2025 جىلعى ۇكىمەت قىزمەتىن قورىتىندىلاۋ اياسىندا ەنەرگەتيكا ءمينيسترى ەرلان اقكەنجەنوۆ Astana Hub الاڭىندا بۇقارالىق اقپارات قۇرالدارى وكىلدەرىمەن كەزدەسىپ, ەنەرگەتيكا سالاسىن دامىتۋ ماسەلەلەرىن تالقىلادى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
ەسەپتى كەزەڭدە ۇكىمەت مەملەكەت باسشىسىنىڭ باستاماسىمەن مۇناي-گاز سەكتورىن, جانار-جاعارماي ماتەريالدارى نارىعىن جانە مۇناي وڭدەۋدى قامتيتىن اۋقىمدى رەفورمالاردى جۇزەگە اسىرۋ ءىسىن جالعاستىردى.
مۇناي-گاز سالاسىنداعى جىلدىڭ باستى وقيعاسى تەڭىز كەن ورنىنداعى بولاشاق كەڭەيتۋ جوباسىنىڭ تولىق اياقتالۋى بولدى. زاۋىتتىڭ ءۇشىنشى بۋىنىن پايدالانۋعا بەرۋ مۇناي ءوندىرۋدىڭ جىلىنا 12 ملن تونناعا ءوسۋىن قامتاماسىز ەتتى, بۇل ەكسپورتتىق كىرىستىڭ تۇراقتى كوزىن قالىپتاستىرادى جانە ۇلتتىق ەكونوميكانىڭ الەۋەتىن ارتتىرادى.
ججم ىشكى نارىعىن رەتتەۋ سالاسىندا باعانى قولدان باسقارۋدان نارىقتىق تەتىكتەرگە كوشۋ جۇزەگە اسىرىلدى. قابىلدانعان شارالار نارىقتى تۇراقتاندىرۋعا, ونى وتىنمەن قانىقتىرۋعا جانە تاپشىلىق قاۋپىن ازايتۋعا مۇمكىندىك بەردى.
«2025 جىلى قۋاتتىلىقتى ارتتىرۋ, ءونىم ساپاسىن ارتتىرۋ جانە عىلىمي-تەحنولوگيالىق شەشىمدەردى ەنگىزۋ قاعيداتتارىنا نەگىزدەلگەن مۇناي وڭدەۋ سالاسىن دامىتۋدىڭ 2040 جىلعا دەيىنگى ۇزاقمەرزىمدى وندىرىستىك باعدارلارى بەكىتىلدى. نىسانالى كورسەتكىش جۇمىس ىستەپ تۇرعان مۇناي وڭدەۋ زاۋىتتارىن كەڭەيتۋ جانە قۋاتى جىلىنا 10 ملن تونناعا دەيىن جەتەتىن جاڭا ءموز جوباسىن جۇزەگە اسىرۋ ەسەبىنەن مۇناي وڭدەۋ كولەمىن جىلىنا 18 ملن-نان 39 ملن تونناعا دەيىن ارتتىرۋدى كوزدەيدى», دەپ اتاپ ءوتتى ەرلان اقكەنجەنوۆ.
بيىل CaspiBitum زاۋىتىن جاڭعىرتۋ اياقتالدى, ناتيجەسىندە كاسىپورىننىڭ قۋاتى جىلىنا 1,5 ملن تونناعا دەيىن, ال بيتۋم ءوندىرىسى جىلىنا 750 مىڭ تونناعا دەيىن ارتتى.
شىمكەنت, اتىراۋ جانە پاۆلودار مۇناي وڭدەۋ زاۋىتتارىن كەڭەيتۋ, سونداي-اق جاڭا ءموز سالۋ ءۇشىن الەۋەتتى ينۆەستورلار تارتۋ جۇمىستارى جالعاسىپ جاتىر.
سالانىڭ ەكولوگيالىق كۇن تارتىبىنە جانە تەحنولوگيالىق دامۋىنا ەرەكشە نازار اۋدارىلادى. كومىرتەكتى بەيتاراپتىق ستراتەگياسى شەڭبەرىندە ك5 + مۇناي ونىمدەرىنىڭ ەكولوگيالىق ستاندارتتارىنا كوشۋ بەكىتىلەدى. ءموز-ءدى تەحنيكالىق جاڭعىرتۋ مۇنايدى وڭدەۋ تەرەڭدىگىن 94%-عا دەيىن ارتتىرۋعا جانە قوسىلعان قۇنى جوعارى ءونىم شىعارۋ ءۇشىن مۇناي وڭدەۋدى مۇناي حيمياسىمەن بىرىكتىرۋگە مۇمكىندىك بەرەدى.