ەكونوميكالىق تۇراقتىلىق پەن ينفلياتسيانى تومەندەتۋ ماسەلەلەرى تالقىلاندى

تالقىلاۋعا «اتامەكەن» ۇكپ, «بايتەرەك «ۇبح» اق بارلىق وبلىستىق فيليالى, بيزنەس, اكىمدىك وكىلدەرى قاتىستى. 2025 جىلعى 27 قاراشا مەن 5 جەلتوقسان ارالىعىندا بارلىق وڭىردە كەزدەسۋ ءوتتى. وعان 500-دەن استام ادام قاتىستى.

19 قاراشادا ۇكىمەت وتىرىسىندا ۇسىنىلعان باعدارلاما ماكروەكونوميكالىق تۇراقتىلىقتى نىعايتۋعا, ينفلياتسيانى تومەندەتۋگە, ىشكى ءوندىرىستى مولايتىپ, ازاماتتاردىڭ ءال-اۋقاتىنىڭ تۇراقتى وسۋىنە ارنالعان. ۇلتتىق ەكونوميكا ءبىرىنشى ۆيتسە-ءمينيسترى ازامات ءامرين ۇسىنىلعان شارالار ورتامەرزىمدىك پەرسپەكتيۆادا تۇراقتى ەكونوميكالىق دامۋدىڭ بەرىك ىرگەتاسىن قالايتىنىن اتاپ ءوتتى.

باعدارلامانى ىسكە اسىرۋدىڭ نەگىزگى وپەراتورى رەتىندە «بايتەرەك» ۇلتتىق ينۆەستيتسيالىق حولدينگى بەلگىلەنگەن. ول كاسىپكەرلىكتى, ەكسپورتتىق جوبالاردى, اوك جانە قولجەتىمدى تۇرعىن ءۇي باعدارلامالارىن جانە ت.ب. قولدايدى. حولدينگ ەكىنشى دەڭگەيدەگى بانكتەرمەن بىرلەسىپ, ءىرى ينۆەستيتسيالىق جوبالار ءۇشىن دە, ەكونوميكالىق ءوسۋدىڭ جاڭا نۇكتەلەرى ءۇشىن دە ناقتى سەكتورعا ۇزاقمەرزىمدىك كرەديت بەرۋدىڭ نەگىزگى كوزىنە اينالماق.

2026 جىلعى حولدينگ جوبالارىنىڭ پورتفەلى كەلەسىدەي: 42% – حيميا جانە مۇناي – گاز حيميا ونەركاسىبى, 19,6% – كولىك جانە لوگيستيكا, 12,1% –ەنەرگەتيكا, 7,1% – تمك, 6,4% – اوك جانە تاماق ونەركاسىبى.

قارجىلاندىرۋعا قول جەتكىزۋ ءۇشىن ۇكىمەت 2026 جىلى حولدينگكە كاپيتالداندىرۋ ءۇشىن 1 ترلن تەڭگەگە دەيىن قارجى ءبولۋدى جالعاستىرادى. 2027-2028 جىلدارى قوسىمشا قولداۋ ماسەلەسى بيىلعى ەكونوميكالىق جاعداي مەن ناقتى سەكتوردىڭ قاجەتتىلىگىنە سۇيەنە وتىرىپ, قارالماق.

«ينۆەستيتسياعا تاپسىرىس» باعدارلاماسى شەڭبەرىندە حولدينگ وڭىردەگى جوبالاردى تالداۋ ءۇشىن اكىمدىكتەرمەن جۇمىس كەزدەسۋىن وتكىزەدى. ورتالىق مەملەكەتتىك ورگاندار دا ءوز ۇسىنىسىن قۇرماق. بارلىق باستاما جۇيەلى سۇيەمەلدەۋ ءۇشىن ۇلتتىق تسيفرلىق پلاتفورماعا ەنگىزىلەدى.

شوب ەكسپورتقا باعدارلانعان جوبالارعا ۇلكەن قىزىعۋشىلىق ءبىلدىردى. مۇنداي باستامالاردى قارجىلاندىرۋ تەتىگى بويىنشا 20% مەنشىكتى قاراجات جانە 80% «بايتەرەك» حولدينگى ارقىلى قارىزدىق قارجى بەرىلۋى مۇمكىن.

سونىمەن قاتار, حولدينگ وڭىرلەردىڭ ارتىقشىلىقتارىنا – تابيعي رەسۋرستارعا, كولىككە قول جەتكىزۋگە, تۋريستىك الەۋەتكە جانە ينفراقۇرىلىمعا نەگىزدەلگەن جاڭا ءوندىرىس قۇرۋدى بەلسەندى تۇردە ۇسىنادى.

كەڭەس بارىسىندا قاتىسۋشىلاردىڭ بارلىق ماسەلەسى تىڭدالدى. ولاردىڭ كوپشىلىگى شوب-تى دامىتۋ, پايىزدىق مولشەرلەمە, شاعىن ونەركاسىپ ايماعىن قۇرۋ, ءمجا تەتىكتەرى مەن ءونىمدى ساتۋعا قاتىستى. ءار سۇراققا ەگجەي-تەگجەيلى تۇسىنىك بەرىلدى. جوبانىڭ بۇكىل مەرزىمىنە پايىزدىق مولشەرلەمەنى سۋبسيديالاۋعا كەپىلدىك بەرۋ – نەگىزگى ماسەلە.

بۇعان جاۋاپ رەتىندە «بايتەرەك» حولدينگىنىڭ وكىلدەرى «دامۋ» قورىنىڭ باعدارلامالارىن ترانسفورماتسيالاۋ شەڭبەرىندە تىكەلەي سۋبسيديالاۋ ايتارلىقتاي قىسقارتىلعانىن جانە ەقجج تىزبەسى بويىنشا تەك جوبالارعا عانا 200 ملن تەڭگەگە دەيىن ساقتالاتىنىن ءتۇسىندىردى. قولداۋدىڭ نەگىزگى قۇرالى ەكىنشى دەڭگەيدەگى بانكتەردى جەڭىلدىكتى مولشەرلەمەمەن قورلاندىرۋ. بۇل بيزنەسكە جوبانىڭ بۇكىل مەرزىمىنە جىلدىق 12,6% قارجى الۋعا مۇمكىندىك بەرەدى.بۇل شارتتارعا كەپىلدىك بەرىلمەك. ويتكەنى قورلاندىرۋ قاراجاتى «بايتەرەك» ارقىلى ءبولىنىپ, «دامۋ» قورىنا بەرىلدى. جوبا بولاشاق بيۋدجەتتىك شەشىمدەرگە تاۋەلدى ەمەس. قارجىلاندىرۋعا كرەديت بەرۋدىڭ بارلىق كەزەڭىندە قول جەتكىزىلەدى.