ەلوردا تورىندە جىرشى كۇنسۇلۋ تۇرىكپەننىڭ «الداسپان» اتتى شىعارماشىلىق كەشى ءوتتى. روزا باعلانوۆا اتىنداعى «قازاقكونتسەرت» زالىندا قازاقتىڭ قاسيەتتى قارا دومبىراسىنىڭ ءۇنى كۇمبىرلەپ, تەرمەلەر مەن تولعاۋلار شىرقالدى, دەپ حابارلايدى Egemen.kz.
اتاپ ايتقاندا, كەتە ءجۇسىپ, تۇرماعامبەت ىزتىلەۋ ۇلى, اقتامبەردى, قازتۋعان, شال اقىن مەن بۇحار جىراۋدىڭ شىعارمالارى كورەرمەنگە رۋحاني ازىق سىيلادى. اۋەزدى كەشكە «حالىق قازىناسى» ۇلتتىق ونەر ورتالىعىنىڭ سوليستەرى ەربولات شالدىبەكوۆ, ماقسات مەدەۋبەك, ءاليحان دۇيسەنباي جانە «استانا سازى» قازاق مەملەكەتتىك فولكلورلىق ءانسامبلى قاتىستى.
«ەلگە كەشەگى اتالارىمىزدان قالعان اماناتتى جەتكىزۋ ءۇشىن وسىنداي ۇلكەن اۋقىمدى ءىس-شارالاردى ۇيىمداستىرىپ تۇرامىز. بۇل كەشتى «الداسپان» دەپ اتادىق. قازاق دالاسىندا ءومىر ءسۇرىپ, قازاقتىڭ رۋحانياتىنا ولشەۋسىز ۇلەس قوسقان جىراۋ بابالارىمىزدىڭ بارلىعىنىڭ جىر مۇراسى وسى كەشتە قامتىلدى. باعدارلامانى ءبىز سولاي قۇردىق», دەدى «قازاقكونتسەرت» مەملەكەتتىك اكادەميالىق كونتسەرتتىك ۇيىمىنىڭ كوركەمدىك جەتەكشىسى ەرلان رىسقالي.