اكرا: قازاقستان ەكونوميكاسى ءوسىمدى ساقتايدى, بىراق جاڭا سىن-قاتەرلەرگە تاپ بولادى

مونەتارلىق ساياساتتىڭ جۇمسارۋ ىقتيمالدىعى بار

اكرا باعالاۋىنشا, الداعى جىلى قازاقستان ەكونوميكاسىنداعى مونەتارلىق جاعداي ازداپ جۇمسارۋى مۇمكىن. اڭگىمە – اقشا-نەسيە ساياساتىنىڭ قاتاڭدىعىن شامامەن 2 %-دىق تارماققا تومەندەتۋ تۋرالى بولىپ وتىر. بۇل ينفلياتسيانىڭ باياۋلاۋ الەۋەتىمەن جانە ەكونوميكالىق بەلسەندىلىكتىڭ قازىرگى دەڭگەيىن ساقتاۋىمەن بايلانىستى.

ۇلتتىق ۆاليۋتاعا جانە سىرتقى ساۋداعا قىسىم ساقتالادى

اكرا-نىڭ تاۋەلسىز جانە وڭىرلىك رەيتينگتەر توبىنىڭ ديرەكتورى جاننۇر اشىعاليدىڭ ايتۋىنشا, ناقتى ءتيىمدى ايىرباس باعامى ارقىلى تەڭگەگە قىسىم ساقتالادى جانە تاۋارلار مەن قىزمەتتەر يمپورتىنىڭ ءوسىمى ەكسپورتتان جوعارى بولۋى مۇمكىن.

سونىمەن بىرگە, سىرتقى ساۋدا وڭ سالدو ايماعىندا قالا بەرەدى, الايدا ونىڭ كولەمى 2025 جىلدىڭ قورىتىندىسىمەن سالىستىرعاندا شامامەن ۇشتەن بىرگە قىسقارۋى ىقتيمال. بۇل Brent ماركالى مۇنايدىڭ ورتاشا جىلدىق باعاسى باررەلىنە 65 دوللار دەڭگەيىندە بولادى دەگەن بازالىق ستسەناريگە نەگىزدەلگەن.

ەكونوميكالىق ءوسىم: ينفراقۇرىلىم مەن تسيفرلاندىرۋ ءرولى ارتادى

ساراپشىلار قازاقستان ەكونوميكاسىندا كولىك ينفراقۇرىلىمى مەن تسيفرلاندىرۋ جوبالارىنىڭ جالپى وسىمگە قوساتىن ۇلەسى ارتا تۇسەتىنىن ايتادى. دەگەنمەن نەگىزگى ءوسىم فاكتورلارى بۇرىنعىداي:

- تاۋ-كەن ونەركاسىبىندەگى بەلسەندىلىك,

- وڭدەۋشى سەكتوردىڭ دامۋى,

- اۋىل شارۋاشىلىعى,

- ساۋدا سالاسى,

- كولىك-لوگيستيكالىق ينفراقۇرىلىم جوبالارىنىڭ ىسكە اسۋى بولىپ قالا بەرەدى.

اكرا بولجامى بويىنشا, الداعى جىلى جالپى ىشكى ءونىمنىڭ ء(جىو) ناقتى ءوسىمى 5,5% دەڭگەيىندە بولادى. ال 2027-2028 جىلدارى بۇل كورسەتكىش 5,3% شاماسىندا تۇراقتالادى.

قارجى سەكتورى ءۇشىن باستى سىناق – ءارتاراپتاندىرۋ

قارجى سەكتورى ءۇشىن نەگىزگى سىن-قاتەرلەردىڭ ءبىرى ءارى مۇمكىندىگى – ەكونوميكانى ءارتاراپتاندىرۋ ۇدەرىسىنىڭ جالعاسۋى. بۇل ۇدەرىس – قارجى سەكتورى تاراپىنان ساپالى قولداۋدى, كورپوراتيۆتىك باسقارۋدى جەتىلدىرۋدى, ءىرى قارجى ويىنشىلارى ستراتەگيالارىنىڭ قايتا بەيىمدەلۋىن تالاپ ەتەدى.

جاننۇر اشىعالي اتاپ وتكەندەي, ەگەر بۇل تالاپتار ورىندالماسا, ەكونوميكانىڭ شامادان تىس مەملەكەتتەنۋى, مەملەكەتتىك جانە كۆازيمەملەكەتتىك سەكتوردىڭ قارىز جۇكتەمەسىنىڭ ءوسۋ قاۋپى ارتادى.

فينتەح پەن تسيفرلاندىرۋ – جاڭا مۇمكىندىكتەر

اكرا پەرسپەكتيۆالار قاتارى بويىنشا فينتەحتىڭ ساپالى دامۋىن, قارجىلىق قىزمەتتەردىڭ تسيفرلاندىرىلۋىن, حالىقتىڭ قارجى جۇيەسىنە تارتىلۋىن ارتتىرۋدى اتاپ ءوتتى.

بۇل ۇردىستەر مينوريتارلىق ينۆەستورلار كلاستەرىن نىعايتىپ, قارجى نارىعىنىڭ ينكليۋزيۆتىلىگىن كۇشەيتەدى. سونىمەن قاتار, ساراپشىلار تولەم قابىلەتتىلىگىن باعالاۋ ستاندارتتارى مەن كرەديتتىك تاۋەكەلدەردىڭ شوعىرلانۋىنا ەرەكشە نازار اۋدارۋ قاجەت ەكەنىن ەسكەرتەدى. بۇل باعىتتا وڭ وزگەرىستەر 2025 جىلدىڭ كۇزىنەن باستاپ بايقالا باستاعان.