بۇگىن قاسىم-جومارت توقاەۆ جامبىل وبلىسىنا ساپارى اياسىندا ءوڭىر جۇرتشىلىعىمەن كەزدەسىپ, باۋىرجان مومىش ۇلىنا «حالىق قاھارمانى» اتاعىن بەرۋ تۋرالى شەشىم قابىلداعانىن مالىمدەدى, دەپ جازادى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«كەشە باۋىرجان مومىش ۇلىنىڭ تۋعانىنا 115 جىل تولدى. داڭقتى قولباسشىنىڭ ناعىز ەرلىك جولى ەلىمىزبەن قاتار, شەتەلدەردە وتە تانىمال. حالقىمىز ونى قاھارمان تۇلعا رەتىندە قۇرمەت تۇتادى. بىراق ايگىلى باتىرعا رەسمي تۇردە «حالىق قاھارمانى» اتاعى بەرىلمەگەن. وبلىس جۇرتشىلىعى, زيالى قاۋىم وكىلدەرى, ءتىپتى, جاستارىمىز دا وسى ماسەلەنى كوتەرىپ جۇرگەنىن بىلەمىز. تاريحي ادىلدىكتى قالپىنا كەلتىرۋىمىز كەرەك. سوندىقتان مەن مەملەكەت باسشىسى رەتىندە باۋىرجان مومىش ۇلىنا «حالىق قاھارمانى» اتاعىن بەرۋ تۋرالى شەشىم قابىلدادىم. ءتيىستى جارلىققا بۇگىن قول قويدىم, بۇل قۇجات مىندەتتى تۇردە جاريالانادى.
باتىردىڭ ەسىمى ناعىز وتانشىلدىق پەن وشپەس ەرلىكتىڭ سيمۆولى رەتىندە ءاردايىم كوپكە ۇلگى-ونەگە بولۋعا ءتيىس. باۋكەڭنىڭ ەرلىگى جاي اڭىز ەمەس, بۇل – ناقتى قۇجاتتارمەن دالەلدەنگەن, ۇلى وتان سوعىسىنا قاتىسقان باتىرلار مويىنداعان ءسوزسىز ەرلىك. ەلگە ەرلىگىمەن تانىلعان, ەڭبەگى سىڭگەن ازاماتتارىن باعالاي بىلگەن جۇرت ەشقاشان ۇتىلمايدى», دەدى قاسىم-جومارت توقاەۆ.
ەسكە سالايىق, قارۋلى كۇشتەردىڭ اسكەري اۆياتسيالىق بازالارىندا قازاقتىڭ ۇلى پەرزەنتى, كەڭەس وداعىنىڭ باتىرى باۋىرجان مومىش ۇلىنىڭ تۋعانىنا 115 جىل تولۋىنا وراي اۋقىمدى وقۋ-جاتتىعۋ ۇشۋلارى ءوتتى.
قازىر ۇلتتىق ۇلان قاتارىندا باۋىرجان ەسىمدى 249 اسكەري قىزمەتشى وتان الدىنداعى بورىشىن وتەپ ءجۇر.