پەتروپاۆل قالاسىندا قۇتقارۋشىلار 30 گرادۋسقا دەيىن جەتكەن ايازدا ءىرى كاسىپورىندا شىققان ءورتتى ءسوندىردى, دەپ حابارلايدى توتەنشە جاعدايلار مينيسترلىگىنىڭ ءباسپاسوز قىزمەتى.
ۆەدومستۆو مالىمەتىنشە, «ماسلودەل» جشس-ءنىڭ استىق كەپتىرگىش قوندىرعىسىندا كۇنباعىس داندەرى تۇتانىپ, ءورت سوندىرۋشىلەر كەلگەن كەزدە نىسان اشىق جالىنمەن جانىپ جاتقان.
مينيسترلىكتىڭ حابارلاۋىنشا, قاتتى ايازعا قاراماستان, تجم ءورت ءسوندىرۋ بولىمشەلەرى ءورتتى ءسوندىرۋ كەزىندە جوعارى كاسىبيلىك پەن ۇيلەسىمدى ارەكەتتى كورسەتتى. العاشقى مينۋتتاردان باستاپ جاقىن ماڭداعى ءورت ءسوندىرۋ سۋ كوزدەرىنەن ۇزدىكسىز سۋ بەرۋ ۇيىمداستىرىلىپ, بارلىق ءورت-تەحنيكالىق جابدىقتار تۇراقتى تۇردە جىلىتىلىپ قولدانىلعان. ءورت سوندىرۋشىلەر اۋىر جاعدايدا جۇمىس ىستەدى.
جەكە قۇرام ءۇشىن قوسىمشا اۋىستىراتىن جاۋىنگەرلىك كيىم جەتكىزىلىپ, ءورتتى سوندىرۋگە قاتىسۋشىلاردى جىلىتۋعا ارنالعان ارنايى كولىك ۇيىمداستىرىلعان.
ءورتتى سوندىرۋگە 47 قۇتقارۋشى مەن 12 تەحنيكا جۇمىلدىرىلدى. وقيعا ورنىندا جارىقتاندىرۋ, تۇراقتى بايلانىس جانە كۇشتەردى باسقارۋ قامتاماسىز ەتىلدى. جەدەل ءارى ناقتى ارەكەتتەردىڭ ارقاسىندا ءورت قىسقا مەرزىمدە تولىقتاي ءسوندىرىلدى.