الماتى وبلىسىندا «باتىس ەۋروپا – باتىس قىتاي» حالىقارالىق ءدالىزى بويىندا جاڭا ەۋرازيالىق لوگيستيكالىق پارك اشىلدى. قۇلجا تاسجولىنا جاقىن ورنالاسقان نىسان ءوڭىردىڭ «شىعىس قاقپاسى» ينفراقۇرىلىمدىق ايماعىنا كىرىپ, الماتى مەن وبلىستىڭ كەڭىستىكتىك دامۋىنداعى ماڭىزدى لوگيستيكالىق حابقا اينالادى.
پاركتىڭ اشىلۋ راسىمىنە الماتى وبلىسىنىڭ اكىمى مارات سۇلتانعازيەۆ, ساۋدا جانە ينتەگراتسيا ءبىرىنشى ۆيتسە-ءمينيسترى ايجان بيجانوۆا, سونداي-اق لوگيستيكا جانە دەۆەلوپمەنت سالاسىنىڭ جەتەكشى كومپانيالارى قاتىستى.
جوبانىڭ جالپى ينۆەستيتسيا كولەمى – 22 ملرد تەڭگە. ءبىرىنشى كەزەڭدە 50,3 مىڭ شارشى مەتر بولاتىن «ا» ساناتىنداعى زاماناۋي ەكى قويما كورپۋسى ىسكە قوسىلدى. توبەسىنىڭ بيىكتىگى 2 مەترلىك, شارشى مەترىنە 8 توننا جۇك كوتەرەتىن ەدەن جانە ءورت قاۋىپسىزدىگىنىڭ حالىقارالىق ستاندارتىنا ساي كەلەتىن جوعارى كلاستى قويما بار. پارك تولىق قۋاتىنا الداعى جىلى شىعادى. سول كەزدە 250 ادام تۇراقتى جۇمىسپەن قامتىلاتىن بولادى.
«جاڭا لوگيستيكالىق پارك – ەلدىڭ ترانزيتتىك مۇمكىندىگىن ارتتىرۋعا, حالىقارالىق ساۋدا اعىمدارىن ءتيىمدى باسقارۋعا جانە وڭىرلىك ىقپالداستىقتى تەرەڭدەتۋگە باعىتتالعان ماڭىزدى جوبا. «ا» ساناتىنداعى جاڭا نىسانداردىڭ ىسكە قوسىلۋى – وبلىس ەكونوميكاسىنىڭ تۇراقتى دامۋى مەن ينۆەستورلاردىڭ سەنىمىنىڭ ناقتى كورىنىسى, سونداي-اق مەملەكەت پەن بيزنەستىڭ ءتيىمدى سەرىكتەستىگىنىڭ ناتيجەسى», دەگەن ءوڭىر باسشىسى مارات سۇلتانعازيەۆ جوبانىڭ ماڭىزدى تۇستارىن اتاپ ءوتتى.
ءوز كەزەگىندە ساۋدا جانە ينتەگراتسيا ءبىرىنشى ۆيتسە-ءمينيسترى ايجان بيجانوۆا:
«بۇل پارك – قازاقستاننىڭ حالىقارالىق كولىك دالىزدەرىنە شىعۋدى كەڭەيتە تۇسەدى. مۇنداي اۋقىمدى ينفراقۇرىلىم وتاندىق بيزنەسكە جاڭا مۇمكىندىكتەر اشىپ, ەلىمىزدىڭ ەۋرازياداعى ساۋدا حابى رەتىندەگى ورنىن بەكىتە تۇسەدى», دەدى.
باستامانىڭ تەحنيكالىق پارامەترلەرىن كوپشىلىك نازارىنا ۇسىنعان «ەۋرازيالىق لوگيستيكالىق پاركتىڭ» اتقارۋشى ديرەكتورى رومان جۋجلەۆ اۋقىمدى جوبا كەز كەلگەن ستەللاجدى نەمەسە كوپدەڭگەيلى ساقتاۋ جۇيەسىن ورناتۋعا مۇمكىندىك بەرەتىنىن تىلگە تيەك ەتتى.
سالتاناتتى شارا بارىسىندا تالعار اۋدانىنىڭ اكىمى تاڭات ايداربەكوۆ جوبانىڭ اۋدان دامۋىنا وڭ اسەر ەتەتىنىن اتاپ ايتتى.
ال Ozon قازاقستان كومپانياسىنىڭ باسشىسى الەكسەي ساپون ونلاين-ساۋدا تيىمدىلىگىنىڭ زاماناۋي قويمالارعا تىكەلەي بايلانىستى ەكەنىن ايتسا, DNS كومپانياسىنىڭ لوگيستيكا جونىندەگى فەدەرالدىق باسشىسى ۆلاديمير ليۋبيموۆ جەرگىلىكتى حابتار جەلىسى تاپسىرىستاردى جەتكىزۋ ۋاقىتىن ايتارلىقتاي قىسقارتاتىنىن مالىمدەدى.
ينۆەستورلار پارك اۋماعىن قۇلجا باعىتى ارقىلى كەڭەيتۋدى كوزدەپ وتىر. جوسپاردا 300 مىڭ شارشى مەترگە دەيىن قوسىمشا قويما الاڭىن سالۋ جانە كورشى ەلدەردىڭ نارىعىنا شىعۋ قاراستىرىلعان. Sudakov Group باس ديرەكتورى الەكسەي سۋداكوۆ ايتۋىنشا, فۋنكتسيونالدى قويما نىساندارىنا سۇرانىس تۇراقتى تۇردە ارتىپ وتىر.
سالتاناتتى شارا بارىسىندا Noytech جانە «ەۋرازيالىق لوگيستيكالىق پارك» اراسىندا ستراتەگيالىق ارىپتەستىك تۋرالى كەلىسىمگە قول قويىلدى. Noytech-ءتىڭ قازاقستانداعى ديرەكتورى ۆالەريا كوشەلەۆا جاڭا نىسان جوعارى تەحنولوگيالىق سەرۆيستەردى دامىتۋ مەن قىزمەت تۇرلەرىن كەڭەيتۋگە جول اشاتىنىن جەتكىزدى.
الماتى وبلىسى,
تالعار اۋدانى