قارجىلىق مونيتورينگ اگەنتتىگى زاڭسىز ونلاين-كازينو قىزمەتىن توقتاتۋ جانە وعان قاتىسى بار قارجى ارنالارىن بۇعاتتاۋ باعىتىنداعى شارالاردى كۇشەيتتى. تەكسەرۋ ناتيجەسىندە تولەم ۇيىمدارى ارقىلى قاراجاتتى زاڭدى ترانزاكتسيالار رەتىندە كورسەتىپ, شىن مانىندە ونلاين-كازينو شوتتارىنا اۋدارىپ وتىرعان ترانسشەكارالىق سحەما انىقتالدى, دەپ حابارلايدى Egemen.kz.
اگەنتتىك قازاقستان اۋماعىندا ونلاين-كازينولاردىڭ قىزمەتىنە تولىق تىيىم سالىنعانىن ەسكە سالدى. مۇنداي رەسۋرستار سالىق تولەمەيدى, كليەنتتەردى تىركەمەيدى, بالالار مەن جاستاردى تارتادى جانە قوعامنىڭ پسيحيكالىق دەنساۋلىعىنا زيان تيگىزەدى.
«سحەمانى جۇزەگە اسىرۋ ءۇشىن فينتەح-سەرۆيستەردىڭ يەلەرى بۋكمەكەرلىك كەڭسەلەرمەن جاسالعان جالعان شارتتار نەگىزىندە الىنعان «سۇر» POS-تەرمينالدار مەن Terminal ID قولدانعان», دەلىنگەن حابارلامادا.
انىقتالعان زاڭسىز قارجى اينالىمى 600 ملرد تەڭگەدەن اسقان. بۇل سحەماعا 20-دان استام تولەم ۇيىمى جانە بىرقاتار ەكىنشى دەڭگەيلى بانكتەردىڭ قىزمەتكەرلەرى قاتىسقان.
«سونىمەن قاتار ءتورت ونلاين-كازينوعا تەحنيكالىق قولداۋ كورسەتىپ, اقشا وپەراتسيالارى بويىنشا كەڭەس بەرگەن Call-ورتالىقتىڭ قىزمەتى توقتاتىلدى. ونىڭ زاڭسىز جۇمىسىنا قازاقستان, رەسەي, بەلارۋس, يسپانيا جانە ۆەتنام ازاماتتارىنان قۇرالعان 120 ادام تارتىلعان. بۇدان بولەك, Call-ورتالىق ۇيىمداستىرۋشىلارى كريپتوۆاليۋتا ارقىلى قاراجات قابىلداپ, شىعارۋدى جۇزەگە اسىرعان گەمبلينگ نەگىزىندەگى سەرىكتەستىك باعدارلاماسىن قۇرعان. ونىڭ اينالىمى 200 ملن USDT-تەن اسىپ ءتۇستى», دەپ حابارلادى اگەنتتىكتىڭ ءباسپاسوز قىزمەتى.
جەدەل شارالار كەزىندە 70-تەن استام ءتىنتۋ جۇرگىزىلىپ, زاتتاي ايعاقتار الىنعان. سوت سانكتسياسىمەن توعىز ادام قاماۋعا الىندى, ولاردىڭ قاتارىندا «تولەم ۇيىمدارى قاۋىمداستىعى» زتب باسشىسىنىڭ كەڭەسشىسى دە بار. سونداي-اق شەتەل ازاماتتارى بار سەگىز كۇدىكتىگە حالىقارالىق ىزدەۋ جاريالاۋعا قۇجاتتار دايىندالىپ جاتىر.
اگەنتتىك زاڭسىز قۇمار ويىندارىن جارنامالاۋ نەمەسە وعان جاردەمدەسۋ ارەكەتتەرىنىڭ بارلىعى قىلمىستىق قىزمەتكە كومەكتەسۋ رەتىندە قاراستىرىلاتىنىن جانە جاۋاپكەرشىلىككە مىندەتتى تۇردە اپاراتىنىن ەسكەرتتى.