بۇگىن كەڭەس وداعىنىڭ باتىرى, اتى اڭىزعا اينالعان قولباسشى باۋىرجان مومىش ۇلىنىڭ تۋعانىنا 115 جىل تولدى. وسىعان وراي EXPO قالاشىعىنداعى Alem.ai كۇمبەزى استىندا مەملەكەتتىك كۇزەت قىزمەتىنىڭ پرەزيدەنتتىك وركەسترى مەن سالتاناتتى بولىمشە پلاتس-كونتسەرت وتكىزدى, دەپ حابارلايدى Egemen.kz.
كونتسەرتتىك باعدارلاماعا پرەزيدەنتتىك وركەستر سوليستەرى ەركەبۇلان سارسەنبەكوۆ پەن باۋرجان نۇرمۇحانوۆ ورىنداعان «ەلىم دەپ سوقسىن جۇرەگىڭ», «ابىروي» توبىنىڭ «رۋح», يبراگيم ەسكەندىردىڭ ورىنداۋىنداعى «ساۋىت» سەكىلدى تانىمال پاتريوتتىق اندەر ەندى. سالتاناتتى شارادا پرەزيدەنتتىك پولكتىڭ «ايبىن» سالتاناتتى بولىمشەسى مەن «ساردار», «كوكجال» ارنايى بولىمشەلەرىنىڭ كوز تارتارلىق كورسەتىلىمدەرى قويىلدى.
مەملەكەتتىك كۇزەت قىزمەتى ەرەكشە ماقساتتاعى كۇشتەر شتابىنىڭ قىزمەتكەرى, پولكوۆنيك مەدەت ەلەمەسوۆتىڭ ايتۋىنشا, قازاق حالقىنىڭ ءبىرتۋار ۇلىنىڭ بەينەسى سگو-نىڭ جەكەلەگەن باعىتتارىنىڭ سيمۆوليكاسىندا كورىنىس تاپقان. سونداي-اق باۋىرجان مومىش ۇلىنىڭ اسكەري ءىس جونىندەگى ەڭبەكتەرى مەن جاۋىنگەرلىك تاجىريبەسى تەرەڭ زەرتتەلىپ جاتىر.
ء«بىزدىڭ جەكە قۇرام سوعىس جىلدارىندا دارىندى قولباسشى, تاكتيك جانە ستراتەگ رەتىندە تانىلعان قايسار تۇلعانى قاستەرلەپ, ونىڭ جارقىن بەينەسىن ەسىندە ساقتايدى. باۋىرجان مومىش ۇلىنىڭ ەرلىگى, باتىرلىعى, وتانعا ادالدىعى تۋرالى جاستار ءبىلۋى ماڭىزدى», دەدى مەدەت ەلەمەسوۆ.
پرەزيدەنت وركەسترىنىڭ باستىعى, پودپولكوۆنيك دارحان راحيمعاليەۆ پەرفورمانستىڭ يدەياسى – اڭىزعا اينالعان قولباسشىعا ءتىرى ارناۋ ەكەنىن اتاپ ءوتتى.
«ەلىمىزدىڭ وتكەنى مەن بولاشاعى ءبىر بىرىمەن تىعىز بايلانىستى. بۇگىنگى كونتسەرت باتىردىڭ جارقىن بەينەسى جاس ۇرپاقتىڭ ەسىندە ساقتالىپ, ەرەن ەرلىگى ەل قورعاعان ءاربىر ازاماتتىڭ بويىنان كورىنىس تاباتىنىن كورسەتتى», دەدى دارحان راحيمعاليەۆ.
پلاتس-كونتسەرتتىڭ سوڭىندا مەملەكەتتىك تۋ سالتاناتتى تۇردە اكەلىنىپ, پرەزيدەنت وركەسترى سوليستەرىنىڭ ورىنداۋىنداعى «كوك اسپان» اتتى پاتريوتتىق ءانى ورىندالدى.