بيىل ەل سپورتىندا قانداي تاريحي جەڭىستەر تىركەلدى؟

جوعارىدا تىلگە تيەك ەتكەنىمىزدەي بيىل ەل سپورتشىلارى الەم جانە قۇرلىقتىق باسەكەلەردە ەل ءباسىن بيىك ەتتى. نامىس پەن ەڭبەكتى ەگىز كورگەن سپورت ساڭلاقتارى قازاقستاننىڭ بەدەلىن حالىقارالىق ارەنادا ابىرويمەن قورعادى. ماسەلەن ەل قۇراماسى قىتايدىڭ حاربين قالاسىندا وتكەن قىسقى ازيا ويىندارىندا, الماتىدا وتكەن توعىزقمالاقتان جاسوسپىرىمدەر اراسىنداعى الەم چەمپيوناتىندا, ار-رياد قالاسىندا ۇيىمداستىرىلعان يسلام ويىندارىندا, جاپونيا استاناسى توكيودا جالاۋى جەلبىرەگەن XXV جازعى سۋردليمپيا ويىندارى, ساداق اتۋدان ازيا چەمپيوناتى مەن كۇرەس تۇرلەرى, بوكستان وتكەن الەم بىرىنشىلىگىندە تابىستى ونەر كورسەتتى. جىل مارەسىنە جەتەر تۇستا وسى جانە وزگەدە سپورتتاعى ەلەۋلى جەتىستىكتەردى ەسكە تۇسىرەيىك. 

ەل سپورتشىلارى تىركەگەن تاريحي جەتىستىكتەر

جەرلەستەرىمىز سەمسەرلەسۋدەن العاشقى تاريحي مەدالدى جەڭىپ الدى. سەمسەرلەسۋشىلەر تبيليسيدە وتكەن الەم چەمپيوناتىندا العاش رەت جارتىلاي فينالعا شىعىپ, قازىرگى الەم چەمپيونى يتاليا قۇراماسىن جەڭدى.

كيريلل پروحودوۆ, رۋسلان قۇربانوۆ, ۆاديم شارلايموۆ جانە ەلمير ءالىمجانوۆ فينال جولداماسى ءۇشىن توكيو وليمپياداسىنىڭ چەمپيونى, پاريج وليمپياداسىنىڭ كۇمىس جۇلدەگەرى جاپونيا سپورتشىلارىمەن شەبەرلىك بايقاسىپ, قارسىلاستارىنا از عانا باسىمدىقپەن جول بەردى.

قولا جۇلدە ءۇشىن وتكەن تارتىستى كەزدەسۋدە وتاندىق سپورتشىلار توعىز دۇركىن وليمپيادا چەمپيونى اتانعان فرانتسيا قۇراماسىمەن باق سىناسىپ, الەم چەمپيوناتىنىڭ قولا جۇلدەسىن جەڭىپ الدى.

سپورتتىق گيمناستيكا بويىنشا ازيا چەمپيوناتىندا 2024 جىلعى وليمپيادا ويىندارىنىڭ كۇمىس جۇلدەگەرى ناريمان قۇربانوۆ التىن مەدال جەڭىپ الدى. ول ات سناريادىنداعى جاتتىعۋلار بويىنشا ەڭ ۇزدىك ناتيجە كورسەتتى.

بۇدان بولەك, كوركەم گيمناستيكادان اقمارال ەرەكەشوۆا جاسوسپىرىمدەر اراسىندا ەكى دۇركىن الەم چەمپيونى اتاندى. 

قىتايدىڭ حانچجوۋ قالاسىندا ۇيىمداستىرىلعان ءحىح جازعى ازيا ءويىندارىندا دزيۋدوشى ابيبا ابۋجاقىنوۆا تاريحي كۇمىس جۇلدەگە قول جەتكىزدى. 

World Boxing ۇيىمى اياسىندا وتكەن بوكستان العاشقى الەم چەمپيوناتىندا جالپى كوماندالىق ەسەپتە قازاقستان قۇراماسى 1-ورىنعا يە بولدى (7 التىن, 1 كۇمىس جانە 2 قولا مەدال). 

كونكيمەن جۇگىرۋ سپورتىندا 100 مەتر قاشىقتىقتا بەيرەسمي الەمدىك رەكورد ورناتىلدى.

