققا, جاقسى كوڭىل-كۇيگە جانە جاڭا جىلدىق قۋانىشقا ارقاشان ورىن تابىلاتىنىن دالەلدەدى.