قاسىم-جومارت توقاەۆ توكيو قالاسىنداعى بىرىككەن ۇلتتار ۇيىمى ۋنيۆەرسيتەتىنە بارىپ, «دۇربەلەڭگە تولى داۋىردەگى ستراتەگيالىق سەنىمدى قالپىنا كەلتىرۋ: ادىلەتتى ءارى تۇراقتى الەم قۇرۋ جولىنداعى قازاقستاننىڭ ۇستانىمى» تاقىرىبىندا ءدارىس وقىدى, دەپ جازادى Egemen.kz.
مەملەكەت باسشىسى گەوساياسي تۇرعىدان جىككە ءبولىنۋدىڭ كۇشەيۋى مەن ءىرى دەرجاۆالار اراسىنداعى سەنىمنىڭ تومەندەۋى سالدارىنان بۇۇ مۇمكىندىكتەرى بارعان سايىن شەكتەلە تۇسكەنىنە نازار اۋداردى.
سول سەبەپتى ۇيىمدى جان-جاقتى رەفورمالاۋ جاي اڭگىمە كۇيىندە قالماي, ورتاق باسىمدىققا جانە ستراتەگيالىق قاجەتتىلىككە اينالۋعا ءتيىس.
«كەز كەلگەن ماڭىزدى رەفورما بۇۇ جارعىسىنا ساي ىسكە اسىرىلۋى كەرەك. ەگەمەندىك, اۋماقتىق تۇتاستىق جانە داۋ-دامايدى بەيبىت جولمەن رەتتەۋ سەكىلدى نەگىزگى قاعيداتتار مۇلتىكسىز ساقتالۋعا ءتيىس, ەشكىمگە ارتىقشىلىق بەرىلمەۋى قاجەت. سونىمەن بىرگە جارعىنىڭ كەيبىر ەرەجەلەرى ءححى عاسىردىڭ تالاپتارىنا سايكەس كەلمەيدى. سونىڭ ىشىندە ۇيىمعا ايتارلىقتاي قولداۋ كورسەتىپ كەلە جاتقان جاپونياعا جانە باسقا دا ەلدەرگە قاتىستى ادىلەتسىزدىك بار. الەم وزگەردى, ال جارعى وسى وزگەرىستەردىڭ سوڭىنان ىلەسە الماي وتىر. جاۋاپتى ديالوگقا كوشىپ, كەلەشەكتە قۇجاتتىڭ سەنىمدىلىگى مەن وزەكتىلىگىن قامتاماسىز ەتۋدىڭ ۋاقىتى كەلدى دەپ سانايمىن», دەدى قاسىم-جومارت توقاەۆ. مەملەكەت باسشىسى قاۋىپسىزدىك كەڭەسىن رەفورمالاۋ كەيىنگە ىسىرۋعا بولمايتىن وتە ماڭىزدى مىندەت ەكەنىنە دە توقتالدى. پرەزيدەنت اتالعان ورگان قىزمەتىنە ورتا دەرجاۆالاردى, ازيا, افريكا جانە لاتىن امەريكاسى ەلدەرىن كەڭىنەن قاتىستىرۋعا شاقىردى. «قاۋىپسىزدىك كەڭەسىندە جاۋاپتى ورتا دەرجاۆالاردىڭ ءۇنى انىق ەستىلۋگە ءتيىس. ولار ءىرى ويىنشىلار اراسىندا قايشىلىقتار بولعان جاعدايدا ارااعايىندىق جاساپ, شەشىمدەردى ىلگەرىلەتۋگە سەپتىگىن تيگىزە الادى. قازاقستان سىرتقى ساياساتتاعى ميسسياسىن وسى باعىتپەن بايلانىستىرادى. ءبىز بەرىك ۇستانىمعا نەگىزدەلگەن تەڭگەرىمدى, سىندارلى, كوپۆەكتورلى ديپلوماتيا جۇرگىزەمىز. بۇل ءبىزدىڭ ۇلتتىق مۇددەمىزگە ساي كەلەدى ءارى ۇدايى بۇۇ جارعىسىنا سۇيەنەتىن دامۋشى ورتا دەرجاۆا رەتىندەگى بولمىسىمىزدى كورسەتەدى», دەدى پرەزيدەنت. قاسىم-جومارت توقاەۆ ورايلى ءساتتى پايدالانىپ, ەلدەرىمىز اراسىنداعى بايلانىستى جولعا قويۋعا زور ۇلەس قوسقان جاپونيانىڭ بۇرىنعى سىرتقى ىستەر ءمينيسترى يوريكو كاۆاگۋچي حانىمعا ريزاشىلىعىن ءبىلدىردى. پرەزيدەنت ونىڭ «ورتالىق ازيا جانە جاپونيا» سامميتىنە باستاماشى بولعانىن ەسكە سالدى.