قوستانايدا اۋىل شارۋاشىلىعى قىزمەتكەرلەرى كۇنىنە ارنالعان سالتاناتتى ءىس-شارا ءوتتى. جيىنعا شارۋاشىلىق باسشىلارى, كوپ جىلدان بەرى اۋىل شارۋاشىلىعى سالاسىندا ەڭبەك ەتىپ كەلە جاتقان قاراپايىم جۇمىسشىلار, مەملەكەتتىك قىزمەتشىلەر قاتىستى, دەپ حابارلايدى Egemen.kz.
وبلىس اكىمى شارۋالاردى كاسىبي مەرەكەلەرىمەن قۇتتىقتاپ, اۋىل شارۋاشىلىعىن دامىتۋ, اگروونەركاسىپ كەشەنىن تسيفرلاندىرۋ, ينفراقۇرىلىمدى جاڭعىرتۋ ءتارىزدى ماڭىزدى مىندەتتەردى شەشۋمەن بىرگە, بيزنەس كەيىنگى جىلدارى اۋىلعا قولداۋ كورسەتۋ باعىتىندا ەداۋىر بەلسەندى بولا باستاعانىن ايتتى.
وڭىردە كاسىپورىنداردى تەحنيكالىق قايتا جاراقتاندىرۋ, اۋىلشارۋاشىلىق ونىمدەرىن تەرەڭدەتە وڭدەۋ جوبالارى قولعا الىنىپ جاتىر. مەملەكەت باسشىسىنىڭ تاپسىرماسىمەن اۋىل شارۋاشىلىعى قۇرىلىمدارىن قولداۋدىڭ جاڭا تەتىكتەرى ىسكە قوسىلدى. 2025 جىلى سالاعا 207 ملرد تەڭگە ءبولىندى. بۇل وتكەن جىلمەن سالىستىرعاندا 60 پايىز, ال 2023 جىلمەن سالىستىرعاندا ەكى ەسە كوپ. ناتيجەسىندە وبلىس ديقاندارى بيىل القاپتان 7 ملن توننادان استام ءونىم جيناپ, سوڭعى ون جىل ىشىندەگى ەڭ جوعارى كورسەتكىشكە جەتىپ وتىر.
وبلىس اكىمى شارۋاشىلىق باسشىلارىنا اۋىلدى كەشەندى دامىتۋ قاجەتتىگىن تاعى ەسكەرتتى. ايتۋىنشا, سوڭعى ءۇش جىل ىشىندە اۋىل تۇرعىندارىنا قولايلى جاعداي جاساۋ ءۇشىن شامامەن 254 ملرد تەڭگە بولىنگەن. اۋىلدىق مەكەندەردە ءتۇرلى مەملەكەتتىك باعدارلامالار اياسىندا ساپالى اۋىز سۋ تارتىلىپ, تۇرعىن ءۇي, مەكتەپ, بالاباقشا, مەديتسينا جانە سپورت نىساندارى سالىنىپ جاتىر.
قۇمار اقساقالوۆ اۋىلدى دامىتۋعا ەرەكشە ۇلەس قوسقان بىرقاتار كاسىپورىنداردى اتادى. مىسالى, قوستاناي اۋدانىنداعى «ايان-وزات», «الەكساندروۆسكوە» قامىستى اۋدانىنداعى «التىنسارين», دەنيسوۆ اۋدانىنداعى «فرۋنزەنسكوە» سەرىكتەستىكتەرى, ۇزىنكول اۋدانىنداعى «ميراس» شارۋا قوجالىعى ءتارىزدى كاسىپورىندار اۋىلدى اباتتاندىرۋ, تۇرعىن ءۇي سالۋ, اۋىل سپورتى مەن مادەنيەتىن قولداۋ باعىتىندا اۋىز تولتىرىپ ايتارلىقتاي تۇششىمدى ءىس تىندىرعان.
ايماق باسشىسىنىڭ سوزىنشە, وڭىردە مال شارۋاشىلىعىن دامىتۋعا ەرەكشە كوڭىل ءبولىنىپ, زاماناۋي جوعارى تەحنولوگيالى ءسۇت فەرمالارى سالىنىپ جاتىر. 2025-2027 جىلدارى وبلىستا جالپى قۇنى 383 ملرد تەڭگە بولاتىن 93 ينۆەستيتسيالىق جوبا ىسكە اسىرىلماق. سونداي-اق, وڭدەۋ سالاسىندا 18 جوبا ىسكە اسىرىلىپ, 3 مىڭعا جۋىق جاڭا جۇمىس ورنى اشىلادى.
وبلىس اكىمى ءىس-شارا سوڭىندا اۋىلدى كوركەيتۋگە, اۋىل تۇرعىندارىنىڭ ءومىر ءسۇرۋ ساپاسىن ارتتىرۋعا ەلەۋلى ۇلەس قوسىپ كەلە جاتقان كاسىپكەرلەردى ماراپاتتادى.