قاراعاندى. 11 تامىز. قاراعاندى قالاسىنداعى مايقۇدىق شاعىن اۋدانىنىڭ تاپانشامەن قارۋلانعان تۇرعىنى كوشە ءتارتىبىن قاداعالاپ جۇرگەن ۇلتتىق ۇلاننىڭ ساربازدارىنا شابۋىل جاساعان. بۇل تۋرالى وبلىستىق ىشكى ىستەر دەپارتامەنتىنىڭ ءباسپاسوز قىزمەتى حابارلادى. مايقۇدىقتاعى اۋلالاردىڭ بىرىندە اراق ءىشىپ وتىرعان 20 جاسار ازامات ۇلتتىق ۇلاننىڭ ساربازدارىن كورە سالىپ, وقيعا ورنىنان قاشىپ كەتپەك بولعان. ءتارتىپ ساقشىلارى ونى قۋىپ جەتكەن كەزدە, بۇزاقى قوينىنان تاپانشاسىن سۋىرىپ الىپ, وق اتۋعا ارەكەتتەنەدى. شاپشاڭ قيمىلداعان ساربازدار وعان قارسى جەكپە-جەك ءادىسىن قولدانىپ, قولىنا كىسەن سالعان. تەكسەرۋ بارىسىندا كۇدىكتىنىڭ قولدورباسىنان وزىندىك ءيسى بار وسىمدىك زاتى, ەكى پىشاق, ارا جانە وق سالىنعان قوراپشا تابىلدى. ءتارتىپ بۇزۋشىنى قولعا ءتۇسىرۋ كەزىندە ەشكىم زيان شەكپەدى. قايرات ءابىلدينوۆ. دەرەك: قاراعاندى وبلىستىق ىشكى ىستەر دەپارتامەنتىنىڭ ءباسپاسوز قىزمەتى. سۋرەت: nur.kz.
قاراعاندىدا ۇلتتىق ۇلاننىڭ ساربازدارىنا شابۋىل جاسالدى
211 رەت
كورسەتىلدى