قازاقستاندىق TrustMe IT-كومپانياسى Stanford University جانىندا جۇمىس ىستەيتىن الەمدەگى ەڭ جابىق ءارى سەلەكتيۆتى اكسەلەراتورلاردىڭ ءبىرى - StartX باعدارلاماسىنا قابىلداندى. بۇل تۋرالى TrustMe كومپانياسىنىڭ نەگىزىن قالاۋشى شىڭعىس داۋلەتباەۆ الەۋمەتتىك جەلىدەگى پاراقشاسىندا حابارلادى.
قازاقستاندىق ستارتاپ ەكوجۇيەسى ءۇشىن بۇل - سيرەك كەزدەسەتىن ءارى ماڭىزدى وقيعا. StartX اسا قاتاڭ ىرىكتەۋىمەن تانىمال جانە نەگىزىنەن Stanford تۇلەكتەرىمەن نەمەسە شەكتەۋلى رەسمي سەرىكتەستەر ارقىلى عانا جۇمىس ىستەيدى.
StartX - كوممەرتسيالىق ەمەس اكسەلەراتور. ول كومپانيالارعا ەمەس, تىكەلەي فاۋندەرلەرگە باعىتتالعان. باعدارلاما اياسىنداعى جۇمىس جابىق فاۋندەرلىك توپتاردا (Neighborhoods) جۇرگىزىلەدى, مۇندا بيزنەستىڭ ءوسۋى, ستراتەگيالىق شەشىمدەر قابىلداۋ, ينۆەستيتسيا تارتۋ جانە باسقارۋشىلىق قاتەلىكتەر تالقىلانادى. قاتىسۋشىلاردىڭ باسىم بولىگى - Stanford ۋنيۆەرسيتەتىنىڭ ستۋدەنتتەرى مەن تۇلەكتەرى.
TrustMe كوپساتىلى ىرىكتەۋدىڭ بارلىق كەزەڭىنەن ءوتىپ, باعدارلاماعا قاتىسۋعا رەسمي وففەر الدى. ءوتىنىم بەرۋ بارىسىندا كومپانيا StartX-ءتىڭ قازاقستانداعى رەسمي سەرىكتەسى - Astana Business Campus ۇيىمىمەن دە ءوزارا جۇمىس جۇرگىزگەن.
TrustMe-ءدىڭ StartX-كە قابىلدانۋى كومپانيانىڭ اقش نارىعىنا بەلسەندى شىعۋ كەزەڭىمەن تۇسپا-تۇس كەلدى. قازىرگى ۋاقىتتا TrustMe نەگىزىن قالاۋشى شىڭعىس داۋلەتباەۆ اقش-تا ءجۇر, كوماندا امەريكالىق تەحنولوگيالىق ەكوجۇيەگە ينتەگراتسيالانۋ مەن نارىقتاعى قاتىسۋدى كۇشەيتۋ باعىتىندا جۇمىس اتقارىپ جاتىر.
«TrustMe-ءدىڭ اقش نارىعىنا شىعۋىنا بايلانىستى سوڭعى ەكى ايدان بەرى وسىندامىن جانە وتباسىمدى دا وزىممەن بىرگە كوشىرۋدى جوسپارلاپ وتىرمىن. بۇل - سانالى ءارى وڭاي قابىلدانباعان شەشىم. StartX باعدارلاماسىنىڭ تايمينگى اقش-تا كەڭسە اشۋ جوسپارىمىزبەن تولىق سايكەس كەلدى», - دەپ جازدى شىڭعىس داۋلەتباەۆ الەۋمەتتىك جەلىدەگى جازباسىندا.
سونداي-اق جازبادا كومپانيانىڭ Techstars اكسەلەراتورىنا قاتىسۋدان سانالى تۇردە باس تارتقانى اتاپ وتىلگەن. تاڭداۋ StartX-ءتىڭ جابىق فاۋندەرلىك ورتاسى مەن Stanford ەكوجۇيەسىنە تىكەلەي قول جەتكىزۋ مۇمكىندىگىنە بايلانىستى جاسالعان.