«تارباعاتاي» مەملەكەتتىك ۇلتتىق تابيعي پاركى اۋماعىندا جۇرگىزىلىپ جاتقان ەكولوگيالىق مونيتورينگ جۇمىستارى بارىسىندا تۇركىستان سىلەۋسىنى (Lynx lynx isabellinus) بەينەجازباعا تۇسىرىلگەن, دەپ حابارلايدى Egemen.kz.
ايتا كەتەلىك, تۇركىستان سىلەۋسىنى – قورعاۋعا الىنعان جىرتقىش سۇتقورەكتى. الىنعان بەينەماتەريالدار اتالعان ءتۇردىڭ تابيعي مەكەندەۋ ورتاسىندا تۇراقتى كەزدەسەتىنىن كورسەتىپ وتىر.
«ۇلتتىق پارك اۋماعىندا سيرەك جانە جويىلىپ كەتۋ قاۋپى بار جانۋارلار تۇرلەرىن باقىلاۋ جۇمىستارى زاماناۋي ادىستەردى, سونىڭ ىشىندە فوتوتۇزاقتار مەن بەينەتىركەۋ قۇرالدارىن پايدالانۋ ارقىلى تۇراقتى تۇردە جۇزەگە اسىرىلىپ جاتىر», دەلىنگەن حابارلامادا.
جينالعان دەرەكتەر عىلىمي-زەرتتەۋ جۇمىستارىنا جانە بيولوگيالىق الۋان تۇرلىلىكتى ساقتاۋ شارالارىن جوسپارلاۋعا قولدانىلادى.