ەندى تاۋەلسىزدىك جىلدارىندا بەرىلگەن ديپلومداردىڭ تۇپنۇسقاسىن تەكسەرۋگە بولادى. بۇل نەگە ماڭىزدى؟ كەيىنگى كەزدە جالعان قۇجات ماسەلەسى كۇن تارتىبىنەن تۇسپەي تۇر. كۇنى كەشە عىلىم جانە جوعارى ءبىلىم مينيسترلىگى بۇگىندە 46 جالعان ديپلوم جاساۋمەن اينالىسقان 20 ينتەرنەت-رەسۋرس انىقتالعانىن, ماتەريالدار ىشكى ىستەر مينيسترلىگى مەن مادەنيەت جانە اقپارات مينيسترلىگىنە جولدانعانىن حابارلادى.
قازىر ينتەرنەت كەڭىستىگىندە جالعان ديپلومدار تۋرالى ءتۇرلى اقپارات كەڭىنەن تارالىپ جاتىر. زاڭسىز قۇجات اينالىمىنىڭ الدىن الۋ ماقساتىندا عىلىم جانە جوعارى ءبىلىم مينيسترلىگى 1991 جىلدان بەرى بەرىلگەن ديپلومداردىڭ دەرەكتەر بازاسىن قۇردى. وسى رەتتە مينيسترلىك ءبىلىم تۋرالى قۇجاتتاردىڭ وزىندىك ۇلگىسىنىڭ مازمۇنىنا قويىلاتىن نەگىزگى تالاپتاردى, سونداي-اق جوعارى وقۋ ورىندارى تۇلەكتەرىنە ارنالعان وسىنداي قۇجاتتاردىڭ سەريالارىن بەكىتتى. ديپلومدار ارنايى مودۋل ارقىلى بىرەگەي نومىرلەر مەن QR-كودتار بەرۋ جولىمەن جاسالادى. جۇيەگە قول جەتكىزۋ قۇقىعى وسى مودۋلدە تىركەلگەن, رەسمي تۇردە جاۋاپتى ۋنيۆەرسيتەت قىزمەتكەرلەرىنە عانا بەرىلەدى.
ديپلومداردى گەنەراتسيالاۋ «جوعارى ءبىلىم بەرۋدىڭ بىرىڭعاي پلاتفورماسى» (جببپ) اقپاراتتىق جۇيەسىندەگى ءبىلىم الۋشىلار تۋرالى دەرەكتەر نەگىزىندە جۇزەگە اسىرىلادى. ەگەر ءبىلىم الۋشى تۋرالى اقپارات جببپ-دا بولماسا, ديپلوم ءنومىرىن قالىپتاستىرۋ مۇمكىن ەمەس. وزىندىك ۇلگىدەگى ءبىلىم تۋرالى قۇجاتتاردا گەنەراتسيالانعان بىرەگەي ءنومىر مەن QR-كود بولماعان جاعدايدا مۇنداي قۇجاتتار جارامسىز دەپ تانىلادى.
سونىمەن قاتار مادەنيەت جانە اقپارات مينيسترلىگى مەن ىشكى ىستەر مينيسترلىگى جالعان ديپلومداردى دايىنداۋ جانە ساتۋ فاكتىلەرىن تۇراقتى تۇردە باقىلاپ, توقتاتىپ وتىرادى. قىلمىستىق كودەكستىڭ 385-بابىنا سايكەس جالعان قۇجاتتاردى جاساۋ نەمەسە قولدانۋ ايىپپۇل سالۋعا, تۇزەۋ جۇمىستارىنا نەمەسە ەكى جىلعا دەيىن باس بوستاندىعىن شەكتەۋ ياكي ايىرۋعا اكەپ سوعادى.
وسىعان وراي جوعارى وقۋ ورىندارى دەرەكتەردى تسيفرلاندىرۋ جۇمىسىن جالعاستىرادى, ال جۇمىس بەرۋشىلەر ديپلومنىڭ تۇپنۇسقالىعىن https://epvo.kz سەرۆيسى ارقىلى تەكسەرە الادى. ديپلومنىڭ ەلەكتروندى نۇسقاسى ەلەكتروندى ۇكىمەتتىڭ («تسيفرلىق قۇجاتتار») ءموبيلدى قوسىمشاسىندا دا قولجەتىمدى.