اباي قۇنانباي ۇلىنىڭ عاسىرلىق تويى قارساڭىندا «سوتسياليستىك قازاقستان» گازەتىنىڭ (قازىرگى «Egemen Qazaqstan») 1945 جىلى 15 تامىزداعى № 168 سانىنا حاكىمنىڭ فوتوسى جانە جاڭادان تابىلعان ءۇش ولەڭى جاريالانىپتى. بۇل فوتو باسىلىم بەتىندە تۇڭعىش جارىق كورگەن سۋرەتى ەكەن.
اباي حاكىمنىڭ تۋعانىنا 70 جىل (1915), 80 جىل (1925), 90 جىل (1935) تولعاندا جارىق كورگەن وتاندىق باسىلىمداردى شولىپ كوردىك. بۇلاردىڭ ەشقايسىندا فوتوسى جاريالانباعان.
1945 جىلى فاشيزم تالقاندالىپ, جەڭىسكە جەتتىك. كۇللى حالىق قۋاندى. وسى جىلى قازاق ۇكىمەتى تاريحتا تۇڭعىش رەت اباي تويىن, ياعني اقىننىڭ تۋعانىنا 100 جىل تولۋ مەرەكەسىن وتكىزدى.
اقىننىڭ وسى 100 جىلدىق تويىنان كەيىن دانا اقىنعا كوزقاراس تۇزەلىپ, حاكىمنىڭ فوتوسى مەن جاڭادان تابىلعان ءبىر توپ ولەڭى قك (ب) ورتالىق كوميتەتىنىڭ رەسمي ورگانى «سوتسياليستىك قازاقستان» گازەتىندە جاريالاندى.
بۇل سۋرەتتە دانانىڭ ويلى كەلبەتى بارىنشا ادەمى كورسەتىلگەن. باسىندا ويۋسىز قارا تاقيا, ۇستىندە قاۋسىرما ءوڭىرلى جاعاسىز شاپان. ەجەلگى سوپىلىق مۇريتتەردىڭ ادەبىنە ءتان وڭ قولىمەن شاپان ءوڭىرىن قۋسىرا ۇستاپ, ءتورت ساۋساعىن سىرتىنا, باس بارماعىن ىشىنە الىپ, سول قولىن تىزەسىنىڭ ۇستىنە قويىپتى.
جالپى ءبارىمىز بىلەمىز, ابايدىڭ ءدال وسىنداي جەكە تۇسكەن سۋرەتى جوق. بۇل فوتو 1896 جىلى ەكى ۇلىمەن بىرگە (اقىلباي جانە تۇراعۇل) سەمەيدە تۇسكەن سۋرەتىنەن الىنىپ وتىر. فوتوعا تارتقان – ن.گ.كۋزنەتسوۆ ەكەن. قۇندى جادىگەردى 1941 جىلى 6 ناۋرىز كۇنى مۇحتار اۋەزوۆ سەمەيدەگى اباي مۋزەيىنە تاپسىرعان.
بۇل تۋرالى مۇحتار ماعاۋين: «1896 جىل. اباي 51 جاستا. ارىلماس مۇڭ قالىپتى بايىپقا اينالىپ, سىرتتاعى قايعى ىشكە تۇسكەن كەز. وي مەن سىر, سەزىم مەن پاراسات جاراستىق تاپقان. ءوزىنىڭ ولمەسىن, ماڭگى جاسارىن ايقىن اڭداعان ءپاني تىرشىلىگى باقيمەن استاسقان ءسات», دەپ سۋرەتتەپتى.
سەمەيلىك جۋرناليست-زەرتتەۋشى داۋلەت سەيسەنوۆ «ەر قازاق» اتتى كىتابىندا: «قانداي ءبىر جۇمىستان سىرت قالماعان قايىم اعا اۋەزوۆتىڭ ۇسىنىسىمەن ابايدىڭ 100 جىلدىق مەرەيتويىن ازىرلەۋ جونىندەگى مەرەيتويلىق ۇكىمەت كوميسسياسىنىڭ عىلىمي حاتشىسى بولا ءجۇرىپ, ابايدىڭ بۇعان دەيىن ءمالىم ەمەس, توعىز ولەڭىن اينالىمعا قوستى. بۇل ولەڭدەردىڭ بىرنەشەۋى «اقىنىڭ جاريالانباعان ولەڭدەرى» دەگەن تاقىرىپپەن جانە اقىنىڭ فوتوسىمەن «سوتسياليستىك قازاقستان» گازەتىنىڭ 1945 جىلدىڭ 15 تامىز كۇنگى نومىرىندە جاريالاندى» دەپ جازادى.
ابايتانۋ مەن اقىندى ۇلىقتاۋ ىسىندە قايىم اعانىڭ سىڭىرگەن ەڭبەگى ۇشان-تەڭىز. اۆتور «تارتا كور, سەمەيىمنىڭ توپىراعى» اتتى ەڭبەگىنىڭ 5-بەتىندە: «ابايدىڭ بۇرىن بەلگىسىز بولىپ كەلگەن 9 ولەڭىن تاپتىم. ولار 1945 جىلى شىققان اباي شىعارمالارىنىڭ تولىق جيناعىنا ەندى» دەپ جازادى.