2025 جىل ەلوردالىق «استانا بالەت» تەاترى ءۇشىن شىعارماشىلىق سەرپىلىستەرگە, اۋقىمدى جوبالار مەن جارقىن جەڭىستەرگە تولى ايرىقشا كەزەڭ رەتىندە تاريحتا قالدى. ۇجىم ۇلتتىق جانە الەمدىك حورەوگرافيا ونەرىن ۇشتاستىرا وتىرىپ, كورەرمەنگە مازمۇنى تەرەڭ, كوركەمدىك دەڭگەيى جوعارى قويىلىمدار ۇسىنىپ, كاسىبي شەبەرلىكتىڭ بيىك ۇلگىسىن كورسەتتى, دەپ حابارلايدى Egemen.kz.
جىل كولەمىندە تەاتر ساحناسىندا بەس ءىرى پرەمەرا ۇسىنىلدى. سولاردىڭ ۇشەۋى – قازاقتىڭ باي مادەني مۇراسىن, ءداستۇرلى قيمىل-ورنەك پەن زاماناۋي پلاستيكانى ۇيلەستىرگەن ۇلتتىق حورەوگرافيالىق مينياتيۋرالار. بارلىعى 83 سپەكتاكل قويىلىپ, 50 مىڭعا جۋىق كورەرمەن «استانا بالەت» ونەرىن تاماشالادى. بۇل كورسەتكىش تەاتردىڭ ەل مادەني كەڭىستىگىندەگى ورنىنىڭ ايقىن دالەلى.
تەاتر ۇجىمى شىعارماشىلىق ماۋسىم بارىسىندا ەل وڭىرلەرىن ارالاپ, پاۆلودار, الماتى جانە قوستاناي قالالارىندا گاسترولدىك ساپارلار وتكىزدى. ايماق كورەرمەندەرى ءار قويىلىمدى ەرەكشە ىقىلاسپەن قابىلداپ, ارتىستەردىڭ جوعارى كاسىبي دەڭگەيىنە, ساحنالىق مادەنيەتىنە زور باعا بەردى. گاسترولدىك ساپارلار ۇلتتىق بالەت ونەرىنىڭ كەڭ اۋديتورياعا جول تارتۋىنا مۇمكىندىك بەردى.
2025 جىلدىڭ ەڭ ءىرى ءارى ايتۋلى پرەمەراسى – كارل ورفتىڭ «Carmina Burana» بالەت-كانتاتاسى بولدى. بۇل قويىلىم تەاتر تاريحىنداعى جاڭا بەلەسكە اينالدى. العاش رەت ءبىر ساحنادا حور, سيمفونيالىق وركەستر, ۆوكالدىق سوليستەر مەن بالەت ترۋپپاسى ءبىرتۇتاس كوركەم دۇنيە رەتىندە ونەر كورسەتتى. مۋزىكا مەن قيمىلدىڭ, دراماتۋرگيا مەن ساحنالىق شەشىمنىڭ ۇيلەسىمى كورەرمەنگە ۇمىتىلماس اسەر سىيلادى. اتالعان سپەكتاكل XIII تەاتر ماۋسىمىن سالتاناتتى تۇردە جاۋىپ, جىل قورىتىندىسىندا كاسىبي ورتا تاراپىنان «جىل بالەتى» اتاعىنا يە بولدى.
حالىقارالىق ارەناداعى جەتىستىكتەر تەاتردىڭ بەدەلىن ودان ءارى نىعايتتى. «استانا بالەت» ۇجىمى وڭتۇستىك كورەيادا وتكەن «Cheonan World Dance Festival 2025» دۇنيەجۇزىلىك بي فەستيۆالىندە كۇمىس مەدال جەڭىپ الدى. فەستيۆال ساحناسىندا كورەرمەننىڭ زور ىقىلاسىنا بولەنگەن « ۇلى دالا مۇراسى» كونتسەرتتىك باعدارلاماسى ۇسىنىلىپ, ۇلتتىق حورەوگرافيالىق مينياتيۋرالار ارقىلى قازاق حالقىنىڭ باي رۋحاني الەمى, تاريحى مەن ەستەتيكاسى پاش ەتىلدى. بۇل جەتىستىك ۇلتتىق حورەوگرافيا مەكتەبىنىڭ الەمدىك دەڭگەيدە باسەكەگە قابىلەتتى ەكەنىن تاعى ءبىر مارتە دالەلدەدى.
تەاتر رەپەرتۋارى بيىل ەكى اكتىلى «قوس كىلەم» بالەتىمەن تولىقتى. قويىلىمدا ءداستۇر مەن زاماناۋي كوزقاراس ساباقتاستىعى كورىنىس تاۋىپ, كوركەمدىك ىزدەنىستىڭ جاڭا باعىتى ۇسىنىلدى. سونىمەن قاتار, مەملەكەتتىك مەرەكەلەرگە ارنالعان «ماڭگى ەل» كونتسەرتتىك باعدارلاماسى اياسىندا جاڭا حورەوگرافيالىق مينياتيۋرالار ساحنالانىپ, ۇلتتىق يدەيا مەن رۋحاني بىرلىك تاقىرىبى تەرەڭ اشىلدى.
2025 جىل تەاتر ۇجىمى ءۇشىن كاسىبي تۇرعىدان دا ايرىقشا ماڭىزعا يە بولدى. بىرقاتار ارتىستەر ەل مادەنيەتىنىڭ دامۋىنا قوسقان ۇلەسى ءۇشىن «ەرەن ەڭبەگى ءۇشىن» مەملەكەتتىك ناگراداسىمەن ماراپاتتالدى. ال تەاتردىڭ باس بالەتمەيستەرى مەن جەتەكشى ءسوليسى الەمدىك بالەت ونەرىندەگى ەڭ بەدەلدى ماراپاتتاردىڭ ءبىرى سانالاتىن «Benois de la Danse 2025» حالىقارالىق سىيلىعىنىڭ نومينانتتارى اتانىپ, ۇجىمنىڭ شىعارماشىلىق الەۋەتىن حالىقارالىق دەڭگەيدە تانىتتى.
ونەرگە ادالدىق پەن بيىك تالعامدى تۋ ەتكەن «استانا بالەت» تەاترى الداعى ۋاقىتتا دا ۇلتتىق مادەنيەتتى جاڭاشا قىرىنان تانىتىپ, الەمدىك ساحنالاردا ەل ونەرىنىڭ ابىرويىن اسقاقتاتا بەرمەك.