بۇگىن ۇكىمەت وتىرىسىندا پرەمەر-مينيستر ولجاس بەكتەنوۆ وڭدەۋشى سەكتورلاردىڭ جالپى ىشكى ونىمدەگى ۇلەسىن ودان ءارى ۇلعايتۋ ءۇشىن كاسىپورىنداردىڭ وندىرىستىك قۋاتىن ارتتىرۋدى تاپسىردى. ال ولاردى جاڭعىرتۋدى شاعىن جانە ورتا بيزنەس وندىرىستەرىن قايتا جابدىقتاۋ ەسەبىنەن ىنتالاندىرۋ كەرەك, دەپ جازادى Egemen.kz.
«ونەركاسىپ مينيسترلىگىنە كەلەسى جىلدىڭ قاڭتار ايىنان باستاپ وڭدەۋ ونەركاسىبىندە وندىرىستىك قۋاتتى جاڭعىرتۋ ءۇشىن ليزينگتىك قارجىلاندىرۋدى ىسكە قوسۋدى تاپسىرامىن. ميكرو جانە شاعىن بيزنەس وكىلدەرى قوسىمشا كەپىلدىكسىز 300 ميلليون تەڭگەگە دەيىن ءوز وندىرىستەرىن جاڭعىرتۋ مۇمكىندىگىنە يە بولادى. ءوندىرىستى قايتا جابدىقتاۋ كاسىپورىنداردىڭ ونىمدىلىگىن ۇلعايتىپ, باسەكەگە قابىلەتتىلىگىن ارتتىرۋعا ىقپال ەتەدى», دەدى ولجاس بەكتەنوۆ.
ۇكىمەت ۇلتتىق بانكپەن بىرلەسىپ, شاعىن بيزنەس ءۇشىن سالىق ەسەپتىلىگىن اۆتوماتتى تۇردە تولتىرۋدى قامتاماسىز ەتەدى.
ولجاس بەكتەنوۆ وسى باعىتتا ءتيىستى ءتۇسىندىرۋ جۇمىستارىن جۇرگىزە وتىرىپ, سالىقتىق اكىمشىلەندىرۋدىڭ سەرۆيستىك مودەلىن ەنگىزۋدىڭ ماڭىزدىلىعىنا توقتالدى.
«بيزنەستى وڭايلاتىلعان دەكلاراتسيا رەجيمىن قولداناتىن جەتكىزۋشىلەرمەن جۇمىس كەزىندە شىعىستاردى شەگەرۋگە تىيىم سالۋ ماسەلەسى الاڭداتىپ وتىر. بۇل شامامەن 400 مىڭ شاعىن جانە ميكروبيزنەس وكىلىنىڭ مۇددەسىنە قاتىسى بار. اتالعان ساناتتاعى كاسىپكەرلەر ءوز كاسىبىنىڭ بولاشاعىنا الاڭداماۋى ءتيىس. قارجى مينيسترلىگى سالىقتىق اكىمشىلەندىرۋدىڭ سەرۆيستىك مودەلىن ەنگىزىپ, ءتيىستى ءتۇسىندىرۋ جۇمىستارىن جۇرگىزۋ ارقىلى ولاردى قولداپ وتىرۋى قاجەت. سونىمەن قاتار ۇلتتىق بانكپەن بىرلەسىپ, شاعىن بيزنەس ءۇشىن سالىق ەسەپتىلىگىن اۆتوماتتى تۇردە تولتىرۋدى جەدەل تۇردە قامتاماسىز ەتسىن», دەدى ولجاس بەكتەنوۆ.
ەسكە سالايىق, بۇگىن پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا «ىسكەر ايماق» شاعىن بيزنەستى قولداۋدىڭ بىرىڭعاي باعدارلاماسى قارالدى. باعدارلاما وڭىرلەردە, اسىرەسە اۋىلدىق جەرلەردە جانە شاعىن قالالاردا بيزنەس قاجەتتىلىكتەرىن دەر كەزىندە وتەۋگە باعىتتالعان.
ەلىمىزدە كاسىپكەرلەرگە ارنالعان «حالىق بۋحگالتەرى» اكتسياسى باستالادى.