اباي اتىنداعى قازاق ۇلتتىق وپەرا جانە بالەت تەاترىندا كوپشىلىك اسىعا كۇتكەن « ۇلى جىبەك جولى» اتتى ەكى ءبولىمدى بالەتتىڭ سالتاناتتى پرەمەراسى ءوتتى, دەپ جازادى Egemen.kz.
قازاق بالەت ونەرىندەگى ءىرى وقيعالاردىڭ ءبىرى سانالعان بۇل قويىلىم تاريحي تاقىرىپتى زاماناۋي ينتەرپرەتاتسيامەن ۇشتاستىرىپ, ونەرسۇيەر قاۋىمنىڭ زور قىزىعۋشىلىعىن تۋدىردى. مۋزىكا اۆتورى – جاس كومپوزيتور ايگەرىم ەركەباەۆا. سپەكتاكلدىڭ يدەياسى, كونتسەپتسياسى, ليبرەتتوسى مەن حورەوگرافياسى قازاقستاننىڭ حالىق ءارتىسى, تەاتردىڭ بالەت ترۋپپاسىنىڭ كوركەمدىك جەتەكشىسى گۇلجان تۇتقىباەۆاعا تيەسىلى. شىعارماشىلىق تاندەم ساحنادا تەرەڭ مازمۇندى, كوركەمدىگى جوعارى سپەكتاكلدى دۇنيەگە اكەلىپتى.
قويىلىم ۇلى جىبەك جولىنىڭ تاريحي ماڭىزىن جاڭا قىرىنان زەردەلەيدى. بالەتتە وتكەن مەن بۇگىننىڭ بايلانىسى, ۋاقىت پەن كەڭىستىكتىڭ ساباقتاستىعى ەرەكشە پوەتيكالىق تىلمەن بەينەلەنەدى. سيۋجەت تسيفرلىق وقشاۋلانعان الەمدە ءومىر ءسۇرىپ جۇرگەن جاس جىگىتتىڭ ىشكى رۋحاني الەمىنەن باستالادى. جان دۇنيەسى شىنايى سەزىمدى جوعالتپاعان كەيىپكەر ابىز قارتپەن جۇزدەسكەننەن كەيىن كورەرمەندى ەجەلگى داۋىرگە – كەزىندە وركەنيەتتەر توعىسقان ۇلى جىبەك جولىنىڭ كەرەمەت كەزەڭىنە جەتەلەيدى.
ەجەلگى شىعىستىڭ سان قىرلى بوياۋى – كەرۋەن كوشتەرى, بازاردىڭ قىزۋلى تىنىسى, ءتۇرلى ەلدەردىڭ مادەنيەتى مەن سالت-ءداستۇرى ساحنالىق پلاستيكامەن اسەم ورىلەدى. سول ورتادا جاس جىگىت اقسۇڭقار ەسىمدى پاك تە ادال قىزدى كەزدەستىرەدى. اقسۇڭقاردىڭ بەينەسى – تازالىق پەن مەيىرىمنىڭ سيمۆولى. الايدا ولاردىڭ اراسىنا جىلتىر دۇنيەنىڭ ق ۇلى بولعان ۆەنەتسيالىق ساۋداگەر كيلىگەدى. اينامەن سيقىرلانعان اقسۇڭقار باسقا الەمگە ەرىپ كەتەدى. قىزدى قايتارۋعا بەل بۋعان جاس جىگىت ءتۇرلى سىناقتان وتەدى, ەلەستەرمەن بەتپە-بەت كەلىپ, ءوز السىزدىگىن جەڭەدى. قويىلىم فينالىندا كەيىپكەر ءوز ۋاقىتىنا ورالىپ, بوزعىلت تارتقان سۋىق قالانىڭ وزىنە جان بىتىرەدى. بۇل – رۋحاني ويانۋ, ادام بولمىسىنىڭ جاڭعىرۋى, ماڭگىلىك قۇندىلىقتاردىڭ جەڭىسى.
« ۇلى جىبەك جولى» بالەتى – فيلوسوفيالىق ويعا جەتەلەيتىن, تاريحي كوركەمدىك پەن زاماناۋي ساحنالىق شەشىمدەردىڭ ۇيلەسىمىنەن تۋعان اسەرلى تۋىندى. قويىلىم ءار داۋىردە دە وزەكتىلىگىن جوعالتپايتىن رۋحاني تازالىق, ادامي سەزىم, مادەني بايلانىس سەكىلدى قۇندىلىقتاردى تەرەڭنەن قوزعايدى.
پرەمەرا نازىك حورەوگرافياسى, سيمفونيالىق مۋزىكانىڭ باي ورنەگى, كوركەم ستسەنوگرافياسى جانە اكتەرلەردىڭ ۇزدىك پلاستيكالىق شەشىمدەرىمەن كورەرمەننىڭ ىستىق ىقىلاسىنا بولەندى. بۇل قويىلىم قازاق بالەت ونەرىنىڭ جاڭا بەلەسى ەكەنى ءسوزسىز.