قازاقستاندىق شورت-ترەكشىلەرى قىسقى ازيا ويىندارىندا العاش رەت التىن مەدال جەڭىپ الدى. بۇل سىندا ەل نامىسىن ەستافەتالىق جارىسقا دەنيس نيكيشا, ابزال اجىعاليەۆ, ءادىل عالياحمەتوۆ, گلەب يۆچەنكو, مەرسايد جاقسىباەۆ, ايبەك ناسەن قورعادى.

سونداي-اق قازاقستان پارابياتلوننان ماۋسىم قورىتىندىسى بويىنشا «حرۋستال گلوبۋسقا» قول جەتكىزدى.

بيىل ساداق اتۋدان ەل قۇراماسى تاريحي مەدال جەڭىپ الدى. ساداق اتۋدان وڭتۇستىك كورەيانىڭ كۆاندجۋ قالاسىندا وتكەن الەم چەمپيوناتىندا كومپاۋند باعدارلاماسى بويىنشا ادەل جەكسەنبينوۆا, ۆيكتوريا ليان, روكسانا يۋنۋسوۆا باستاعان كوماندامىز قولا جۇلدە ءۇشىن تالاستا ۇلىبريتانيانى 232:228 ەسەبىمەن جەڭىپ كەتتى.

بۇعان دەيىن ەل تاريحىندا 1993 جىلى كلاسسيكالىق ساداق اتۋدان ايەلدەر سايىسىندا يانا تۋنيانتس قولا جۇلدەگەر اتانعان بولاتىن.

قازاقستان XXI عاسىردا گرەك-ريم كۇرەسىنەن الەم چەمپيوناتىنىڭ العاشقى التىنىن الدى. گرەك-ريم كۇرەسىنەن 60 كگ دەيىنگى سالماقتىڭ فينالىندا ايدوس سۇلتانعالي الىشەر گانيەۆتى (وزبەكستان) جەڭدى. وسىلايشا, تاريحي التىن مەدال قازاقستان قورجىنىنا ءتۇستى. ايدوس 26 جىلدان كەيىن ەرەسەكتەر اراسىنداعى الەم چەمپيوناتىنىڭ التىنىن سىيلادى.

الماتىلىق «قايرات» كلۋبى ءوز تاريحىندا العاش رەت چەمپيوندار ليگاسىنىڭ جالپى كەزەڭىنە جولداما الدى. بۇعان دەيىن قازاقستاندىق كلۋبتار اراسىنان بۇل مەجەنى تەك «استانا» 2015 جىلى باعىندىرعان ەدى.

اتالعان تۋرنير اياسىندا 18 جاستاعى شەرحان قالمىرزا چەمپيوندار ليگاسى تاريحىنداعى ەڭ جاس توپ-3 قاقپاشىنىڭ قاتارىنا ەندى. 

«قايرات» ساپىنداعى جاس تالانت داستان ساتباەۆ تۋرالى دا ايتا كەتكەنىمىز ءجون. ول اقپان ايىندا انگليانىڭ ايگىلى كلۋبى «چەلسيگە» رەكوردتىق 4,3 ملن ەۋروعا ساتىلدى. وسىلايشا داستان ساتباەۆ قازاقستاننان توپ-5 چەمپيوناتقا اۋىسقان ءبىرىنشى فۋتبولشى رەتىندە تىركەلدى.

ريمدە وتكەن كونگرەستە ورتا سالماقتاعى ەكى دۇركىن الەم چەمپيونى جانە 2004 جىلعى وليمپيادا ويىندارىنىڭ كۇمىس جۇلدەگەرى گەننادي گولوۆكين World Boxing ۇيىمىنىڭ پرەزيدەنتى بولىپ سايلاندى. ول حالىقارالىق سپورت ۇيىمىنا جەتەكشىلىك ەتەتىن العاشقى قازاقستاندىق بولماق.

قازاقستاندا وتكەن حالىقارالىق جارىستار

بيىل قازاقستان ءۇشىن وتە بەلسەندى سپورتتىق جىل بولدى. ەلدە حالىقارالىق رەيتينگتىك جانە الەمدىك جارىستار مەن ۇلتتىق دەڭگەيدەگى ءىرى سپورتتىق شارالار ۇيىمداستىرىلدى.

