قىزىلورداداعى ونەر ورتالىعىندا ۇلاعاتتى ۇستاز, بەلگىلى ءانشى پەرۋزا ارعىنباەۆانى ەسكە الۋعا ارنالعان كلاسسيكالىق ءان كەشى ءوتتى. ءوڭىر رۋحانياتىندا وشپەس ءىز قالدىرعان ونەر يەسىنىڭ شىعارماشىلىق مۇراسى ۇلىقتالعان كەشتە ساحناعا تالانتتى ءانشى ايگەرىم التىنبەك باستاعان شاكىرتتەرى شىقتى.
قازانعاپ اتىنداعى قىزىلوردا مۋزىكالىق كوللەدجىندە ەڭبەك ەتكەن پەرۋزا امانگەلدىقىزى – تالاي جاستىڭ تالابىن ۇشتاپ, ۇلكەن ساحنالارعا جول اشقان ۇستاز. ءداستۇرلى اۋەن تۋ تىككەن وڭىردە بۇكىل ادامزات وركەنيەتىنىڭ اسىل مۇراسى سانالاتىن كلاسسيكالىق ونەردىڭ وركەن جايۋىنا ۇلەس قوسقان پەرۋزانىڭ شاكىرتتەرى حالىقارالىق, رەسپۋبليكالىق كونكۋرستاردا لاۋرەات اتاندى. ۇلاعاتتى ۇستازدان ءتالىم العان قىز-جىگىتتەر بۇگىندە ەلىمىزبەن قوسا شەتەلدەردە دە ءبىلىم الىپ, الەم ساحنالارىندا ونەر كورسەتىپ ءجۇر.
پەرۋزا ارعىنباەۆانىڭ شىعارماشىلىعى مەن ءومىرى تۋرالى كورسەتىلىممەن باستالعان كلاسسيكالىق كەشتە قازاقستاننىڭ ەڭبەك سىڭىرگەن قايراتكەرى ءمۇسىلىم امزە ديريجەرلىك ەتەتىن سيمفونيالىق وركەستر سۇيەمەلدەۋىمەن رەسپۋبليكالىق, حالىقارالىق بايقاۋلاردىڭ لاۋرەاتتارى گاۋحار احەتوۆا, ايبەك حايروللا, عازيزا جۇسىپبەكوۆا, ەربول مۇحانوۆ, سالتانات مۇراتقىزى, التىنبەك ارىستانبەك, فاريدا بۇلدانوۆالار ونەر كورسەتتى.
ۇستاز ەسىمىن جاڭعىرتقان كەشتىڭ ارنايى قوناعى الەمدىك وپەرا ساحناسىن باعىندىرعان تالانتتى ءانشى, قازاقستاننىڭ ەڭبەك سىڭىرگەن قايراتكەرى ايگەرىم التىنبەك بولدى. بيىل يتاليادا وتكەن ءحى حالىقارالىق CLIP 2025 وپەرا بايقاۋىندا توپ جارىپ, جاقىندا عانا الەمگە ايگىلى لا سكالا تەاترىندا دەبيۋت جاساعان ايگەرىم قازانعاپ اتىنداعى مۋزىكالىق كوللەدجدە پەرۋزا ارعىنباەۆانىڭ سىنىبىندا وقىعان. كلاسسيكالىق باعىتى دا وسى كەزدەن باستالىپ, ۇستازى شاكىرتىن وپەرا جانرىنداعى ءتۇرلى بايقاۋلارعا قاتىستىرىپ, ونەرىن شىڭداپتى.
ايگەرىم التىنبەك ۇستاز رۋحىنا تاعزىم رەتىندە دج.ءپۋچچينيدىڭ «تۋراندوت» وپەراسىنان ليۋ ارياسى مەن باسقا دا الەم جۇرتىنا بەلگىلى تۋىندىلاردى ورىندادى. كەشتى بارلىق شاكىرتتەرى قوسىلا شىرقاعان «ۇستازىم مەنىڭ» ءانى تۇيىندەدى. جالپى, وسى كۇنى ساحناداعى ءاربىر اۋەننەن ساعىنىشتىڭ ءۇنى ەسىپ تۇردى.
كەش بارىسىندا وبلىستىق مادەنيەت, ارحيۆتەر جانە قۇجاتتاما باسقارماسى باسشىسىنىڭ ورىنباسارى قۋانىش جانۇزاقوۆ, پەرۋزا ارعىنباەۆانىڭ ارىپتەسى, قازاقستاننىڭ ەڭبەك سىڭىرگەن قايراتكەرى كەۋلىمجاي بوتاباەۆ شاكىرتتەرى ەسىمىن جاڭعىرتقان ونەر يەسى جايىندا جۇرەك تەربەتەر ەستەلىك ايتتى.
قىزىلوردا