eLicense.kz پورتالىندا رۇقسات بەرۋ قۇجاتتارى مەن ليتسەنزيالاردىڭ مەرزىمى اياقتالۋعا جاقىنداعانىن الدىن الا ەسكەرتەتىن جاڭا SMS-حابارلاما قىزمەتى ىسكە قوسىلدى. جۇيە قۇجاتتىڭ قولدانىلۋ مەرزىمى بىتۋىنە 30 كۇن قالعاندا پايدالانۋشىعا اۆتوماتتى تۇردە حابارلاما جىبەرەدى, دەپ حابارلايدى Egemen.kz.
بۇعان دەيىن ازاماتتار مەن كاسىپكەرلەر قۇجاتتاردىڭ مەرزىمىن وزدەرى باقىلاپ وتىرۋعا ءماجبۇر بولاتىن. ال جاڭا سەرۆيس مەملەكەتتىك قىزمەتتەرمەن جۇمىس ىستەۋدىڭ تيىمدىلىگىن ارتتىرىپ, مەرزىمنىڭ ءوتىپ كەتۋىنەن تۋىندايتىن تاۋەكەلدەردى ازايتادى.
SMS-حابارلامالار قولدانىلۋ مەرزىمى بەلگىلەنگەن رۇقسات بەرۋ قۇجاتتارى مەن ليتسەنزيالارعا قاتىستى قىزمەتتەر ءۇشىن عانا قاراستىرىلعان. حابارلامالار ەلەكتروندىق ۇكىمەتتىڭ SMS-ءشليۋزى ارقىلى 1414 قىسقا نومىرىنەن رەسمي ەسكەرتۋ بولىپ جىبەرىلەدى.
حابارلاما ءوتىنىش بەرۋ كەزىندە كورسەتىلگەن تەلەفون نومىرىنە جولدانادى. ءنومىردىڭ دۇرىستىعى ءموبيلدى ازاماتتار بازاسىمەن (بمگ) الدىن الا تەكسەرىلەدى. وسى تەتىك ارقىلى پايدالانۋشىلار ءوز قۇجاتتارىن ۋاقىتىندا جاڭارتىپ, قىزمەتىنىڭ توقتاپ قالۋىنا جول بەرمەيدى.
سونىمەن قاتار پورتالدا رۇقسات بەرۋ قۇجاتتارىن پرواكتيۆتى فورماتتا قايتا راسىمدەۋ مۇمكىندىگى بار. بۇل ءراسىم پايدالانۋشىنىڭ جەكە دەرەكتەرى نەمەسە ۇيىم اتاۋى وزگەرگەن جاعدايدا اۆتوماتتى تۇردە, مەملەكەتتىك ورگانداردىڭ قاتىسۋىنسىز جۇزەگە اسىرىلادى. پرواكتيۆتى فورمات پەستيتسيدتەردى تىركەۋ, تۇقىم وندىرۋشىلەردى اتتەستاتتاۋ, ەكولوگيالىق رۇقساتتار بەرۋ جانە سەنىمدى باعدارلامالىق قامتاماسىز ەتۋ تىزىلىمىنە قاتىستى بىرقاتار مەملەكەتتىك قىزمەتتەرگە قولدانىلادى.
جاڭا قىزمەت جاساندى ينتەللەكت جانە تسيفرلىق دامۋ مينيسترلىگىنىڭ مەملەكەتتىك قىزمەتتەر كوميتەتى مەن «ۇلتتىق اقپاراتتىق تەحنولوگيالار» اق-نىڭ بىرلەسكەن جۇمىسىنىڭ ناتيجەسىندە ىسكە اسىرىلدى.