World Basketball Championship شاراسى ماۋسىمدا ءوتتى. باسەكەگە الەمنىڭ ءار تۇكپىرىنەن كوماندا كەلدى.

World Tennis Championship سايىسى استانادا ۇيىمداستىرىلدى. ەكى جارىس تا حالىقارالىق دەڭگەيدەگى چەمپيوناتتار قاتارىنا جاتادى جانە ەلدەگى ينكليۋزيۆتى سپورتتى دامىتۋعا ۇلكەن سەرپىن بەردى. 

Kazakhstan Open 2025 – تاەكۆوندو G-1 رەيتينگتىك ءتۋرنيرى. بۇل باسەكە دە استانادا 14–16 تامىز ارالىعىندا ۇيىمداستىرىلدى. تۋرنيرگە الەمنىڭ 20-دان استام ەلىنەن 750-دەن اسا سپورتشى قاتىستى. تۋرنير World Taekwondo رەسمي كۇنتىزبەسىنە ەنگىزىلگەن. 

2025 CS Denis Ten Memorial Challenge – الماتى. 1–4 قازان ارالىعىندا ۇيىمداستىرىلعان تۋرنيردە ISU Challenger Series قاتارىنا كىرەتىن فيگۋريستەر باق سىنادى. بۇل – ISU رەيتينگىنە ەسەپتەلەتىن حالىقارالىق تۋرنير.

ەلىمىزگە كەلگەن مارتەبەلى مەيماندار

بيىل ەلىمىزدە ءتۇرلى حالىقارالىق فەدەراتسيا پرەزيدەنتتەرى قوناق بولدى. حالىقارالىق فۋتبول فەدەراتسياسىنىڭ پرەزيدەنتى (FIFA) دجانني ينفانتينو قازاقستانعا ات باسىن بۇرىپ, مەملەكەت باسشىسى قاسىم-جومارت توقاەۆپەن كەزدەستى. 

ق.توقاەۆ بالالار فۋتبولىن دامىتۋ مەن زاماناۋي ينفراقۇرىلىم قۇرۋعا باعىتتالعان FIFA Arena باعدارلاماسىن جۇزەگە اسىرىپ جاتقانى ءۇشىن فەدەراتسياعا ريزاشىلىق ءبىلدىردى.

پرەزيدەنت قازاقستاننىڭ FIFA-مەن ىنتىماقتاسا وتىرىپ, ايماقتا فۋتبولدى قارقىندى دامىتقان ەلگە اينالاتىنىنا سەنىم ءبىلدىردى.

سونداي-اق ەلىمىزگە العاش رەت دۇنيەجۇزىلىك دوپينگكە قارسى اگەنتتىك (WADA) پرەزيدەنتى ۆيتولد بانكا باستاعان دەلەگاتسيا كەلدى. 

قوناقتاردى تۋريزم جانە سپورت ءمينيسترى ەربول مىرزابوسىنوۆ, قازاقستاننىڭ ۇلتتىق دوپينگكە قارسى ورتالىعىنىڭ ديرەكتورى مايرا باقاشەۆا جانە مينيسترلىك وكىلدەرى قارسى الدى.

ساپار بارىسىندا دەلەگاتسيا سپورت فەدەراتسيالارىنىڭ, ۇلتتىق وليمپيادا كوميتەتىنىڭ وكىلدەرىمەن, سپورتشىلارمەن جانە ستۋدەنتتەرمەن كەزدەسىپ, ەلورداداعى بىرقاتار سپورت نىساندارىن ارالادى. رەسمي جيىندا قازاقستانداعى دوپينگكە قارسى ساياسات ماسەلەلەرى تالقىلاندى.

بۇكىلالەمدىك تاەكۆوندو فەدەراتسياسىنىڭ پرەزيدەنتى چۋنگۆون چوۋدىڭ ساپارى دا  ەلىمىزدىڭ سپورت قاۋىمداستىعى ءۇشىن ماڭىزدى وقيعا بولدى. قۇرمەتتى قوناقتى قاسىم-جومارت توقاەۆ قابىلدادى.