جاس كەلسە – ىسكە

ەل يگىلىگىن ەسەلەۋگە ۇلەس قوسقان دياس ءبىلالوۆ «فيرما الماز-اگرو» سەرىكتەستىگىندە ءۇشىنشى جىل ەڭبەك ەتەدى. ورتا ارناۋلى ءبىلىمى بار. كوپتەگەن اۋىل بالاسى ءتارىزدى تەحنيكاعا دەگەن قۇمارلىق ەرتە پايدا بولعان. الدىڭعى تولقىن اعالارىنىڭ جان اياماي جۇمىس ىستەپ جۇرگەنىن كورىپ, ءوزى دە ناق سولارداي بولۋعا تىرىسقان. اسىلىندا, الدىنان جۇمىس ۇركىپ وتىراتىن ەڭبەكقور ادامداردىڭ ءىس-قيمىلى كەيىنگى تولقىنعا جاقسى ونەگە.

– بىزدە وزات جۇمىسشىلار وتە كوپ. ولار وزدەرىنە تاپسىرىلعان كەز كەلگەن شارۋانى تاپ-تۇيناقتاي ەتىپ ورىندايدى. مەحانيزاتورلاردىڭ كوپشىلىگى تەحنيكانىڭ ءتۇر-ءتۇرىن تىزگىن­دەپ, جۇمىس ىستەي بەرەدى, – دەيدى دياس. – كومبايندا ىستەۋ قىزىق ءارى قاستەرلى. كوز الدىڭىزعا ەلەستەتىپ كورىڭىزشى, كۇزگى دالا, ماساقتاعى ءدانىن ازەر كوتەرىپ تۇرعان ەگىن القابى. ءسال عانا جەل كوتەرىلسە تەڭىزدەي تولقيدى. ىرىس تۇنعان, مول داۋلەتكە بوككەن جومارت جەر. ەگەر ەگىستىك القابىندا ءبىر تال ءارامشوپ بولماسا توقتاماي شابا بەرگىڭ كەلەدى. قازىرگى ءبىزدىڭ كورسەتكىشىمىزگە اعا تولقىننىڭ ءسال تاڭىرقاپ قارايتىنى بار. ونىڭ سىرى بەلگىلى. جاڭا زامانعى قۋاتتى تەحنيكالاردىڭ ەڭبەك ونىمدىلىگى وتە جوعارى.

جاڭاتۇرمىس اۋىلىنىڭ ماڭى قاربالاسى كوپ قوڭىر كۇزدە ەڭبەك جىرىن شەرتىپ تۇرادى. دارحان دالانى ادام كوڭىلىن ەلەگىزەتىن ەڭبەك اۋەنى تەربەتكەن كەزدە سول جورىققا قاتىسقان ەرلەردىڭ دە ەڭسەسى كوتەرىلە تۇسەدى.

– ۇجىم وتە ۇيىمشىل. ءار ءساتى شەشۋشى شاققا اينالعان كوكتەمگى ەگىس, كۇزگى ەگىن وراعى كەزىندە ۋاقىتپەن ساناسپاي ەڭبەك ەتەمىز, – دەيدى جاس كومباينشى. – مىناۋ سەنىڭ, مىناۋ مەنىڭ جۇمىسىم دەۋ جوق, ءبارى ورتاق. سەرىكتەستىك ەڭبەك ەتۋىمىزگە قولايلى جاعداي جاساپ وتىر. ەڭبەكاقىمىز تولىمدى, ۋاقىتىندا قولىمىزعا تيەدى.

جيىرمادان جاڭا اسقان جاس جىگىتتىڭ ەل ىشىندە ابىرويعا بولەنۋى ادال ەڭبەگىنىڭ ارقاسىندا. الدا قانشاما عۇمىر بار. سول جولدا قوس قولىتىعىنان كوتەرىپ دەمەيتىن, العا ۇمتىلدىراتىن قۇدىرەت – بويىنداعى ادال ەڭبەككە دەگەن ۇمتىلىسى. 

اقمولا وبلىسى,

استراحان اۋدانى