تالدىقورعان تۇرعىنى الەۋمەتتىك جەلىدەگى جالعان ينۆەستيتسيالىق جارنامانىڭ قۇربانى بولعان. الايدا پوليتسيانىڭ جەدەل ارەكەتىنىڭ ارقاسىندا الاياقتار يەمدەنگەن قاراجات تولىق كولەمدە قايتارىلدى, دەپ جازادى Egemen.kz.
تالدىقورعان قالاسىنىڭ جەرگىلىكتى تۇرعىنى الەۋمەتتىك جەلىلەردى قاراپ وتىرىپ, قازاقستانعا تانىمال كومپانيالاردىڭ ءبىرىنىڭ باعالى قاعازدارىنا ينۆەستيتسيا سالۋدى ۇسىنعان جارناماعا نازار اۋدارعان. سىرت كوزگە سەنىمدى كورىنگەن حابارلاما كۇمان تۋدىرماي, ەر ادام سىلتەمە ارقىلى ءوتىپ, كورسەتىلگەن سايتقا تىركەلگەن.
وسىدان كەيىن ءوزىن كومپانيانىڭ «مەنەدجەرلەرى» رەتىندە تانىستىرعان ادامدار حابارلاسىپ, پسيحولوگيالىق تاسىلدەر ارقىلى جوعارى تابىس ۋادە ەتكەن. ناتيجەسىندە جابىرلەنۋشى 13 ميلليون تەڭگەنى «ينۆەستيتسيا» رەتىندە اۋدارعان. الايدا ۋادە ەتىلگەن پايدا تۇسپەگەن. ءبىراز ۋاقىت وتكەن سوڭ عانا ول مۇقيات ويلاستىرىلعان الاياقتىق سحەمانىڭ قۇربانى بولعانىن اڭعارعان.
جابىرلەنۋشى ۋاقىت وزدىرماي تالدىقورعان قالاسىنىڭ پوليتسيا باسقارماسىنا ارىزدانعان. قىلمىستى كيبەرقىلمىستاردى تەرگەۋ جونىندەگى ءبولىم قىزمەتكەرلەرى دەرەۋ قولعا العان. جاس تەرگەۋشى ازامات جانات ۇلىنىڭ جەتەكشىلىگىمەن قىسقا مەرزىم ىشىندە ۇرلانعان قاراجاتتى الۋعا قاتىسى بار دروپپەرلەر انىقتالعان.
پوليتسيانىڭ ۇيلەسىمدى ءارى جەدەل جۇمىسىنىڭ ناتيجەسىندە الاياقتىق جولمەن الىنعان بارلىق اقشا زاڭدى يەسىنە تولىق قايتارىلدى. قۇقىق قورعاۋ ورگاندارى ازاماتتاردى قىراعى بولۋعا, كۇماندى ينۆەستيتسيالىق ۇسىنىستارعا سەنبەۋگە جانە الداۋدىڭ العاشقى بەلگىلەرى بايقالعان ساتتە بىردەن پوليتسياعا جۇگىنۋگە شاقىرادى.