وسىدان ءبىراز جىل بۇرىن قازاقستانداعى شارۋا قوجالىقتارى, ءتۇرلى شارۋاشىلىقتار قاراپايىم عانا تراكتورعا اسا مۇقتاج بولدى دەپ بۇگىندە كىم ويلايدى؟ ەگىس القابىندا جۇمىس ىستەۋگە قاجەتتى ءبىر عانا تراكتوردى شەتەلدەن ساتىپ اكەلۋ ءۇشىن قوماقتى قاراجات كەرەك بولعاندىعى راس.
توعىز جىل بۇرىن وسى پروبلەما شەشىمىن تاپتى. سەمەيدە «بەلارۋس» ماركالى تراكتورلاردى شىعاراتىن قازاق-بەلارۋس ءوندىرىس ورنى ىسكە قوسىلدى. العاشقى كۇننەن باستاپ, تەمىر تۇلپارلاردى جاساۋعا زاۋىتتاعى شەبەر نۇرجان ەسباەۆ تا تارتىلدى. جاقىندا ول جانە ونىڭ ارىپتەستەرى 7 مىڭىنشى تراكتوردى جاساپ شىعاردى.
ون ساۋساعىنان ونەر تامعان نۇرجان ەسباەۆ سەمەي قالاسىندا تۋىپ-وسكەن. №37 مەكتەپ-گيمنازيانىڭ تۇلەگى. ول جاس كەزىنەن اتا-انا ءۇمىتىن اقتاپ, جاقسى وقىدى. بىلىكتى مامان يەسى اتاندى. قازاقستانداعى «قازاگرو» جۇيەسىنىڭ قولداۋىمەن «سەماز» ماشينا جاساۋ زاۋىتىندا «بەلارۋس» تراكتورىن جاساۋدىڭ شەبەرى اتاندى. نۇرجاننىڭ اكەسى بالالارىن ءاۆتوموبيلدىڭ ىشكى قۇرىلىمى, ماشينا جاساۋ سالاسىمەن تانىستىراتىن. ەكى ۇلىن ەرتىپ گاراجداعى كولىگىنىڭ انا جەرى, مىنا جەرىن شۇقىلاپ, قالاي جوندەۋدى ۇيرەتەتىن. ءسويتىپ ءجۇرىپ ولار كىلتتەردىڭ ءتۇرىن, تەتىكتەردى, ءتىپتى كولىكتى ايناداي عىپ جالتىراتىپ قويىپ, تازالاپ شىعۋدى دا ۇيرەندى.
سوندىقتان بولار, نۇرجان مەكتەپ بىتىرگەندە باسقا قاتارلاستارى سياقتى جوعارى وقۋ ورنىنا تۇسۋگە ۇمتىلماي, كولىك كوللەدجىنە قاراي بەت بۇردى. ونىڭ ۇستىنە ول تەحنيكا سالاسىن ءبىرشاما مەڭگەرىپ تە ۇلگەرگەن ەدى. اككۋمۋلياتورسىز, قوزعالتقىشسىز ءومىرىنىڭ ءبىر كۇنىن دە ەلەستەتە المايتىن بولدى. كولىك كوللەدجىن تامامداعانىنا جىل وتكەندە سەمەيدە جاڭادان اۆتوبۋس قۇرايتىن زاۋىت اشىلدى. جاس مامان بىردەن جۇمىسقا قابىلداندى. بىراق, باس كەزىندە قاراجات جەتىمسىز بولىپ, جۇمىسشىلار ءبىراز بوس ءجۇرىپ قالدى. ۋاقىتتى تەككە وتكىزبەۋ ءۇشىن نۇرجان سەمەيدەگى ۋنيۆەرسيتەتكە ماشينا قۇرىلىسى فاكۋلتەتىنە وقۋعا تۇسەدى. ءسويتىپ جۇرگەندە ول زاۋىتتا تراكتور جاسايتىن تسەح اشىلعاندىعىنان حاباردار بولدى.
ءسويتىپ, مىنە, توعىز جىل ىشىندە ول تراكتوردىڭ قىر-سىرىن تولىق مەڭگەردى. 2011 جىلى ديپلومىن العان سوڭ, ونى زاۋىتتا جوعارى ءبىلىمدى مامان رەتىندە تراكتور جاسايتىن جۇيەنىڭ شەبەرى جۇمىسىنا اۋىستىردى. بۇگىندە ونىڭ قاراماعىندا 40 قۇراستىرۋشى 15 پوست بويىنشا جۇمىس ىستەيدى. نۇرجان وسىندا جاسالىپ جاتقان ءار تراكتوردى بۇگە-شىگەسىنە دەيىن تەكسەرەدى. كۇن سايىن ولار 7 تراكتور جاسايدى. ايىنا 150-160 تراكتور شىعارىلادى. ال جىلىنا 1500 تراكتور قازاقستانداعى القاپتارعا اتتانادى. بۇلارعا ەلىمىز عانا ەمەس, رەسەي دە تاپسىرىس بەرەدى.
– جۇمىسىمدى ساپالى تۇردە اتقارعاندى جاقسى كورەمىن, – دەيدى نۇرجان شەبەر, – ەلىمىزدىڭ گۇلدەنۋىنە, ەكونوميكامىزدىڭ وركەندەۋىنە ۇلەس قوسۋدى زور مارتەبە سانايمىن. جانە جاستاردى وسى ماماندىقتى مەڭگەرۋگە شاقىرامىن.
راۋشان نۇعمانبەكوۆا,
جۋرناليست.
سەمەي.