ماجىلىستەگى قالدىقتاردى قايتا وڭدەۋ نورمالارىنا قاتىستى تالقىلاۋ كەزىندە دەپۋتات ەدىل جاڭبىرشين جاساندى ينتەللەكتتەن الىنعان دەرەكتەردى دالەل رەتىندە ۇسىنىپ, مينيسترلىك وكىلدەرىنىڭ ۇسىنعان ءتاسىلىن سىنعا الدى, دەپ حابارلايدى Egemen.kz.
ەكولوگيا جانە تابيعي رەسۋرستار ۆيتسە-ءمينيسترى جومارت اليەۆ وتىرىس بارىسىندا شينالاردى مىسالعا الا وتىرىپ, قازىرگى قايتا وڭدەۋ جۇيەسىنىڭ ولقىلىقتارىن ءتۇسىندىردى.
«قولدانىستاعى نورمالارعا سايكەس, ەگەر قازاقستانعا 100 كيلوگرامم شينا كىرسە جانە كاسىپورىن ونىڭ 30 پايىزىن قايتا وڭدەگەنىن دالەلدەسە, وعان تولەنگەن ەكولوگيالىق تولەم تولىق قايتارىلادى. ءبىز وسى مەجەنى 40 پايىزعا دەيىن بىرتىندەپ كوتەرۋدى ۇسىنىپ وتىرمىز. الايدا, قازىرگى جاعدايدا 100 كيلوگرامنىڭ 70 كيلوگرامى وڭدەلمەي قالىپ وتىر. بۇل قالدىقتار قايدا كەتىپ جاتىر؟ ولار اينالىپ كەلگەندە قورشاعان ورتاعا تۇسەدى. بىراق كاسىپورىندار 30 پايىزدى ورىنداعانى ءۇشىن تولىق بوساتىلادى. سوندا قالعان 70 كيلوگراممنىڭ تاعدىرى نە بولادى؟», دەدى ۆيتسە-مينيستر.
ءدال وسى كەزدە ءسوز العان دەپۋتات ەدىل جاڭبىرشين ارىپتەستەرىن كۇتپەگەن دالەلىمەن تاڭعالدىردى. ول ءبىرتۇتاس 40 پايىزدىق كورسەتكىش بارلىق قالدىق تۇرىنە بىردەي قولدانىلۋى قيسىنسىز ەكەنىن ايتىپ, تالداۋ جۇرگىزۋ ءۇشىن ChatGPT-گە جۇگىنگەنىن اشىق ايتتى.
«سىزدەر بارلىق قالدىققا بىردەي 40 پايىز بەلگىلەپ وتىرسىزدار. بىراق بۇل عىلىمعا دا, تاجىريبەگە دە سايكەس كەلمەيدى. مەن ChatGPT-دەن مورفولوگيا بويىنشا قالدىقتاردىڭ الەمدىك قايتا وڭدەلۋ دەڭگەيىن سۇرادىم. مىنە, كورسەتكىشتەر: ورگانيكا – 5-10 پايىز, پلاستيك – 14-20 پايىز, قاعاز – 45–55 پايىز, شينا مەن شىنى – 20-30 پايىز, مەتالل – 70-90 پايىز, توقىما – 10 پايىزعا جەتپەيدى. وسىنى كورە تۇرا بارلىق قالدىققا بىردەي 40 پايىز قويۋ دۇرىس ەمەس, بۇل ديلەتانتتىق. ءار قالدىق تۇرىنە جەكە نورماتيۆ بەكىتۋ كەرەك», دەدى دەپۋتات.