پرەزيدەنت قاسىم-جومارت توقاەۆ 2020 جىلى حالىققا جولداۋىندا اۋىل اكىمدەرىن تىكەلەي سايلاۋ باستاماسىن كوتەرگەن ەدى. سول ۋاقىتتان بەرى ەلىمىز بويىنشا 2 334 اۋىل اكىمى سايلانعان. بۇكىل بيلىك جۇيەسىنىڭ تىرەگى سانالاتىن اۋىل اكىمدەرىنىڭ ىشىندە ناقتى ناتيجە كورسەتىپ جاتقاندارى جەتكىلىكتى. سولاردىڭ ءبىرى – اقتوبە وبلىسى, مارتوك اۋدانى تاڭىربەرگەن اۋىلدىق وكرۋگىنىڭ اكىمى مەدەت بەكجانوۆ, دەپ جازادى Egemen.kz.
36 جاستاعى مەدەت بەكجانوۆ تاڭىربەرگەن اۋىلىنا «ديپلوممەن – اۋىلعا» باعدارلاماسى بويىنشا بارعان. اتالعان اۋىلدا ەڭبەك جولىن مۋزىكا ءپانىنىڭ مۇعالىمى بولىپ باستاعان مەدەت بەكجانوۆ قوعامدىق ىستەردە بەلسەنە كوزگە ءتۇسىپ, 2022 جىلى اۋىل اكىمى بولىپ سايلانعان. تاڭىربەرگەن اۋىلىنىڭ اكىمى «Qazaqstan» ۇلتتىق ارناسىنىڭ «اشىق الاڭ» باعدارلاماسىندا قىزمەت جولى تۋرالى قىزىقتى مالىمەتتەرمەن ءبولىستى.
«اۋىلعا بارىپ, باسپانالى بولۋدى كوزدەدىم. ارمانىم ورىندالىپ, وتباسىن دا قۇردىم. سونداعى بالاباقشادا مۋزىكادان ءبىلىم بەرە ءجۇرىپ, اۋداننىڭ مادەني ءىس-شارالارىنا بەلسەنە ارالاستىم. سونداي-اق ءوزىم قىزمەت ەتكەن بالاباقشادا مەڭگەرۋشى بولدىم. 2022 جىلى اۋىل اكىمدەرىن سايلاۋ رەفورماسىنا ساي مەن دە باسەكەگە ءتۇستىم. قارسىلاسىم اۋىلدىڭ بايىرعى تۇرعىنى بولدى. سايلاۋ ناۋقانىندا ارنايى باعدارلامامدى جاريالادىم, ءتىپتى حالىققا بەينەۇندەۋ ءتۇسىردىم. ناتيجەسىندە مەن جەڭىسكە جەتتىم», دەدى مەدەت بەكجانوۆ.
اۋىل اكىمىنىڭ ايتۋىنشا, ناعىز جۇمىس سايلاۋدان كەيىن باستالعان. ول بۇگىندە حالىققا بەرگەن ۋادەلەرىن كەزەڭ-كەزەڭىمەن ورىنداپ كەلەدى. ىسكەر اكىم بۇگىنگە دەيىن تاڭىربەرگەن اۋىلىنا ميلليونداعان سوماعا ينۆەستيتسيا تارتقان.
«اۋىلىمىز سارجانساي, كەڭساحارا ەلدى مەكەندەرىنەن تۇرادى. سايلاۋ بارىسىندا كەڭساحارا اۋىلىنا ۇيالى بايلانىس جۇيەسىن ورناتۋعا ۋادە بەرگەن ەدىم. سول ۋادەمدە تۇرىپ, جەرگىلىكتى كاسىپ يەلەرىن تارتا وتىرىپ, حالىق سۇرانىسىن ورىندادىق. سونىمەن بىرگە, اۋىلعا كاسىپكەرلەردى جۇمىلدىرىپ, قوسىمشا بالاباقشا سالدىق. «اۋىل اماناتى» باعدارلاماسى اياسىندا 345 ملن تەڭگە ينۆەستيتسيا تارتىپ, 50-دەن استام جاڭا جۇمىس ورنىن اشتىق. ءداستۇرلى مال شارۋاشىلىعىنان بولەك ساياجاي اشىپ, جىلىجاي ءىسىن جولعا قويدىق. اۋىل ونىمدەرى اۋداندا دا ساتىلىپ جاتىر. جەرگىلىكتى حالىق 20-دان استام ءونىمدى اۋىلدا ءوندىرىپ, ءوزىن-ءوزى قاجەتتى ازىق-ت ۇلىكپەن قامتىپ وتىر», دەدى اۋىل اكىمى.
مەدەت بەكجانوۆ ءوز سوزىندە اۋىل اكىمدەرىنىڭ قۇزىرەتىن ناقتىلاۋ باستاماسىن دا كوتەردى.
ايتا كەتەيىك, 28 قاراشا كۇنى استانادا مەملەكەت باسشىسىنىڭ قاتىسۋىمەن اۋىل اكىمدەرىنىڭ ديالوگ-پلاتفورماسى ءوتتى.
جيىندا پرەزيدەنت اۋىل اكىمدەرىنىڭ وكىلەتتىكتەرىن ناقتىلاۋ جونىندە تاپسىرما بەردى.