ۇقك-ءنىڭ قوستاناي وبلىستىق شەكارا قىزمەتى دەپارتامەنتىندە وتان الدىنداعى اسكەري بورىشىن ابىرويمەن وتەپ قايتقان ساربازدارعا تەگىن ءبىلىم گرانتىن تاپسىرۋ ءراسىمى ءوتتى.
سالتاناتتى جيىندا دەپارتامەنت باستىعىنىڭ ورىنباسارى, پولكوۆنيك ماديار وتەلباەۆ اسكەري مىندەتىن ادال اتقارعان, قىزمەت بارىسىندا بۇلجىماس ءتارتىپ پەن جوعارى جاۋاپكەرشىلىكتىڭ ۇلگىسىن كورسەتكەن جاۋىنگەرلەردى قولداۋ شەكارا قىزمەتىنىڭ ماڭىزدى مىندەتىنىڭ ءبىرى ەكەنىن ايتتى.
«شەكارا شەبىندەگى قىزمەت – ادام مىنەزىن شىنىقتىراتىن ۇلكەن مەكتەپ. ال بۇگىنگى سالتاناتتى ءىس-شارادا ساربازدارعا بەرىلگەن مەملەكەتتىك گرانتتار جاستاردىڭ تەگىن ءبىلىم الىپ, كەلەشەكتە كاسىبي مامان, لايىقتى ازامات بولىپ قالىپتاسۋىنا جولاشار بولادى دەگەن سەنىمدەمىن», دەدى م.وتەلباەۆ.
مەملەكەتتىك گرانتقا يە بولعان جاۋىنگەردىڭ ءبىرى, ليساكوۆ قالاسىنىڭ تۇرعىنى ءدامىر نۇرقانوۆ اسكەر قاتارىنا وتكەن جىلى قىركۇيەك ايىندا اتتانعان. ءبىر جىل كۇرشىم, زايساندا شەكارا شەبىن كۇزەتىپ, مەرزىمى اياقتالعان سوڭ بيىل قىركۇيەكتە قايتىپ ورالدى. اسكەرگە دەيىن تەحنيك-باعدارلاماشى ماماندىعى بويىنشا ارنايى ورتا ءبىلىم العان ءدامىر وتان الدىنداعى بورىشىن مۇلتىكسىز اتقارعانى ءۇشىن ءبىلىم گرانتىنا لايىق ساربازداردىڭ قاتارىنا دا ەنگەن. ابىروي بولعاندا, ىرىكتەۋ كونكۋرسىنان سۇرىنبەي ءوتىپ, احمەت بايتۇرسىن ۇلى اتىنداعى قوستاناي وڭىرلىك ۋنيۆەرسيتەتىنە وقۋعا ءتۇسىپ وتىر. اماندىق بولسا, 2026 جىلدان باستاپ جوو ستۋدەنتى اتانىپ, «مەحانيكا جانە مەتالل وڭدەۋ» ماماندىعىنىڭ قىر-سىرىن يگەرە باستايدى.
«جالپى, مەنىڭ ءومىرىمدى اسكەرگە دەيىنگى جانە اسكەردەن كەيىنگى دەپ ەكى كەزەڭگە بولۋگە بولادى. اسكەري قىزمەتتە ءجۇرىپ بۇرىن ءوزىم بىلمەگەن كوپ نارسەنى كورىپ-ءبىلدىم. اۋىرتپالىقتا ءتوزىمدى بولۋدى, قيىندىقتان قورىقپاۋدى, جولداسىڭا ادال بولىپ, اينالاڭداعى ادامدارمەن ءتىل تابىسا ءبىلۋدى ۇيرەندىم. بۇگىن وقۋ گرانتىن الىپ ەرەكشە قۋانىپ تۇرمىن. ارينە, بۇل – مەن ءۇشىن ۇلكەن مارتەبە, جاۋاپكەرشىلىك. ۋنيۆەرسيتەتتە جوعارى ءبىلىم الىپ ءارى قاراي ەڭبەك ەتىپ, وسى ەلدىڭ ءبىر پايدالى, ساپالى ازاماتى بولعىم كەلەدى», دەيدى ءدامىر.
دامىرمەن بىرگە ءبىلىم گرانتىن العان الەكسەي كوزاچەنكو دا كۇرشىم شەكارا باسقارماسىنىڭ «كوكجوتا» زاستابىندا ءبىر جىل كولىك جۇرگىزگەن. الەكسەي اسكەرگە دەيىن قوستاناي اۆتوموبيل ترانسپورتى كوللەدجىندە وقىپ, تەحنيكالىق قىزمەت كورسەتۋشى, اۆتوموبيل ترانسپورتىن جوندەۋشى دەگەن ماماندىق الىپ شىققان. ەندى اسكەردەن كەيىن مەملەكەتتىك گرانت قولىنا ءتيىپ, الداعى جىلدان باستاپ اقاڭ ۋنيۆەرسيتەتىندە «ترانسپورتتىق تەحنيكا جانە تەحنولوگيا» ماماندىعى بويىنشا وقۋىن جالعاستىرماق.
«بىرجىلدىق قىزمەت كوپ نارسەگە ۇيرەتتى. شەكارا شەبىندە بورىشىن وتەگەن جاۋىنگەر ءۇشىن جاۋاپكەرشىلىك دەگەن نارسە كۇندەلىكتى ەرەجە-داعدىعا اينالادى. ازىن-اۋلاق ەڭبەگىمدى باعالاپ جاتقان مەملەكەتكە, شەكارا قىزمەتىندە ءجۇرىپ ءوزىم ءتالىم العان وفيتسەرلەرگە, قارۋلاس جولداستارىما العىس ايتامىن», دەيدى ا.كوزاچەنكو.
دەپارتامەنت باستىعىنىڭ ورىنباسارى گرانت يەلەرىن قۇتتىقتاپ, ستۋدەنت اتانعان ساربازدارعا ساتتىلىك تىلەدى.
«شەكارا شەبىندە ەل تىنىشتىعىن قورعاۋ – وڭاي قىزمەت ەمەس. سىزدەر مىندەتتى ابىرويمەن اتقاردىڭىزدار. مەملەكەت ەڭبەكتەرىڭىزدى باعالاپ, سىزدەرگە جوعارى وقۋ ورىندارىندا تەگىن ءبىلىم الۋ مۇمكىندىگىن بەرىپ وتىر. ەستەرىڭىزدە بولسىن, شەكاراشىنىڭ قىزمەتى اسكەردەن بوساتۋ تۋرالى بۇيرىقپەن اياقتالمايدى. سىزدەردىڭ ءبىر جىل ىشىندە جيناقتاعان ءبىلىم-تاجىريبەلەرىڭىز, اسكەري ومىرلەرىڭىز قالىپتاستىرعان ءتارتىپ پەن مىنەز ەرتەڭ ەل يگىلىگىنە قىزمەت ەتۋ كەرەك. سىزدەردىڭ ۋنيۆەرسيتەتتە ساپالى ءبىلىم الىپ, كەلەشەكتە بىلىكتى مامان بولىپ شىعۋلارىڭىزعا تىلەكتەسپىن», دەدى پولكوۆنيك م.وتەلباەۆ.
قوستاناي وبلىسى