ۇلتتىق جوبانى ىسكە اسىرۋ بارىسى قارالدى

جيىنعا دەنساۋلىق ساقتاۋ ءمينيسترى اقمارال ءالنازاروۆا, ۇلت­تىق ەكونوميكا ۆيتسە-ءمينيسترى اسان دارباەۆ, يندۋستريا جانە قۇرىلىس ۆيتسە-ءمينيسترى قۋاندىق قاجكەنوۆ سونداي-اق ءوڭىر اكىمدەرى مەن اكىم ورىنباسارلارى ونلاين رەجىمدە قاتىستى. كەزدەسۋدىڭ نەگىزگى تاقىرىبى – باستاپقى مەديتسينالىق-سانيتارلىق كومەك نىساندارىن سالۋ, ورتالىق اۋداندىق اۋرۋحانالاردى جاڭعىرتۋ جانە ولاردى بىلىكتى كادرلارمەن قامتاماسىز ەتۋ باعىتتارىن قامتي­تىن «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسىنىڭ ىسكە اسۋى بولدى. بۇگىندە جوبا اياسىندا سالىنادى دەپ اۋەلدەن جوسپارلانعان 655 نىساننىڭ 645-ءنىڭ قۇرىلىسى اياقتالعان. بۇل جوسپاردىڭ 98%-ىن قۇرايدى. ونىڭ ىشىندە 226 نىسان بۇرىن مەديتسينالىق ينفراقۇرىلىم بولماعان اۋىلداردا سالىنعان. ال 419-ى ەسكىرگەن عيماراتتار ورنىنا تۇرعىزىلىپتى. سونىمەن قاتار جوبا اياسىندا قالعان 10 بمسك نىسانى جىل سوڭىنا دەيىن پايدالانۋعا بەرىلەدى. ايدا بالاەۆا وبلىس اكىمدىكتەرىنە قۇ­رى­لىس-مونتاج جۇمىستارىن, جوبالىق جۇ­مىستاردى دەر كەزىندە اياقتاپ, اكىم­شىلىك كەدەرگىلەردى جويۋدى تاپسىردى.

«بارلىق باعىت بويىنشا قاتاڭ ءارى جۇيەلى باقىلاۋدى قامتاماسىز ەتۋ قاجەت. ءار وبلىس بويىنشا بەكىتىلگەن گرافيكتى بۇلجىتپاي ورىنداپ, بار­لىق كەزەڭىندە قاداعالاۋ جانە مىن­دەت­تەمەلەردىڭ تولىق ورىندالۋىنا قول جەتكىزۋ ماڭىزدى. 2025 جىلدىڭ قورىتىندىسى بويىنشا باعدارلاما ناتي­جەسىنە قاتىستى ناقتى ءارى تولىق اقپارات بەرىلۋگە ءتيىس. 2026 جىل – جاۋاپتى كەزەڭ, سوندىقتان فورمالدى ەسەپ ەمەس, ناقتى ناتيجەلەر مەن جەرگىلىكتى جەر­دەگى راستالعان باقىلاۋ قاجەت», دەدى پرەمەر-ءمينيستردىڭ ورىنباسارى.

سونىمەن قاتار جوبانىڭ ەكىنشى باعىتى – ينسۋلت ورتالىعى, تكا ورتا­لىعى, پەريناتالدىق ورتالىق, تراۆما­تولوگيا, حيرۋرگيا جانە مەديتسي­نالىق وڭالتۋ بولىمشەلەرى بار 32 جاڭ­عىرتىلعان ورتالىق اۋداندىق اۋرۋ­حا­نانى پايدالانۋعا بەرۋ ماسەلەسى قا­رالدى. بايانداماعا سايكەس, 14 نىسان­دا جۇمىس اياقتالعان, تاعى 24 اۋرۋ­­حانا قايتا جاڭارتۋ نەمەسە كۇر­دەلى جوندەۋ كەزەڭىندە. تالقىلاۋدا اۋىل­دىق دەنساۋلىق ساقتاۋ نىساندارىن مەديتسينالىق كادرلارمەن قامتاماسىز ەتۋ ماڭىزدى ماسەلەلەردىڭ ءبىرى بولدى. ۇلتتىق جوبا اياسىندا 1100 مەديتسينا قىزمەتكەرىن دايارلاۋ قاراستىرىلعان.

