6 شىلدە وسلودا (نورۆەگيا) اشىلعان ەقىۇ پارلامەنتتىك اسسامبلەياسىنىڭ جىل سايىنعى 19 سەسسياسىندا قازاقستاننىڭ ەقىۇ-داعى توراعالىق ەتۋىنە جوعارى باعا بەرىلدى, دەپ حابارلادى قازاقستان پارلامەنتى سەناتىنىڭ ءباسپاسوز قىزمەتى.
اشىلۋ سالتاناتىندا ءسوز العان ەقىۇ پا توراعاسى جواو سوارەش قازاقستاننىڭ ءوز ءتوراعالىعىن ەرەكشە قارقىنمەن جۇرگىزىپ كەلە جاتقانىن اتاپ ءوتتى.
سەسسياعا قاتىسۋشىلار بيىلعى مامىر ايىندا الماتىدا بولعان ترانسازيالىق پارلامەنتتىك فورۋم قورىتىندىلارىن تالقىلادى. پارلامەنتشىلەر اتاپ وتكەندەي, الماتى كەڭەسىندە ايتىلعان ۇسىنىستار مەن يدەيالار نورۆەگيا استاناسىندا وتكەن اسسامبلەيا سەسسياسىندا قابىلداناتىن جەكەلەگەن قارارلاردىڭ جوبالارىندا كورىنىس تاباتىن بولادى.
ەقىۇ-نىڭ ءىس باسىنداعى توراعاسى, قازاقستان رەسپۋبليكاسىنىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆتىڭ ۇندەۋىن ەقىۇ باس حاتشىسى مارك پەررەن دە بريشامبو وقىپ بەردى.
جالپى وتىرىس بارىسىندا قىرعىزستانداعى جاعدايعا ارنالعان ارناۋلى پىكىرسايىستار بولدى. بۇل تاقىرىپ بويىنشا مارك پ. دە بريشامبو, ەقىۇ-نىڭ از ۇلتتار ىستەرى جونىندەگى جوعارعى كوميسسارى كنۋت ۆوللەبەك, اسسامبلەيانىڭ ورتالىق ازيا جونىندەگى ارنايى وكىلى كيممو كيليۋنەن جانە قىرعىزستان ۋاقىتشا ۇكىمەتى دەلەگاتسياسىنىڭ باسشىسى ومۋربەك تەكەباەۆ بايانداما جاسادى.
پارلامەنتتىك قوعامداستىق 27 ماۋسىمدا قىرعىزستاندا بولعان رەفەرەندۋم ناتيجەلەرىنە, سونداي-اق قازىرگى كەزدە تالقىلانىپ جاتقان قىرعىزستانعا پوليتسيانىڭ جەدەل توپتارىن جىبەرۋ تۋرالى ەقىۇ-نىڭ باستاماسىنا نيەتتەستىگىن ءبىلدىردى. كورشى ەلدەگى جاعدايدى رەتتەۋ ءجونىندەگى شارالار اياسىندا ەقىۇ-نىڭ قازىرگى توراعاسى رەتىندەگى قازاقستاننىڭ كۇش-جىگەرى اتاپ ءوتىلدى.
ودان باسقا ەقىۇ پا تۇراقتى كوميتەتى اسسامبلەيانىڭ ءىس باسىنداعى باس حاتشىسى وليۆەر سپەنسەردى (اقش) كەزەكتى 5 جىل مەرزىمگە كوپشىلىك داۋىسپەن قايتا سايلادى.