سەناتور گەننادي شيپوۆسكيح جاستاردىڭ ميكرونەسيەگە جاپپاي تاۋەلدى بولىپ بارا جاتقانىن ايتىپ, شاعىن قارىزدار بەرۋ ءتارتىبىن قايتا قاراۋدى ۇسىندى. ول 18 جاستاعى ازاماتتارعا تەكسەرۋسىز نەسيە راسىمدەۋ قاۋىپتى ەكەنىن اتاپ, جاس شەگىن 21 جاسقا دەيىن كوتەرۋدى ۇسىنىپ وتىر, دەپ حابارلايدى Egemen.kz.
سەناتتىڭ جالپى وتىرىسىندا ءسوز سويلەگەن دەپۋتات گەننادي شيپوۆسكيح جاستاردىڭ قارجىلىق ۇيىمدارعا قارىزعا باتۋ دەڭگەيى الاڭداتارلىق دەڭگەيگە جەتكەنىن مالىمدەدى. ونىڭ ايتۋىنشا, كوپتەگەن جاستار ميكروقارجى ۇيىمدارىنىڭ بىرنەشە مينۋتتا راسىمدەلەتىن پايىزدىق مولشەرلەمەسى جوعارى نەسيەلەرگە جۇگىنۋگە بەيىم.
سەناتوردىڭ سوزىنە قاراعاندا, بۇل جاعداي الەۋمەتتىك تۇراقتىلىققا قاۋىپتى تەندەنتسيا قالىپتاستىرىپ وتىر. جاستار اراسىندا قارىز جۇكتەمەسىنىڭ ارتۋىنا قارجىلىق ساۋاتتىلىقتىڭ تومەندىگى, ميكروقارجى ۇيىمدارىنىڭ باقىلاۋسىز جارناماسى جانە نەسيەنى وتە جەڭىل راسىمدەۋ مۇمكىندىگى نەگىزگى سەبەپكە اينالعان.
«سونىمەن قاتار, ميكروكرەديتتىك ۇيىمداردى رەتتەۋدەگى كەمشىلىكتەر دە جاعدايدى ۋشىقتىرىپ جاتىر. جەكە دەرەكتەردى ەنگىزۋ ارقىلى بىرنەشە مينۋت ىشىندە نەسيە راسىمدەۋ مۇمكىندىگى جاستاردى ويلانىپ-تولعانباستان قارجىلىق مىندەتتەمە قابىلداۋعا يتەرمەلەيدى. بۇل ولاردىڭ پسيحولوگيالىق جاي-كۇيىنە تەرىس اسەر ەتىپ, كۇيزەلىس پەن الەۋمەتتىك وقشاۋلانۋعا اكەلۋى مۇمكىن. ومىرلەرىنە بالتا شابىلادى دەسەك تە ارتىق بولمايدى», دەدى گەننادي شيپوۆسكيح.
دەپۋتات سالالىق اگەنتتىكتىڭ جاستار اراسىنداعى ميكروكرەديت الۋ ستاتيستيكاسىن جۇرگىزبەيتىنىن دە سىنعا الدى. ونىڭ ايتۋىنشا, بۇل ماسەلەنىڭ ناقتى اۋقىمىن باعالاۋعا كەدەرگى كەلتىرىپ وتىر.
وسىعان بايلانىستى سەناتور ميكرونەسيەلەر بەرۋ شارتتارىن قاتاڭداتۋدى ۇسىندى. ول 18 جاستان باستاپ تەكسەرۋسىز نەسيە راسىمدەۋ تاجىريبەسىن توقتاتىپ, ميكرونەسيەنى كەمىندە 21 جاسقا تولعان ازاماتتارعا عانا بەرۋ ماسەلەسىن قاراستىرۋدى ۇسىندى. سونىمەن قاتار, جاس قارىز الۋشىلاردىڭ قارجىلىق جاعدايىن باعالاۋ جانە مەكتەپتەر مەن كوللەدجدەردە قارجىلىق ساۋاتتىلىقتى مىندەتتى ءپان رەتىندە ەنگىزۋدى قاراستىرۋدى ۇسىندى.