ەلىمىزدە ءتارتىپتىڭ مازمۇنىن ايتارلىقتاي وزگەرتەتىن جانە قارۋلى كۇشتەردىڭ وقۋشىلاردى قىزمەتكە دايارلاۋعا قاتىسۋىن نىعايتاتىن العاشقى اسكەري دايىندىقتىڭ جاڭارتىلعان قاعيدالارى بەكىتىلدى. قورعانىس ءمينيسترى بۇيرىققا 4 قاراشادا قول قويدى, دەپ حابارلايدى Egemen.kz اتالعان مينيسترلىكتىڭ ءباسپاسوز قىزمەتىنە سىلتەمە جاساپ.
قۇجاتتى باس شتابتىڭ ۇيىمداستىرۋ-جۇمىلدىرۋ جۇمىسى دەپارتامەنتى اسكەري قىزمەت جانە اسكەري-پاتريوتتىق تاربيە تۋرالى زاڭناماعا ەنگىزىلگەن تۇزەتۋلەردى ەسكەرە وتىرىپ ازىرلەدى. ەرەجەلەر مەكتەپتەردە, كوللەدجدەردە جانە كاسىپتىك ءبىلىم بەرۋ مەكەمەلەرىندە العاشقى اسكەري دايىندىقتى ۇيىمداستىرۋ مەن وقىتۋدىڭ بىرىڭعاي تاسىلدەرىن بەلگىلەيدى, پەداگوگتەرگە قويىلاتىن تالاپتاردى ناقتىلاپ, كۋرستىڭ پراكتيكالىق قۇرامداس بولىگىن كەڭەيتەدى.
نەگىزگى وزگەرىستەردىڭ ءبىرى «العاشقى اسكەري دايىندىق» ءپانى قايتا ورالدى. باعدارلاما اسكەري قىزمەتشىلەردىڭ قۇقىقتارى, مىندەتتەرى مەن الەۋمەتتىك كەپىلدىكتەرى تۋرالى پراكتيكالىق ەلەمەنتتەردى, وقۋ-دالالىق ساباقتاردى كوبەيتۋ جانە ءتۇسىندىرۋ جۇمىستارىن كەڭەيتۋ ەسەبىنەن كۇشەيتىلەدى.
قورعانىس ءمينيسترىنىڭ كەڭەسشىسى ايگۇل تولەمباەۆا جاڭارتۋلار بولاشاق اسكەرگە شاقىرىلۋشىلاردى دايارلاۋ ساپاسىن ارتتىرۋعا باعىتتالعانىن اتاپ ءوتتى.
ء«بىز ءپاندى ونىڭ ناقتى مازمۇنىنا ساي ەتەمىز. بۇل ازاماتتاردى اسكەرگە دايىنداۋدىڭ ءبىرىنشى كەزەڭى. بالالار اسكەري قىزمەتشىنىڭ جارعىسىن, مىندەتتەرىن, قىزمەتتەن كەيىنگى قۇقىقتارى مەن كەپىلدىكتەرىن ءتۇسىنۋى كەرەك. بۇگىنگى اسكەر – بۇل ناقتى ماماندىق پەن ءبىلىم الۋدىڭ مۇمكىندىگى. مەكتەپ وقۋشىلارىنىڭ بۇل تۋرالى الدىن الا بىلگەنىن قالايمىز», دەدى ول.
وقىتۋشىلارعا قويىلاتىن تالاپتار ايتارلىقتاي وزگەرەدى. ءااد-نى ماماندىعى بويىنشا پەداگوگيكالىق ءبىلىمى جانە اسكەري قىزمەت وتكەرۋ تاجىريبەسى بار ازاماتتار عانا جۇرگىزە الادى. ءپان بويىنشا جۇمىس ىستەيتىن مۇعالىمدەر ءوز لاۋازىمدارىن ساقتايدى. كەمىندە ون جىل ەڭبەك سىڭىرگەن اسكەري قىزمەتشىلەر ءۇشىن قورعانىس مينيسترلىگىنىڭ اسكەري وقۋ ورىندارىنىڭ بازاسىندا تەگىن پەداگوگيكالىق قايتا دايارلاۋ مۇمكىندىگى ەنگىزىلەدى.
مينيستر كەڭەسشىسىنىڭ ايتۋىنشا, بۇل شەشىم كادرلىق بازانى نىعايتىپ, وقۋشىلاردىڭ پانگە دەگەن سەنىمىن ارتتىرادى.
«وقۋشىلار اسكەردە قىزمەت ەتكەن ادامدى كورۋى كەرەك. بۇل قورقىنىش پەن سەنىمسىزدىكتى بولدىرمايدى, ءارى ارميانىڭ قالاي جۇمىس ىستەيتىنىن تۇسىندىرۋگە مۇمكىندىك بەرەدى», دەدى ا.تولەمباەۆا.
جاڭارتىلعان ەرەجەلەر اسكەري بولىمدەردىڭ ءرولىن كەڭەيتەدى: وقۋ-دالالىق جيىنداردىڭ پراكتيكالىق قۇرامداس بولىگى كۇشەيتىلەدى, بولىمشە كومانديرلەرى جەكەلەگەن ساباقتارعا قاتىسىپ, دالالىق بازانى كورسەتەدى. ءااد وقىتۋشىلارىنىڭ بىلىكتىلىگىن ارتتىرۋ بۇدان بىلاي اسكەري جوعارى وقۋ ورىندارىنىڭ, كافەدرالاردىڭ جانە قورعانىس مينيسترلىگىنىڭ ۆەدومستۆولىق باعىنىستى ۇيىمدارىنىڭ بازاسىندا عانا جۇرگىزىلەدى. بۇل وزەكتى اسكەري تاجىريبەگە قول جەتكىزۋگە ىقپال ەتەدى.