2025 جىلدىڭ باسىنان بەرى قايتارىلعان اكتيۆتەردى باسقارۋ كومپانياسى (قابك) 155 نىساندى ساتىپ, بيۋدجەتكە 38,4 ميلليارد تەڭگە قۇيدى. ساتىلعان لوتتاردىڭ ىشىندە استانانىڭ ءزاۋلىم قوناق ءۇيى مەن شەتەلدەگى ۆيللالار ەڭ قىمبات مامىلەلەر رەتىندە تىركەلدى, دەپ حابارلايدى Egemen.kz.
قايتارىلعان اكتيۆتەردى باسقارۋ كومپانياسىنىڭ (قابك) ءباسپاسوز قىزمەتى بيىلعى جۇمىستىڭ ەگجەي-تەگجەيلى ەسەبىن جاريالادى. كومپانيا قۇرىلعان ساتتەن باستاپ ونىڭ يەلىگىنە جالپى قۇنى 96,5 ميلليارد تەڭگە بولاتىن اكتيۆتەر بەرىلگەن بولاتىن.
بيىل كومپانيا اۋقىمدى جۇمىس اتقارىپ, 577 ەلەكتروندى ساۋدا-ساتتىق ۇيىمداستىردى. ناتيجەسىندە 155 اكتيۆ ءساتتى ساتىلىپ, تۇسكەن جالپى سوما (ققس-سىز) 38,4 ميلليارد تەڭگەنى قۇرادى.
ساۋدانىڭ ەڭ ءىرى نىساندارى:
استانا قالاسىندا ورنالاسقان «دۋمان» قوناق ءۇي كەشەنى – 14,1 ميلليارد تەڭگەگە; دۋباي قالاسىنداعى (باا) ەكى ءزاۋلىم ۆيللا – 20,7 ميلليارد تەڭگەگە ساتىلدى.تەك ساتىلىم عانا ەمەس, سونىمەن قاتار قۇنى 29,4 ميلليارد تەڭگە بولاتىن 33 اكتيۆ تىكەلەي مەملەكەت مەنشىگىنە وتكىزىلدى. ولاردىڭ قاتارىندا جەر ۋچاسكەلەرى عانا ەمەس, تاريحي ماڭىزى بار جادىگەرلەر – ارحەولوگيالىق ارتەفاكتىلەر مەن كونە مونەتالار دا بار. بۇل قۇندى قازىنالار قازاقستاننىڭ ۇلتتىق مۋزەيىنە ساقتاۋعا بەرىلدى.
بۇگىنگى تاڭدا ارنايى مەملەكەتتىك قورعا 38,3 ميلليارد تەڭگە اۋدارىلدى. بۇل سوماعا اكتيۆتەردى ساتۋدان تۇسكەن تابىستار مەن وزگە دە تۇسىمدەر كىرەدى.