وتكەن سەنبىدە مەملەكەت باسشىسى نۇرسۇلتان نازارباەۆ استاناداعى وليمپيادالىق اۋقىمداعى جاڭا مۇز سارايىندا بولدى. كەشەننىڭ ينفراقۇرىلىمىمەن تانىسقان مەملەكەت باسشىسى ونىڭ ەلوردادا سپورت كلاستەرىن دامىتۋ جانە قىسقى سپورت تۇرلەرىن ىلگەرىلەتۋ ءۇشىن ماڭىزى زور بولاتىنىن اتاپ ءوتتى.
– بۇگىن ءبىز تاعى ءبىر ماڭىزدى الەۋمەتتىك نىساننىڭ ىسكە قوسىلۋىنىڭ كۋاسى بولدىق. ونى شىنىمەن دە مۇز سارايى دەۋگە بولادى. ويتكەنى, مۇندا 12 مىڭ كورەرمەنگە ەسەپتەلگەن الەمدىك دەڭگەيدەگى ارەنا, حوككەي اكادەمياسى, وليمپيادالىق باسسەين بار. بۇل عيماراتتى ەلىمىزگە, استانامىزعا ۇلكەن سىيلىق دەپ ساناۋىمىز كەرەك. استانا قالاسى سولتۇستىكتە ورنالاسقاندىقتان, سپورتتىڭ قىسقى تۇرلەرىن كوبىرەك دامىتۋعا ءتيىسپىز. قىسقى سپورتتىق ويىنداردان الدىڭعى قاتاردا بولۋىمىز قاجەت. ال بۇل ستاديون ءبىزدىڭ سپورتشىلارىمىزدى جاڭا جەڭىستەرگە جىگەرلەندىرەتىنىنە, وسى ءبىر عاجايىپ سپورت ءتۇرىنىڭ جانكۇيەرلەرىن قۋانتىپ, بىرەگەي جارىستار وتكىزەتىنىمىزگە سەنىمدىمىن, – دەدى نۇرسۇلتان نازارباەۆ نىساندى ارالاپ كورگەننەن كەيىنگى بريفينگ بارىسىندا.
قازاقستان پرەزيدەنتى وڭىرلىك جانە حالىقارالىق تۋرنيرلەر, كونتسەرتتەر مەن وزگە دە شارالار وتكىزۋ قىزمەتى ەسەبىنەن كەشەننىڭ ءوزىن ءوزى اقتاۋىنا قول جەتكىزۋ قاجەتتىگىن, بۇل الەمدىك تاجىريبەگە ساي ەكەنىن اتاپ ءوتتى. جالپى الاڭى 86 000 شارشى مەتر مۇز سارايى – حوككەي كورتى, ءجۇزۋ باسسەينى جانە حوككەي اكادەمياسىنىڭ عيماراتى بار كوپ فۋنكتسيونالدى كەشەن.
پرەزيدەنت, سونداي-اق, بۇگىندە ەلىمىزدىڭ ءبىراز وبلىستارىندا حوككەي ستاديوندارى بار ەكەندىگىن, ال قحل-داعى قازاقستاندىق كوماندا جاقسى ورىندا كەلە جاتقاندىعىن ەسكە سالدى. بۇل وتە جاقسى كورسەتكىشتەر. مەنىڭ ويىمشا, وسى ستاديون ءبىزدىڭ سپورتشىلارعا جاڭا سەرپىن بەرەدى. ءبىز وسىندا الەمدىك تانىمال كوماندالاردى قابىلدايتىن بولامىز. سوندىقتان, مەن سپورتشىلار مەن جاستارعا قۇتتىقتاۋىمدى جەتكىزگىم كەلەدى, – دەدى ەلباسى.
نىساندى ارالاۋ بارىسىندا مەملەكەت باسشىسىنىڭ نازارىنا كىشىگىرىم مۇزدى شوۋ ۇسىنىلدى. ونى «بارىس» حك جاس تاربيەلەنۋشىلەرى كورسەتتى. قويىلىمدا قازاقستان حوككەيىنىڭ قازىرگە دەيىنگى دامۋ جاعدايى كورىنىس تاپتى. سونىمەن قاتار, ەلباسى ونداعى «بارىس» حوككەي كلۋبىنىڭ فيرمالىق دۇكەنىن دە ارالادى. دۇكەن مۇز سارايىنىڭ ءبىرىنشى قاباتىندا ورنالاسقان. وندا كلۋبتىڭ سيمۆولدارى بەينەلەنگەن زاتتار قويىلعان.
ايتپاقشى, بۇل سپورت كەشەنىندە بۇگىندە العاشقى شارالار باستالىپ تا كەتتى. ماسەلەن, 9 تامىزدا تۋىن كوتەرگەن حوككەيدەن قازاقستان پرەزيدەنتى كۋبوگىنىڭ ءتۋرنيرى وسى سارايدا ءوتىپ جاتىر. تۋرنيرگە «بارىستان» بولەك رەسەيدىڭ ءبىرقاتار كلۋبتارى – نوۆوكۋزنەتسك قالاسىنان «مەتاللۋرگ», حانتى-مانسيسكىدەن «يۋگرا» جانە ۆلاديۆوستوكتىق «ادميرال» قاتىسۋدا.
دينارا بىتىكوۆا,
«ەگەمەن قازاقستان».
سۋرەتتەردى تۇسىرگەندەر
س.بوندارەنكو, ب.وتارباەۆ.