«ينفراقۇرىلىم سالۋ – ماڭىزدى قادام, الايدا شەشۋشى فاكتور – كادر ماسەلەسى. نىسانداردىڭ ءتيىمدى ءارى ساپالى جۇمىسى تىكەلەي مەديتسينالىق مامانداردىڭ دايارلىعى مەن ولاردىڭ قولجەتىمدىگىنە بايلانىستى. بۇگىندە ما­ماندار تاپشىلىعى اۋىلدىق جەردە عانا ەمەس, ءىرى قالالاردا دا بايقا­لادى. مەديتسينالىق نىسانداردى پاي­دالانۋعا بەرۋ پەرسونالدى تولىق­تىرۋدىڭ ناقتى الگوريتمىمەن جانە كور­سەتىلەتىن قىزمەتتىڭ كولەمى مەن ساپاسىن ناقتى تۇسىنۋمەن قاتار جۇرۋگە ءتيىس. كەيىنگى جىلدارداعى ەكونوميكالىق قيىندىقتارعا قاراماستان, ەلىمىزدە دەنساۋلىق ساقتاۋ جۇيەسىن دامىتۋعا اۋقىمدى ينۆەستيتسيالار سالىنىپ جاتىر. بۇل جوبالاردىڭ ناتيجەسى بارلىق سىن-پىكىرلەرگە بەرىلگەن ناقتى جاۋاپ. سوندىقتان نىسانداردى سالۋمەن عانا شەكتەلمەي, ولاردىڭ قانشا ادامدى قامتيتىنىن, قانداي ناقتى پايدا اكەلەتىنىن حالىققا جەتكىزۋ ماڭىزدى. ازاماتتاردىڭ دەنساۋلىعى – ەلدىڭ ادام كاپيتالى مەن ستراتەگيالىق الەۋەتى. مەملەكەت قابىلداپ جاتقان ءىس-شا­رالاردىڭ بارلىعى وسىعان باعىت­تالعان», دەپ اتاپ ءوتتى ايدا بالاەۆا.

جيىندى قورىتىندىلاي كەلە, پرەمەر-ءمينيستردىڭ ورىنباسارى بىرقاتار تاپسىرما بەردى. اتاپ ايتقاندا, جىل سوڭىنا دەيىن جۇمىستى اياقتاۋعا ءتيىس وڭىرلەر بويىنشا قو­سىمشا تەكسەرۋ جۇرگىزىپ, ناقتى باقى­لاۋ ناتيجەلەرى تۋرالى ەسەپ ۇسىنۋ­دى; بەكىتىلگەن جۇمىس كەستەلەرىن قاتاڭ ساقتاپ, ءار وبلىس بويىنشا ەگ­جەي-تەگجەيلى جوسپار-گرافيكتەردى ازىرلەپ, ولاردىڭ ورىندالۋىن تۇراقتى باقىلاۋدى; ءبىرىنشى, ەكىنشى جانە ءۇشىنشى باعىتتار بويىنشا تولىق ءارى ۋاقتىلى جۇمىس جۇرگىزۋ, جىل سوڭىنا دەيىن الىنعان مىندەتتەمەلەردىڭ ورىندالۋىن قامتاماسىز ەتۋ, ءار جاعداي بو­يىنشا مىندەتتى تۇردە اقپارات بەرۋدى; 2025 جىلدىڭ قورىتىندىسى بويىنشا باعدارلاما ناتيجەلەرى جونىندە وڭىرلەر بويىنشا ناقتى ءارى تولىق اقپارات ۇسىنۋدى تاپسىردى.