بانكروت دەپ تانىلعان قازاقستاندىقتاردىڭ جالپى قارىزى 188 ملرد تەڭگەگە جەتكەن. بۇل تۋرالى ۆيتسە-مينيستر وكق-دەگى ءباسپاسوز ءماسليحاتىندا مالىمدەدى, دەپ جازادى Egemen.kz.
ەرجان ءبىرجانوۆتىڭ دەرەگىنشە, جەكە تۇلعالاردىڭ بانكروتتىعى بويىنشا زاڭناما كەزەڭ-كەزەڭىمەن جەتىلدىرىلىپ جاتىر. بيىل قابىلدانعان وزگەرىستەردىڭ قاتارىندا 2025 جىلدىڭ 1 قاڭتارىنا دەيىن جاسالعان قارىز شارتتارى بويىنشا مىندەتتى تۇردە قارىزدى رەتتەۋ تالابىنىڭ الىپ تاستالۋى بار. سونىمەن بىرگە بورىشكەرگە سوتتان تىس بانكروتتىق ءراسىمىن سەبەپ كورسەتپەي توقتاتۋعا مۇمكىندىك بەرىلگەن.
سونداي-اق بانكروتتىڭ قارجى ۇيىمدارى الدىنداعى بارلىق مىندەتتەمەلەرى, كرەديتتىك بيۋرولار بازاسىندا كورىنبەيتىن قارىزدارىمەن قوسا, تولىق توقتاتىلادى.
قازىر پارلامەنتتە لومباردتاردى سوتتان تىس بانكروتتىق راسىمىنە قاتىساتىن كرەديتورلار تىزىمىنەن شىعارۋ جونىندەگى تۇزەتۋلەر قارالىپ جاتىر. بۇدان بولەك, بەرەشەگى 1600 اەك-تەن اسپايتىن ازاماتتار ءۇشىن بانكروتتىق ءراسىمىنىڭ مەرزىمىن قىسقارتۋ ۇسىنىلعان.
جەكە تۇلعالاردىڭ بانكروتتىعى قازاقستاندا 2023 جىلعى 3 ناۋرىزدان باستاپ قولجەتىمدى بولدى. وسى ۋاقىت ىشىندە مىڭداعان ازامات قارىز ماسەلەسىن تۇبەگەيلى شەشۋ ءۇشىن وسى تەتىككە جۇگىنگەن.
2025 جىلدىڭ ماۋسىم ايىنىڭ سوڭىندا قارجى نارىعىن دامىتۋ, تۇتىنۋشىلار قۇقىعىن قورعاۋ جانە بايلانىس سالاسىنا قاتىستى بىرنەشە زاڭعا وزگەرىستەر ەنگىزىلگەن جاڭا قۇجاتقا قول قويىلدى. ول "ازاماتتاردىڭ تولەم قابىلەتتىلىگىن قالپىنا كەلتىرۋ جانە بانكروتتىعى تۋرالى" زاڭدى جەتىلدىرۋدى دە قامتيدى. ەنگىزىلگەن تۇزەتۋلەر ازاماتتارعا قارىزدى كەشىرتۋگە نەمەسە تولەمدى كەيىنگە شەگەرۋگە مۇمكىندىك بەرە وتىرىپ, ولاردىڭ قارجىلىق جاعدايىن جەڭىلدەتۋگە باعىتتالعان.
بۇل وزگەرىستەر 31 تامىزدا كۇشىنە ەندى جانە بۇعان دەيىن ءوتىنىشى قابىلدانباي قالعان بورىشكەرلەرگە دە ءوز ماسەلەسىن قايتا قاراتۋعا جول اشادى.