ەلىمىزدە جالعان ديپلومداردى انىقتايتىن تسيفرلىق پورتال قۇرىلدى

مينيسترلىكتىڭ مالىمەتىنشە, جوعارى وقۋ ورىندارى بەرەتىن ءبىلىم تۋرالى قۇجاتتاردىڭ مازمۇنى مەن بىرەگەي ۇلگىسى بەكىتىلىپ, ءار ديپلومعا ارنايى سەريا, QR-كود جانە قايتالانبايتىن ءنومىر بەرىلەدى. ديپلومداردى قالىپتاستىرۋ «جوعارى ءبىلىم بەرۋدىڭ بىرىڭعاي پلاتفورماسى» ارقىلى اۆتوماتتى تۇردە جۇرگىزىلەدى. ەگەر ستۋدەنت تۋرالى اقپارات بۇل جۇيەدە جوق بولسا, ديپلوم ءنومىرى گەنەراتسيالانبايدى.

QR-كود پەن ارنايى ءنومىرى جوق قۇجاتتار جارامسىز دەپ تانىلادى. ۋنيۆەرسيتەتتەردە بۇل جۇيەگە تەك رەسمي تىركەلگەن قىزمەتكەرلەر عانا قول جەتكىزە الادى.

جالعان ديپلومداردىڭ جولىن كەسۋ ءۇشىن مادەنيەت جانە اقپارات مينيسترلىگى مەن ىشكى ىستەر مينيسترلىگى ينتەرنەت كەڭىستىگىن تۇراقتى باقىلاۋدا ۇستايدى. قىلمىستىق كودەكستىڭ 385-بابىنا سايكەس جالعان قۇجات جاساۋ نەمەسە پايدالانۋ ەكى جىلعا دەيىنگى باس بوستاندىعىنان ايىرۋعا دەيىن جازالانادى.

ايتا كەتەيىك, بۇگىندە 46 جالعان ديپلوم مەن ولاردى دايىنداعان 20 ينتەرنەت-رەسۋرس انىقتالىپ, ماتەريالدار ءتيىستى ورگاندارعا جىبەرىلگەن.

سونىمەن قاتار مينيسترلىك جوعارى وقۋ ورىندارىنىڭ دەرەكتەردى تسيفرلاندىرۋ جۇمىستارىن جالعاستىرىپ جاتقانىن حابارلادى. ال, جۇمىس بەرۋشىلەر ديپلومنىڭ تۇپنۇسقالىعىن epvo.kz قىزمەتى ارقىلى ونلاين تەكسەرە الادى. بارلىق ديپلومداردىڭ ەلەكتروندىق نۇسقاسى «تسيفرلىق قۇجاتتار» ءموبيلدى قوسىمشاسىندا دا قولجەتىمدى.