باس پروكۋراتۋرا, ينتەرپولدىڭ ۇلتتىق ورتالىق بيۋروسىنىڭ قىزمەتكەرلەرى مەن ەلىمىزدىڭ سىرتقى ىستەر مينيسترلىگى ادام اعزالارىن ساتقانى ءۇشىن ىزدەۋدە جۇرگەن ۋكراينا ازاماتىن پولشادا قولعا ءتۇسىردى. كۇدىكتى قازاقستان اۋماعىندا دا ادام اعزاسىن ساۋداعا سالۋ تۋرالى مامىلەلەر جاساسقان, دەپ جازادى Egemen.kz.
قازىر كۇدىكتى ەلگە جەتكىزىلىپ, ۋاقىتشا ۇستاۋ يزولياتورىنا قامالعان.
ول 2017-2018 جىلدار ارالىعىندا ترانسۇلتتىق ۇيىمداسقان قىلمىستىق توپتىڭ مۇشەسى بولا وتىرىپ, ادام اعزالارىن زاڭسىز الىپ-ساتۋمەن اينالىسقان دەگەن كۇدىككە ءىلىنىپ وتىر.
ۋكراينا ازاماتى قىلمىستىق توپ قۇرامىندا دونورلار مەن رەتسيپيەنتتەر ىزدەۋ جانە ولاردىڭ اراسىندا كەزدەسۋ ۇيىمداستىرۋ, ورگانداردى الىپ-ساتۋ, ترانسپلانتاتسيالاۋ وپەراتسيالارىن قۇپيا ۇستاۋ سىندى قىزمەتتەردى جۇزەگە اسىرعان.
ايىپتالۋشى قازاقستان مەن باسقا ەلدەردىڭ اۋماعىندا تىرى ادامداردىڭ ورگاندارىن ساۋداعا سالعان 56 زاڭسىز مامىلە جاساعان.
قىلمىسى اشكەرە بولعان سوڭ كۇدىكتى 5 جىل بويى قىلمىستىق قۋدالاۋ ورگاندارىنان جاسىرىنىپ, بوي تاسالاعان.
وسى جىلدىڭ ناۋرىز ايىندا ول پولشا شەكاراسىن كەسىپ وتپەك بولعان كەزدە ۇستالىپ, قازاقستان باس پروكۋراتۋراسىنىڭ سۇراۋى بويىنشا ەلىمىزگە ەكستراديتسيالانعان.
اتالعان قىلمىستى جاساعانى ءۇشىن مۇلكى تاركىلەنىپ, سەگىز جىلدان ون ەكى جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعان.
ايتا كەتەيىك, بۇعان دەيىن وسى قىلمىستىق ۇيىمنىڭ 2 مۇشەسى تۇركيا مەن رەسەيدەن قايتارىلعان بولاتىن.