اقش پەن كانادا شەكاراسىنا جاقىن, الىس ايماقتا ماگنيتۋداسى 7,0 بولاتىن جەر سىلكىنىسى بولدى, دەپ حابارلايدى Egemen.kz.
الياسكا (اقش) مەن كانادا اۋماعىنداعى يۋكون جەرىنە جاقىن وڭىردە قۋاتتى 7 باللدىق جەر سىلكىنىسى تىركەلدى. تسۋنامي قاۋپى جاريالانعان جوق, ال بيلىك وكىلدەرى قيراندىلار نەمەسە زارداپ شەككەندەر تۋرالى جەدەل اقپارات تۇسپەگەنىن مالىمدەدى.
اقش گەولوگيالىق قىزمەتى (USGS) جەر سىلكىنىسى الياسكاداعى دجۋنو قالاسىنان شامامەن 370 كم سولتۇستىك-باتىستا جانە يۋكون استاناسى ۋايتحورستان 250 كم باتىستا بولعانىن مالىمدەدى.
ۋايتحورستا كانادانىڭ كورولدىك اتتى پوليتسياسىنىڭ سەرجانتى كاليستا ماكلەود جەدەل قىزمەتكە جەر سىلكىنىسى تۋرالى 911 نومىرىنە ەكى قوڭىراۋ تۇسكەنىن ايتتى.
كانادا تابيعي رەسۋرستار مينيسترلىگىنىڭ سەيسمولوگى ەليسون ءبيوردتىڭ ايتۋىنشا, ەڭ قاتتى سىلكىنىس بولعان يۋكون اۋماعى – تاۋلى جانە حالىق وتە سيرەك قونىستانعان ءوڭىر.
كوبىنە ادامدار سورەلەردەن جانە قابىرعالاردان زاتتار قۇلاپ جاتقانى تۋرالى حابارلاپ جاتىر. قۇرىلىمدىق زاقىم كورگەن نىساندار بايقالمادى, – دەدى ول.
ەپيتسەنترگە ەڭ جاقىن كانادالىق ەلدى مەكەن – حاينس-دجانكشەن, ول شامامەن 130 كم جەردە ورنالاسقان. يۋكون ستاتيستيكا بيۋروسىنىڭ دەرەگىنە سايكەس, 2022 جىلى بۇل اۋىلدا 1018 ادام تۇرعان.
جەر سىلكىنىسى الياسكاداعى ياكۋتات قالاسىنان شامامەن 91 كم قاشىقتىقتا بولدى. اقش گەولوگيالىق قىزمەتىنىڭ مالىمەتىنشە, قالا تۇرعىندارى – 662 ادام.
جەر استى ءدۇمپۋى شامامەن 10 كم تەرەڭدىكتە بولعان, ودان كەيىن بىرنەشە ءالسىز قوسىمشا تولقىندار تىركەلدى.