جامبىل وبلىسىنىڭ اكىمى ەربول قاراشوكەەۆ توكيو قالاسىندا وتكەن سۋردليمپيادا ويىندارىنان ولجالى ورالعان ءوڭىر سپورتشىلارىمەن كەزدەستى, دەپ حابارلايدى Egemen.kz.
جاپونيا استاناسىندا جالاۋى جەلبىرەگەن الامانعا جامبىل وبلىسىنان 7 سپورت ءتۇرى بويىنشا 12 ساڭلاق قاتىسىپ, 1 التىن, 3 كۇمىس, 2 قولا جۇلدەمەن ورالعان بولاتىن. جەكەلەي جانە كوماندالىق جارىستاردا اۋليەاتالىق سپورتشىلار ەرەكشە كوزگە ءتۇستى. ەركىن كۇرەستەن عابيت ەسجانوۆ 57 كەلى سالماقتا كۇمىس مەدال جەڭىپ السا, 74 كەلى سالماقتا بەلدەسكەن عاسىر تۇرعىنباي قولا جۇلدەنى قانجىعاسىنا بايلادى.
دزيۋدو سپورتىنان دا ءوڭىر سپورتشىلارى جوعارى ناتيجە كورسەتتى. اننا كراموروۆا جەكەلەي سىندا قولا مەدال يەلەنسە, ايەلدەر اراسىنداعى كوماندالىق ەسەپتە كۇمىس جۇلدەگەر اتاندى. بۇل قۇرامدا ونەر كورسەتكەن فەريدە كارا وگلى دا كوماندالىق سىننىڭ كۇمىس مەدالىن جەڭىپ الدى. ال ەرلەر اراسىنداعى كوماندالىق جارىستا ايدوس تۇگەلباەۆ باستاعان قۇراما قارسىلاستارىنان وق بويى وزىپ, التىن مەدالعا قول جەتكىزدى.
كەزدەسۋ بارىسىندا ءسوز العان ءوڭىر باسشىسى ە. قاراشوكەەۆ ەل نامىسىن ابىرويمەن قورعاعان سايىپقىرانداردىڭ جەڭىستى جورىعى كەيىنگى تولقىن ءۇشىن ۇلگى-ونەگە ەكەنىن اتاپ ءوتتى.
سالتاناتتى باسقوسۋدا XXV جازعى سۋردليمپيادا ويىندارىنىڭ جەڭىمپاز-جۇلدەگەرلەرىنە تاراز قالاسىنان بەرىلەتىن 1, 2 جانە 3 بولمەلى پاتەرلەردىڭ سەرتيفيكاتى, بارلىق جارىسقا قاتىسۋشىلار مەن ولاردىڭ جاتتىقتىرۋشىلارىنا تۇركيا مەملەكەتىندە وتەتىن ساۋىقتىرۋ وقۋ-جاتتىعۋ جيىنىنا جولداما تابىستالدى.
تاراز