ەلىمىزدە نارىقتا ساتىلىپ جۇرگەن جانە دۇكەندەردە تۇرعان ەتتەر كۇندەلىكتى تەكسەرىستەن وتەتىن بولادى. اۋىل شارۋاشىلىعى مينيسترلىگى ءتيىستى زاڭعا تۇزەتۋلەر ەنگىزۋگە دايىن. بۇل شارا بۇزىلعان ەتتىڭ ساتىلۋىن بولدىرماۋعا باعىتتالعان, دەپ حابارلايدى Egemen.kz.
اۋىل شارۋاشىلىعى ۆيتسە-ءمينيسترى امانعالي بەرداليننىڭ ايتۋىنشا, قازاقستاندا ەت ساتىلاتىن نۇكتەلەردە ونىڭ قاۋىپسىزدىك تالاپتارىنا سايكەستىگىن كۇندەلىكتى باقىلاۋ ەنگىزۋ جوسپارلانىپ وتىر.
اۋىل شارۋاشىلىعى مينيسترلىگى ۆەتەريناريا تۋرالى زاڭعا سايكەس تۇزەتۋلەر ازىرلەپ جاتىر. وزگەرىستەردىڭ ىشىندە دۇكەن سورەلەرىنە جەتكىزىلەتىن ەتتى تەكسەرۋگە كەدەرگى كەلتىرەتىن توسقاۋىلداردى جويۋ قاراستىرىلعان.
«قازىرگى تاڭدا كاسىپكەرلىك كودەكس ۆەتەرينارلىق ينسپەكتورلارعا جەكە مەكەمەلەرگە بارۋعا تىيىم سالادى. ءتىپتى ولارعا ۆەتەرينارلىق ستانتسيالار مەن پۋنكتتەردى دە تەكسەرۋگە بولمايدى. ول ءتيىستى راسىمنەن ءوتىپ, پروكۋراتۋرا ارقىلى تىركەلۋى كەرەك. سوندىقتان ءبىز قازىر ۆەتەريناريا تۋرالى زاڭنان وسى باپتى الىپ تاستاعىمىز كەلەدى», دەدى امانعالي بەردالين.
مينيسترلىك دۇكەندەر مەن ساۋدا نۇكتەلەرىندە كۇندەلىكتى باقىلاۋ ەنگىزۋدى جوسپارلاپ وتىر. بۇل شارا سايكەس كەلمەيتىن ونىمدەردىڭ ساتىلۋىن بولدىرماۋعا كومەكتەسەدى دەپ سانايدى ۆيتسە-مينيستر. سونىمەن قاتار, زاڭ تەكسەرىلمەگەن ەتتى ساتقانى ءۇشىن جاۋاپكەرشىلىكتى قاتاڭداتادى, ءتىپتى قىلمىستىق جاۋاپكەرشىلىككە دەيىن قاراستىرادى.