بورودۋليحا اۋدانىنىڭ دميتريەۆكا اۋىلىندا ءورت ءسوندىرۋ بەكەتى اشىلدى. نىسان دميتريەۆكا, بوروۆوە اۋىلدارىنا قىزمەت كورسەتەدى. بۇگىندە بۇل اۋىلداردا 1 151 ادام تۇرادى, 358 ءۇي مەن بىرقاتار الەۋمەتتىك نىسان ورنالاسقان.
وڭىردە ءورت ءسوندىرۋ بەكەتتەرىنىڭ سانى ارتىپ, ولاردىڭ تەحنيكالىق مۇمكىندىگى كۇشەيىپ كەلەدى. جاڭا بەكەتتەردىڭ ىسكە قوسىلۋى – ورتالىق-تان شالعايداعى ەلدى مەكەندەردىڭ قاۋىپسىزدىك دەڭگەيىن كوتەرۋگە مۇمكىندىك بەرىپ وتىر. زاماناۋي تەحنيكامەن جابدىقتالعان بەكەتتەر ءورتتىڭ الدىن الۋ مەن سالدارىن ازايتۋدا ماڭىزدى ءرول اتقارادى.
دميتريەۆكا اۋىلىنداعى «شىعىسورمانيندۋستريا» جشس بازاسىندا اشىلعان جاڭا ءورت ءسوندىرۋ بەكەتى تاۋلىك بويى جۇمىس ىستەيدى. زاماناۋي قۇرالدارمەن جابدىقتالعان. اتاپ ايتقاندا, دەمالىس بولمەسى, اس ءۇيى, سانيتارلىق توراپ, تازالىق بولمەلەرى بار. بەكەت تۇرمىستىق, دالا, ورمان ءورتى كەزىندە جەدەل ارەكەت ەتۋگە باعىتتالعان. نىساننىڭ اشىلۋىنا وبلىس اكىمىنىڭ ورىنباسارى سەرىك تولەنبەرگەنوۆ پەن توتەنشە جاعدايلار دەپارتامەنتىنىڭ باسشىسى ماناربەك شاپاعاتوۆ قاتىستى.
«وبلىستا 72 ءورت ءسوندىرۋ بەكەتى بار, سونىڭ توعىزى بيىل اشىلدى. بۇل نىساندار 94 مىڭعا جۋىق تۇرعىندى قامتيتىن 165 ەلدى مەكەننىڭ قاۋىپسىزدىگىن قامتاماسىز ەتەدى. بيىل زەنكوۆكا, پەتروپاۆلوۆكا, ميحايليچەنكوۆو اۋىلدارىندا دا جاڭا بەكەتتەر ىسكە قوسىلدى», دەدى وبلىس اكىمىنىڭ ورىنباسارى.
سونىمەن قاتار اقسۋات اۋدانىندا دا ءورت قاۋىپسىزدىگى كۇشەيتىلىپ, بولىمشە زاماناۋي تەحنيكامەن تولىقتى. اۋدان اۋماعىندا قىزىلكەسىك, قۇمكول, ويشىلىك, كىندىكتى, كوكجىرا, ساتباەۆ, ىرعىزباي اۋىلدىق وكرۋگتەرىندە ورنالاسقان 7 ءورت ءسوندىرۋ بەكەتى تۇراقتى جۇمىس ىستەپ تۇر.
«وندا 21 قىزمەتكەر تاۋلىك بويى قوعامدىق قاۋىپسىزدىكتى قامتاماسىز ەتەدى. بيىل اۋداندا 30-دان استام ءورت دەر كەزىندە ءسوندىرىلدى. بۇگىندە «اۋىل قۇتقارۋشىلارى» باعدارلاماسى اياسىندا قىزىلكەسىك, كىندىكتى اۋىلدارىندا جاڭا ءورت بەكەتتەرىنىڭ قۇرىلىسى ءجۇرىپ جاتىر», دەيدى م.شاپاعاتوۆ.
اكىمدىكتىڭ دەرەگىنشە, بورودۋليحا اۋدانىندا ورمان القابى شامامەن 87 773 گەكتار. بۇعان قوسا «سەمەي ورمانى» تابيعي رەزەرۆاتىنا قارايتىن ورماندى القاپتار بار. الايدا ورمان ءورتىنىڭ ءتۇتىنى سەيىلە قويعان جوق. بىلتىر ءساۋىر ايىندا عانا بورودۋليحا اۋدانىنداعى «سەمەي ورمانى» تابيعي رەزەرۆاتىنا قاراستى اۋماقتا ورمان ءورتى شىعىپ, الەككە سالعانى ەسىمىزدە.
وسى رەتتە, جاڭا ءورت ءسوندىرۋ بەكەتىنىڭ اشىلعانىنا قۋانعان تۇرعىندار بۇل سالانىڭ ءالى دە جەتىلە ءتۇسۋىن تىلەيدى. ولاردىڭ ايتۋىنشا, بورودۋليحا اۋدانىندا ءورت قاۋىپسىزدىگىن كۇشەيتۋ – ءوڭىردىڭ تابيعي جاعدايىنان تۋىنداپ وتىرعان ناقتى قاجەتتىلىك. مۇندا ورمان القاپتارى مەن اۋىلدار ءبىر-بىرىنە تاياۋ ورنالاسقان, جاز ايلارىندا قۋراعان ءشوپ پەن اڭىزاق جەل ءورتتىڭ لەزدە ورشۋىنە اكەلىپ سوعادى. وسىنداي توتەنشە جاعدايلاردا جاڭا بەكەتتەردىڭ اشىلۋى, تەحنيكانىڭ تولىعىپ, جەدەل توپتاردىڭ دايىن بولۋى – ورماندى دا, ەلدى مەكەندەردى دە قورعاۋدىڭ باستى كەپىلى. ءورت قاۋىپسىزدىگىن كۇشەيتۋ قورشاعان ورتانى قورعاپ قانا قويماي, تۇرعىنداردىڭ دا تىنىشتىعىن قامتاماسىز ەتەدى.
اباي وبلىسى