ونەركاسىپ جانە قۇرىلىس ءمينيسترى ەرسايىن ناعاسپاەۆ كەيبىر ساراپشىلاردىڭ «تۇرعىن ءۇي باعاسى 30 پايىزعا وسەدى» دەگەن بولجامىنا قاتىستى پىكىر ءبىلدىردى. ۇكىمەتتە وتكەن بريفينگتە جۋرناليست سۇراعىنا جاۋاپ بەرگەن ءمينيستردىڭ ايتۋىنشا, ۆەدومستۆو جەكەمەنشىك قۇرىلىس كومپانيالارىنىڭ باعا ساياساتىنا ارالاسا المايدى, دەپ حابارلايدى Egemen.kz.
«مينيسترلىك رەتىندە ءبىز جەكەمەنشىك قۇرىلىس كومپانيالارىنىڭ باعاسىنا ىقپال ەتە المايمىز. بۇل – نارىق زاڭى. ەگەر سۇرانىس ارتسا, باعا وزگەرەدى. سۇرانىس تومەندەسە, باعا دا رەتتەلەدى. مۇنداي جاعدايدا ناقتى بولجام جاساۋ قيىن», دەدى ەرسايىن ناعاسپاەۆ.
ونىڭ ايتۋىنشا, قازىر نارىقتا جوعارى سۇرانىس بايقالادى, مۇنى قۇرىلىس كومپانيالارى وزدەرى كۇشەيتىپ وتىر – ولار پاتەرلەردى تەزىرەك ساتىپ جىبەرۋگە مۇددەلى.
«قازىر نارىقتا دۇربەلەڭ بار. ونى قۇرىلىس كومپانيالارى جاسايدى. سول سەبەپتى حالىق اراسىندا «جىلدام الۋ كەرەك» دەگەن تۇسىنىك قالىپتاسادى. مۇنداي جاعدايدا سۇرانىس ءاردايىم باعاعا اسەر ەتەدى. بىراق مەن 10-20 پايىزعا نەمەسە ودان دا جوعارى وسىمگە نەگىز كورىپ وتىرعان جوقپىن», دەدى ول.
مينيستر الەۋمەتتىك تۇرعىن ءۇي سەگمەنتىندە عانا باعاعا باقىلاۋ جۇرگىزۋگە بولاتىنىن ايتتى.
ء«بىز نارىقتىق تەتىكتەرگە ىقپال ەتە المايمىز. بىراق الەۋمەتتىك تۇرعىن ۇيلەر باعىتىندا بارلىق باعانى قاداعالايمىز, قاجەت بولعان جاعدايدا بەلگىلەنگەن قۇندى بەكىتۋگە رۇقسات بەرەمىز», دەدى ە.ناعاسپاەۆ.
بۇعان دەيىن ۇلتتىق ەكونوميكا ۆيتسە-ءمينيسترى ازامات ءامرين تۇرعىن ءۇي باعاسىنىڭ قاشان كوتەرىلۋى مۇمكىن ەكەنىن ايتقان ەدى.